وسىدان 25 جىل بۇرىن كوك بايراعىن جەلبىرەتىپ، الەم تاريحىندا تاۋەلسىز قازاقستان مەملەكەتى پايدا بولدى. شيرەك عاسىرعا جۋىق ۋاقىت ىشىندە قازاقستان داڭعىل دامۋ جولىندا الدىڭعى قاتارلى ەلدەرمەن تەرەزەسى تەڭەسەتىندەي يگى ىستەر اتقارىپ، الەمدىك ارەنادا ويىپ تۇرىپ ءوز لايىقتى ورنىن الدى. مەملەكەتىمىز بۇنداي اۋىز تولتىرىپ ايتارلىقتاي جەتىستىككە ۇلت پەن ۇلىستىڭ تاتۋلىعى، دەموكراتيانىڭ بەرىك نەگىزدەرى مەن وتانداستارىمىزدىڭ جانقيارلىق ەڭبەگى، سونداي-اق «ەلىم» دەپ ەمىرەنە قىزمەت ەتكەن ەسىل ەرلەردىڭ ەرەن ەرلىكتەرى ارقاسىندا قول جەتكىزدى.
ەل تاۋەلسىزدىگىن جۇرتپەن قاتار ۇلتتىق ۇلاننىڭ «وڭتۇستىك» وڭىرلىك قولباسشىلىعى دا ەرەكشە اتاپ ءوتتى. قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي وتكەن مەرەكەلىك شارا قازاقستان رەسپۋبليكاسىنىڭ مەملەكەتتىك گيمنىن ورىنداۋدان باستالدى. بارشا اسكەري قىزمەتشىلەردىڭ كەۋدەلەرىنىڭ جۇرەك تۇستارىنا وڭ قولدارىن قويىپ بىرلەسە شىرقاعان گيمن اۋەنى پاتريوتىق اۋەزگە تۇنىپ تۇردى.
كەڭ اۋقىمدا وتكەن شارادا «وڭتۇستىك» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى پولكوۆنيك سابىرجان سۇلەيمەنوۆ بايانداما جاساپ، تاۋەلسىزدىك جىلدارىنداعى قازاقستان رەسپۋبليكاسىنىڭ جانە ۇلتتىق ۇلاننىڭ جەتكەن جەتىستىكتەرىن ايتىپ ءوتتى. ءوز سوزىندە ول: «تاۋەلسىزدىك – ءبىزدىڭ باستى قۇندىلىعىمىز، باعا جەتپەس بايلىعىمىز. تاۋەلسىزدىكتىڭ ارايلى تاڭى اتقان شاقتا اسكەري قۇرىلىمدار اراسىندا العاشقى بولىپ ىشكى اسكەر، قازىرگىشە ۇلتتىق ۇلان اسكەرى قۇرىلىپ، ەگەمەندى ەلدىڭ بەرىك قورعانىنا اينالدى. قازىرگى ۋاقىتتا ۇلاندىق جاۋىنگەرلەر بەيبىت كۇندە دە ەرلىككە ورىن بارىن دالەلدەدى. حاس جاۋىنگەرلەر ەربول وتاربايەۆ، جاندوس بايانبايەۆ، سىرىم سۇندەتوۆ جانە كۇنى كەشە عانا ەلباسىنىڭ قولىنان ءۇشىنشى دارەجەلى «ايبىن» وردەنىن العان باحتيار قايىربەكوۆ، سونىمەن قاتار «حالىق قاھارمانى» جوعارعى مەملەكەتتىك اتاعىنا يە بولعان پولكوۆنيك قايرات ۇمبەتوۆتىڭ جانقيارلىق ەرلىكتەرى ەل ەسىندە. ۇلاندىق جاۋىنگەرلەر قاشان جانە قاي كەزدە دە بولسىن تۇراقتىلىق پەن تىنىشتىق ورناعان «ماڭگىلىك ەلدىڭ» ماڭگىلىك قورعاۋشىسى بولا بەرمەك» دەپ بايانداماسىن تۇيىندەي كەلە، بارشا قازاقستاندىقتاردى ءتول مەرەكەمەن تەبىرەنە قۇتتىقتادى.
«وڭتۇستىك» وڭىرلىك قولباسشىلىعىنىڭ بارلىق جەكە قۇرامى، ۇلتتىق ۇلان ارداگەرلەرى جانە اسكەري قىزمەتشىلەردىڭ وتباسى مۇشەلەرى قاتىسقان ءىس-شارا بارىسىندا ۇلتتىق ۇلان باس قولباسشىسىنىڭ جانە «وڭتۇستىك» وڭىرلىك قولباسشىلىعى قولباسشىسىنىڭ جەكە قۇرامدى كوتەرمەلەۋ تۋرالى بۇيرىقتارى وقىلىپ، جاۋىنگەرلىك قىزمەت اتقارۋدا ۇزدىك قىرىنان كوزگە تۇسكەن اسكەري قىزمەتشىلەر گراموتالارمەن، كەۋدە بەلگىلەرمەن جانە باعالى سىيلىقتارمەن ماراپاتتالدى. اسكەري قىزمەتشىلەرگە ماراپاتتاردى «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور الىبەك سەرالييەۆ جەكە ءوزى تابىس ەتتى.
اتاپ وتەرلىگى، بۇل كۇنى قازاقستاننىڭ مادەنيەت قايراتكەرى، ەلگە تانىمال پروديۋسەر، ءارى ءانشى، كومپوزيتور ارمان دۇيسەنوۆتىڭ جەتەكشىلىگىمەن رەسپۋبليكالىق «گۇلدەر» ءان-بي ءانسامبلى ۇلاندىقتارعا ارناپ مەرەكەلىك كونسەرت سىيلادى.
«ەلىم – دەيتىن ەر بولماسا، ەرىم – دەيتىن ەل قايدان بولماق» دەمەكشى، قازاقستان رەسپۋبليكاسىنىڭ تاۋەلسىزدىك جىلدارىنداعى قالىپتاسۋى مەن نىعايۋى جولىنا، ءھام قاۋىپسىزدىگىن قامتاماسىز ەتۋ مەن ەلدىڭ بىرلىگىن ساقتاۋ جولىنا ۇلتتىق ۇلاننىڭ ايبىندى جاۋىنگەرلەرى قاشان دا ءوز ۇلەستەرىن قوسىپ كەلەدى جانە دە قوسا بەرمەك!
