جۇڭگو حالىق رەسپۋبليكاسى جەر رەسۋرستارى ءمينيسترىنىڭ ورىنباسارى قازاقستان مەن قىتايدىڭ بىرىككەن گەولوگيالىق كارتاسىن جاساۋ كەرەكتىگىن مالىمدەدى، - دەپ حابارلايدى Qamshy.kz PM.kz – كە سىلتەمە جاساپ.

سونداي-اق، جۇڭگو تارابى قازاقستاندىق ستۋدەنتتەرگە ءبىلىم ستيپەنديالارىن بولۋگە مۇددەلىلىك تانىتىپ وتىر.

بۇل تۋرالى كەشە بەيجىڭدە وتكەن قازاق-قىتاي ارىپتەستىگى جونىندەگى كوميتەتتىڭ گەولوگيا جانە جەر قىرتىسىن پايدالانۋ سالاسىنداعى ارىپتەستىك جونىندەگى كىشى كوميتەتتىڭ 8-وتىرىسىنىڭ اشىلۋىندا بەلگىلى بولدى.

جيىنعا قازاق دەلەگاسياسىن قازاقستاننىڭ ينۆەستيسيالار جانە دامۋ مينيسترلىگى گەولوگيا جانە جەر قىرتىسىن پايدالانۋ كوميتەتىنىڭ ءتوراعاسى بازارباي نۇرابايەۆ پەن ق. ساتبايەۆ اتىنداعى گەولوگيا عىلىمي ينستيتۋتىنىڭ ديرەكتورى مۇرات ومىرسەرىكوۆ باستاپ بارعان. باس قوسۋعا جۇڭگو ەلىنەن جەر جانە تابيعي رەسۋرستار مينيسترلىگىنىڭ وكىلدەرى، قحر سىرتقى ىستەر مينيسترلىگى ازيا جانە ەۋروپا دەپارتامەنتىنىڭ ءبىرىنشى حاتشىسى، قحر گەولوگيالىق بارلاۋ پارتيالىق توبىنىڭ مۇشەلەرى، گەولوگيا اكادەمياسى مەن گەولوگيالىق ۆەدومستۆو وكىلدەرى قاتىسىپتى.

كوميتەت وتىرىسىنىڭ اشىلۋىندا ءسوز سويلەگەن قحر جەر جانە تابيعي رەسۋرستار ءمينيسترىنىڭ ورىنباسارى ساو ۆەيسين قازاقستان دەلەگاسياسىن ەل تاۋەلسىزدىگىنىڭ 25 جىلدىعىمەن قۇتتىقتاپ، قازاق حالقىنىڭ گۇلدەنۋىنە تىلەكتەستىك بىلدىرگەن. سونداي-اق، ۆيسە-مينيستر ەكى ەل گەولوگيالىق قىزمەتتەرىنىڭ ارىپتەستىگى مەن زەرتتەلىپ جاتقان وڭىرلەردىڭ ءبىرىڭعاي گەولوگيالىق كارتاسىن جاساۋ ماقساتىندا گەولوگيالىق اقپاراتتارمەن الماسۋدى كۇشەيتۋدىڭ ماڭىزىن باسا ايتىپتى.

وتىرىستىڭ كۇن تارتىبىندە سونىمەن قاتار، ەكى ەل اراسىنداعى ارىپتەستىك جونىندەگى كوميتەت جۇمىسى جونىندەگى اقپاراتتاندىرۋ، ەكى ەل شەكاراسىنداعى ايماقتاردىڭ ءبىرىڭعاي كارتاسىن جاساۋ جوباسىن تالداۋ ماسەلەلەرى دە قارالعان. جيىندا ەكى ەلدىڭ گەولوگيالىق بارلاۋ كومپانيالارى مەن كاسىپورىندارىنىڭ حالىقارالىق كونگرەستەر مەن كەن-مەتاللۋرگيالىق سالا كورمەلەرىنە قاتىسۋ جايى دا پىسىقتالعان.

جۇڭگو تارابى قازاقستاندىق ارىپتەستەرىنە 2017 جىلدىڭ ءبىرىنشى جارتىسىندا گەولوگ ماماندارىن وقىتۋعا دايىن ەكەندىگىن، سونداي-اق، بەيجىڭ ۋنيۆەرسيتەتتەرىندە ءبىلىم الىپ جاتقان قازاقستاندىق ۇزدىك ستۋدەنتتەرگە قحر ۇكىمەتى اتىنان ستيپەنديا تاعايىندايتىندارىن ايتقان.

وتىرىس قورىتىندىسى بويىنشا قازاقستاننىڭ ينۆەستيسيالار جانە دامۋ مينيسترلىگى گەولوگيا جانە جەر قىرتىسىن پايدالانۋ كوميتەتى مەن قحر گەولوگيالىق قىزمەتى اراسىنداعى ارىپتەستىك تۋرالى مەموراندۋم قابىلداۋ جايى قاراستىرىلۋدا.

جومارت ابدوللا ۇلى