ءماجىلىس ءتوراعاسى نۇرلان نىعماتۋلين تمد پا جانە ۇقشۇ پا كۇزگى سەسسياسى اياسىندا سانكت-پەتەربوردا كورنەكتى قوعام جانە مەملەكەت قايراتكەرى، ۇلت-ازاتتىق جانە الاش قوزعالىسىنىڭ جەتەكشىسى، الاشوردا اۆتونوميالى ۇكىمەتىنىڭ ءتوراعاسى، پۋبليسيست، عالىم، اۋدارماشى، سەمەي وبلىسىنىڭ اتىنان   I مەملەكەتتىك دۋما دەپۋتاتى ءاليحان بوكەيحانوۆتىڭ ەسكەرتكىش ءمۇسىنىنىڭ اشىلۋىنا قاتىستى.  بۇل تۋرالى "قامشى" پورتالى ق ر پارلامەنتى ءماجىلىس اپپاراتىنىڭ باسپا ءسوز قىزمەتىنە سىلتەمە جاساپ حابارلايدى.

سالتاناتتى شارا تاۆريچەسكيي سارايىنداعى تمد پا شتاب-پاتەرىندە ءوتتى. ءدال وسى جەردە I مەملەكەتتىك دۋما جيىنى وتكىزىلگەن. نۇرلان نىعماتۋلين:

-ەكى ەل پرەزيدەنتتەرى نۇرسۇلتان نازاربايەۆ پەن ۆلاديمير ءپۋتيننىڭ سىندارلى جانە باتىل ساياساتىنىڭ ارقاسىندا بۇگىنگى كۇنى قازاقستان مەن رەسەي ەۋرازيالىق كەڭىستىكتە ينتەگراسيانىڭ قوزعاۋشى كۇشىنە اينالدى.  قازاقستان تاۋەلسىزدىگىنىڭ 25 جىلدىعى قارساڭىندا وسى ەسكەرتكىشتىڭ اشىلۋىنىڭ ماڭىزى ەرەكشە. وسى ۋاقىتتار ىشىندە ءبىزدىڭ ەلدەرىمىز تمد كەڭىستىگىندە ستراتەگيالىق جانە وداقتاس ارىپتەستىكتىڭ جارقىن ۇلگىسىن كورسەتىپ كەلەدى،-دەدى.

ءا. بوكەيحانوۆتىڭ ءمۇسىنى تاۆريچەسكيي سارايىنىڭ اتريۋمىندا ورنالاستى. قولا ءمۇسىننىڭ بيىكتىگى 2 مەتردەن اسادى. ءمۇسىن قازاقستان پارلامەنتى دەپۋتاتتارى جيناعان قارجىعا جاسالدى.

ايتا كەتەيىك، وسى جىلى ءا. بوكەيحانوۆتىڭ تۋعانىنا 150 جىل تولادى. مەرەيتوي   يۋنەسكو كولەمىندە اتالىپ وتپەك. ءاليحان بوكەيحان 1866 جىلى 5 ناۋرىزدا دۇنيەگە كەلگەن. ومبى تەحنيكالىق ۋچيليششەسىن اياقتاعان سوڭ، سانكت-پەتەربۋرگتەگى ورمان ينستيتۋتىنا وقۋعا تۇسكەن.