جەلتوقسان ايى تۋىسىمەن تاۋەلسىزدىك كۇنىنە دايىندىق، ول مەيرامنىڭ جاڭا جىلدىق دۇربەلەڭ استىندا قالىپ قوياتىنى تۋرالى دابىل قاعىپ جاتامىز. باس مەرەكە قارساڭىندا كوپتەگەن ۇيىم، مەكەمەلەر، دەنى جەكەمەنشىك كاسىپورىندار، جاڭا جىلعا دايىندىقتى 1 جەلتوقساننان باستاپ كەتىپ جاتادى. كوشەلەردى بەزەندىرىپ، عيماراتتاردىڭ اينالاسىنا شىرشا تىگىپ، قىزىلدى-جاسىلدى شامدار شاعىپ، تاۋەلسىزدىك تويىن تاسادا قالدىرادى.

وكىنىشتىسى، وسىنداي سوراقىلىقتاردان مەملەكەتتىك مەكەمەلەر، مەملەكەت قارجىسىن يگەرۋمەن اينالىساتىن كاسىپورىن، ۇيىمدار دا ادا ەمەس. قازاقستاننىڭ ەڭ ءىرى وبلىسى قاراعاندىنىڭ باس گازەتى «ينۋدستريالنايا كاراگاندا» گازەتىنە قاراتا ايتىپ وتىرمىز مۇنى. بيىل 80 جىلدىعىن اتاپ ءوتىپ جاتقان وبلىستىڭ گازەتى دە 1931 جىلدان باستاپ شىعادى. كەڭەستىك جىلدارى قانداي مازمۇندا، قانداي سيپاتتا شىققانىندا شارۋامىز جوق. الايدا، تاۋەلسىزدىك جىلدارىنداعى ۇستىنى ۇنايدى دەي امايمىز. ولاي دەيتىنىمىز، گازەتتىڭ ءبىرىنشى بەتىندە ءالى كۇنگە 1981 جىلى العان «ەڭبەك قىزىل تۋ» وردەنى تۇر باتپيىپ. مۇنى قازاقستان تاۋەلسىزدىگىن قورلاۋ دەمەسەڭىز دە، قۇرمەت كورسەتۋى دەي المايتىنىڭ انىق.

ايتپەسە، ول وردەندى كىم المادى، قاي ۇجىم ماراپاتتالمادى؟! الىسقا بارماي-اق، ول وردەندى وبلىستىق «ورتالىق قازاقستان» گازەتى دە يەلەنگەنىن ايتۋعا بولادى. الايدا، قازاق تىلىندە شىعاتىن گازەت ۇجىمى ورىس تىلىندەگى ارىپتەستەرى سياقتى ول وردەننەن ايىرىلماي وتىرعان جوق. گازەتتىڭ باس بەتىنە وتارشىل جۇيەنىڭ ماراپاتىن ەمەس، قازاقستاننىڭ مەملەكەتتىك ەلتاڭباسىنىڭ سۋرەتىن قويىپ ءجۇر. مەملەكەتتىك اقپاراتتىق تاپسىرىس ورىندايتىن وزگە گازەتتەر دە «ينۋدستريالنايا كاراگاندا» سياقتى ەمەس، كەڭەستىك جىلداردىڭ مۇنداي «ەستەلىكتەرىنەن» ادا.

كوبىمىز كوشەگە شىرشا تىكتى دەپ كاسىپكەرلەرگە شۇيلىگەمىز. ال، ول كاسىپكەرلەرگە، جالپى جۇرتشىلىققا ۇلگى بولاتىن كىم؟ ارينە، مەملەكەتتىڭ ءوزى جانە ونىڭ ساياساتىن ءتۇسىندىرۋشى باسپا ءسوز ورگاندارى. سوندىقتان دا، ءوندىرىستى ولكە، ەلباسىمىز نۇرسۇلتان ءابىش ۇلىنىڭ ەڭبەك جولى باستالعان ءوڭىردىڭ باس گازەتى تاۋەلسىزدىكتىڭ 25 جىلدىق مەرەيتويى قورىتىندىلانار شاقتا ەگەمەندىككە قۇرمەت كورسەتىپ، مەملەكەتشىلدىك ۇلگىسىن تانىتادى دەپ سەنەمىز. كەڭەس وكىمەتىنىڭ ماقتاۋ، ماراپاتى بۇگىندە مارتەبە ەمەستىگىن تۇسىنەتىن ۋاقىت جەتتى.

جومارت ابدوللا ۇلى