تاۋەلسىزدىك كۇنىنە وراي بارلىق وبلىستاردا مەملەكەتتىك قىزمەتشىلەرگە جەرگىلىكتى بيۋدجەت ەسەبىنەن سىياقى بەرىلىپ جاتقانى بەلگىلى. بۇل يگى شارا وڭتۇستىك قازاقستان وبلىسىندا دا جالعاسىن تاۋىپ جاتىر. ءبىراق تۇركىستاندىق مۇعالىمدەر وسى ورايدا ءبىر نارسەنى تۇسىنبەي وتىر دەپ جازادى www.nur.kz.
«وتكەن اپتادا تۇركىستان قالاسىنداعى مەكتەپ مۇعالىمدەرىنە «پرەميا» دەپ 25 مىڭ تەڭگەدەن بەرىلدى. مۇعالىمدەر قۋانىپ، العىستارىن ايتا-ايتا اقشالارىن الادى عوي. كوپ ۇزاماي جەلتوقسان ايىنىڭ جالاقىسى از بولىپ بەرىلگەن. سەبەبىن سۇراستىرسا: «ول «پرەميانى» سەندەرگە اۆانس رەتىندە بەردىك. سوندىقتان ايلىقتان ۇستاپ قالدىق» دەگەن جاۋاپ الىپتى. بۇل تۇركىستانداعى بارلىق مەكتەپتە بىردەي بولعان جاعداي. ءبىراق مۇعالىمدەر جۇمىستان قۋىلامىز نەمەسە باسقالاي زيانى ءتيىپ كەتەدى دەپ، شاعىمدانۋعا قورقادى. نەگىزى مۇعالىمدەر وسى كۇنگە دەيىن ايلىقتارىن اۆانس ەتىپ ەكىگە ءبولىپ العان ەمەس. بىزدە ورتالىقتاندىرىلعان بۋحگالتەريا، ياعني جالاقىنى بارلىق مەكتەپكە قالالىق ءبىلىم بولىمىندەگى ەسەپشى اۋدارادى. ولاردىڭ سىياقى دەپ اقشا اۋدارىپ، ونى جالاقىدان ۇستاپ قالۋى قانشالىقتى زاڭدى؟» – دەگەن حابار كەلىپ ءتۇستى رەداكسياعا.
بۇل ماسەلەنىڭ انىق-قانىعىنا كوز جەتكىزۋ ءۇشىن باسىلىم تىلشىلەرى تۇركىستان قالالىق ءبىلىم ءبولىمىنىڭ باسشىسى بەكارىس شويبەكوۆكە حابارلاسقان بولاتىن.
«تۇركىستاندا 73 مەكتەپ، 6 مىڭداي ءمۇعالىم بار. مۇعالىمدەرگە سىياقى بەرۋ ماسەلەسى ەندى قاراستىرىلىپ جاتىر، ءالى تولىق شەشىلگەن جوق. ايلىقتى دا، «پرەميانى» دا ەندى جىبەرەمىز»، – دەپ قىسقا قايىردى ول ءمان-جايدى ەستىگەننەن كەيىن.
سوندا التى مىڭ ادامنىڭ العانى اۆانس پا، سىياقى ما؟ ءبىلىم ءبولىمى جەلتوقسان ايىنىڭ جالاقىسىن ءالى اۋدارماعان بولسا، الگى 25 مىڭ تەڭگەنى قاي ايدىڭ جالاقىسىنان ەسەپتەگەن؟ بۇل جاعى تۇسىنىكسىز قالىپ قويۋدا.
