ماريا ەسەنگەلدينا 25 قازاندا Sulpak دۇكەنىنىڭ قوستانايلىق فيليالىندا ساتىپ العان  iPhone جارىلىپ كەتكەن دەپ حابارلايدى tengrinews.kz. 

"ەڭ باستىسى مەنىڭ ءسابيىم زارداپ شەگۋى مۇمكىن ەدى. ول قاسىمدا بولعاندا نە ىستەر ەدىم، ءتىپتى بىلمەيمىن. مەن بىرەۋگە قوڭىراۋ شالىپ جاتقانىمدا جارىلعاندا نە بولار ەدى؟ مەن وندا قۇلاقسىز نە كوزسىز قالار ەدىم!"، - دەيدى قوستاناي تۇرعىنى.

ەسەنگەلدينا تەلەفوننىڭ جارىلعان ءساتىن ۆيدەوعا ءتۇسىرىپ الماعانىنا وكىنەدى. تەلەفون نەسيەگە الىنعان جانە قۇنى 250 مىڭ تەڭگە ەكەن. وسىدان كەيىن ول اقشانى قايتارىپ الۋ ءۇشىن زاڭگەرلەردىڭ كومەگىنە جۇگىنىپ، دۇكەنگە بارعان، الايدا دۇكەن اكىمشىلىگى كەپىل مەرزىمى ءبىر جىل ەكەنىن ايتىپ، ەشقانداي دا اقشا قايتارىلمايتىنىن ايتقان. سوعان اشۋلى ماريا "قاجەتتى قۇجاتتاردىڭ بارلىعىن كورسەتتىم، بۇل ماسەلەمەن زاڭگەرلەر اينالىسسىن. ءبىر جىل جانە ءبىر اي عانا جۇمىس ىستەيتىن تەلەفون بولعانى ما سوندا؟" دەيدى.

ەسەنگەلدينانىڭ زاڭگەرى دميتريي گوربۋنوۆتىڭ ايتۋىنشا، كەپىل مەرزىمى ءوتىپ كەتسە دە اقشانى قايتارۋعا بولادى، تەك تەلەفوننىڭ وزدىگىنەن جارىلىپ كەتكەنىن دالەلدەۋ قاجەت. قازىرگى ۋاقىتتا سوت-مەديسينالىق ساراپتاماسى ءجۇرىپ جاتىر.

سونىمەن قاتار، "ارەنا S" ج ش س PR جانە جارناما دەپارتامەنتىنىڭ ديرەكتورى الەكساندر جۋرلوۆ Tengrinews.kz تىلشىسىنە تەلەفوندى ول ازاماتقا اۋىستىرىپ بەرەتىنىن ايتتى. اقشالاي بەرىلمەيدى، مۇنداي جاعداي ءبىرىنشى رەت بولىپ وتىر، سوندىقتان دا ءبىزدىڭ كليەنتىمىز بولعانىن ەسكەرە وتىرىپ، ونىڭ تەلەفونىن اۋىستىرىپ بەرەمىز. اقشالاي قايتارامىز با، ورنىنا تەلەفون بەرەمىز بە - ءوز ەركىمىزدە"، - دەدى جۋرلوۆ.