بۇگىن الەۋمەتتىك جەلىدەگى نەگىزى تاقىرىپ - ەلوردانىڭ بەكىتىلگەن استانا دەگەن ەسىمىن اۋىستىرۋ ماسەلەسى بولدى. بۇنداي باستامانى بۇگىن ق ر پارلامەنتى پالاتالارىنىڭ بىرلەسكەن وتىرىسىندا قارالىپ جاتقان «تاۋەلسىزدىكتىڭ 25 جىلدىعى قازاقستان جەتىستىكتەرىنىڭ دەكلاراسياسى» جوباسىندا ءماجىلىس دەپۋتاتى قۋانىش سۇلتانوۆ ايتتى.

وسىعان وراي پىكىر ءبىلدىرىپ جاتقان جەلى قولدانۋشىلاردىڭ ءبىرى جانىبەك اليكەن "ماعان ءبىر عالامات وي كەلدى! پەتروپاۆلدىڭ اتىن نۇرسۇلتان دەپ اۋىستىرايىق. قۇدا دا تىنىش،قۇداعي دا تىنىش. ورىستاردىڭ دا اۋزى جابىلادى. ايدالاداعى پەتر مەن پاۆلعا قاراعاندا نۇرسۇلتان كوكەم جاقىن عوي. ونىڭ ۇستىنە بۇل جاعىمپازدار ءبارىبىر قويمايدى،قىلقىلداپ."، - دەپ جازدى.

باسقا دا جەلى قولدانۋشىلارى استانا قالاسى پرەزيدەنت نازاربايەۆتىڭ جەكە قولتاڭباسى ەكەنىن العا تارتىپ، ونىڭ ەسىمىن ەلباسىنىڭ ءوزى قويعانىن، ەگەر اۋىستىرۋ قاجەت بولسا پەتروپاۆل مەن پاۆلودار قالاسىنىڭ/وبلىسىنىڭ اتاۋىن اۋىستىرۋ قاجەت ەكەنىن اتاپ ءوتتى. "سولتۇستىكتەگى ەكى قالا - پۋۆلودار مەن پەتر-پاۆەلدىڭ اتىن اۋىستىرۋ ناعىز قيامەتتىڭ قايىمى بوپ وتىر. قالا اتاۋى تۇرىپتى، وندا كوشەلەرگە جاڭا اتاۋ بەرۋگە قارسى شىعىپ جاتقان دياسپورا وكىلدەرىنەن سول وڭىرلەردىڭ اكىمدەرى دە يمەنەتىن سياقتى. 

تۇڭعىش پرەزيدەنتتى جالپىحالىق بولىپ سايلاعانىمىزدىڭ، تاۋەلسىزدىكتىڭ 25 جىلدىعىن پايدالانىپ، قۋانىش اعامىز بار، اسسامبلەيا بار، سول ەكى قالاعا نۇرقالا، نۇركەنت دەگەن سياقتى اتاۋ بەرەيىك دەگەن ۇسىنىس تاستاعاندا ءتورت قوياندى ءبىر وقپەن اتىپ الار ەدىك قوي دەيمىن دە. سوندا تۇڭعىش پرەزيدەنتىمىزدىڭ ەسىمىن دە ۇلىقتايمىز، زايىرلى مەملەكەت سيپاتىمىزعا تومپاق كەلەتىن اۋليەلەر اتىمەن اتالاتىن قوس قالانىڭ دا ماسەلەسىن شەشەر ەدىك. استانامەن قاتتى بايلانىستىرعىلارى كەلسە، بۇل جاقسى شەشىم بولار ەدى" دەدى الەۋمەتتىك جەلىدە ءانونيمدى جازبا جاريالاعان  ءبىر قولدانۋشى. 

ايتا كەتەتىن بولساق، ءبىر قاتار دەپۋتاتتار قۋانىش سۇلتانوۆتىڭ باستاماسىن قولداپ، بۇل جۇزەگە اسسا تاۋەلسىزدىگىمىز نىعايا تۇسەر ەدى دەگەن مازمۇندا پىكىرلەر ءبىلدىرىپ ۇلگەردى.  اتاپ ايتقاندا ءماجىلىس دەپۋتاتى بەكبولات تىلەۋحان "نۇرسۇلتان اتىنداعى قالانىڭ بولعانى تاۋەلسىزدىكتىڭ سيمۆولى ىسپەتتەس. تاۋەلسىز قازاقستان مەن نازاربايەۆتىڭ اتى سينونيمدەر سياقتى"، - دەپ اعىنان جارىلدى.