مۇحامەدجان تازابەك ءوزىنىڭ جەلىدەگى پاراقشاسىندا ەلىمىزدى تاۋەلسىزدىگىمىزدىڭ 25 جىلدىعىمەن قۇتتىقتاپ، سونىمەن قاتار قازىرگى ۇرپاقتىڭ كەيبىر ىس-ارەكەتتەرى جايلى شىندىقتى اشىنا جازادى. 

"اتتان" دەگەن ايعايدان ازا بويى قازا بولعان xالىقپىز. قاپيادا جاۋ شاۋىپ، التىن باستار اتتىڭ قانجىعاسىندا كەتكەن ۋاقىتتارعا تاريx كۋا. بەس قارۋىن بوساعادا ۇستاپ، "اتتان"، "جاۋ جاپتى"، دەگەندە، دالاعا دامبالشاڭ جۇگىرىپ شىعىپ، بەلدەۋدەگى اتقا جايداق ءمىنىپ، جانتالاسقان تۇندەر بابالارىمىزدىڭ قانشاما باقىتىن ۇرلاعان ەدى. ارقا سۇيەر ەرىنەن ايىرىلىپ، اسىقتى جىلىكتەي ۇلىنان ايىرىلىپ، جاۋدىڭ قانجىعاسىنا بوكتەرىلىپ كەتكەن قانشاما انالارىمىزدىڭ كوز جاسى، كوڭىل شەرى كارى تاريxتىڭ القىمىندا وكسىك بوپ تىعىلىپ تۇر. اياقتار شاشىلعان سۇيەككە ءسۇرىندى، اسپاندى بوزداعان داۋىستار كەرنەدى. "اش وتىرساق تا، ازات بولساق ەكەن، از ۇيىقتاساق تا، تىنىعىپ تۇرساق ەكەن" دەگەن ارمان، اق سۇتپەن قانىمىزعا دارىپ، زارلى تىلەكپەن جۇرەگىمىزگە سىڭىرىلگەن ەدى. وشكەن جاندى، ولگەن ءتىرىلدى. باباڭ قۋاندى، بالاڭ تۋ الدى. تارىلعان پەيىلدەر تاۋبەگە كەلىپ، الاۋىزدىقتى اۋىزبىرشىلىك جەڭىپ، اق تۇيەنىڭ قارنى جارىلعان كۇنگە دە جەتتىك. تاۋەلسىزدىك الدىق. قۋاندىق. قومداندىق. 
قانداستارىمىزدى قاسىمىزعا الدىرتىپ، قازانىمداعى اسپەن بولىستىك. جۇگىرە جونەلەيىك دەسەك، جىلىك مايىمىز جىڭىشكەرگەن ەكەن. تۇرا ۇمتىلايىق دەسەك، تىزەمىزگە تۇز ۇيمەلەگەن ەكەن. كوڭىل كوپ نارسەنى قالاعانمەن، بۇلشىق ەت باعىنباي اۋرە قىلعانداي. جۇزدەگەن جىلدار قامىت قاجاپ، قامشى وسىپ، سىڭىرگە ىلىنگەن سۇيەگىڭ قالعان ەكەن. "وسەك ايتۋدى - پىكىر ءبىلدىرۋ" دەپ، "ساتقىندىقتى -شىنايىلىعىم" دەپ تۇسىنەتىن رەڭىڭ عانا قالعان ەكەن. سانىڭ دا سەلدىرەپ، ساپاڭ دا سۇيىلىپ، ساڭلاق بابالاردىڭ سالماقسىز ۇرپاعى بوپ تۇر ەكەنبىز. بەسىكتەن ادام شىعارا الماي، ەسىكتەن مامان شىعارا الماي ساسقان جۇرت سابىرىنا سۇيەنىپ، اقىرىن بولسا دا العا جىلجىپ بارادى. ەل باستار ەر تۋعان ەكەنبىز، ابدىراساق تا، اداسقان جوقپىز، دابىرلاساق تا، داۋلاسقان جوقپىز. سوعىستى ۇمىتا باستادىق، سوعىس كورگەن سوڭعى تۇياقتار دا "كەلمەستىڭ كەمەسىن كۇتىپ، جاعادا تۇر"... 
ءبىز ەلدىگىمىزدى العان كەزدە دۇنيەنىڭ ديدارى قۇبىلىپ تۇر ەكەن. مەملەكەتتىك شەكاراڭ شەگەندەلگەنمەن، اقپاراتتىق شەپتىڭ ىرگەسى ءتۇرىلىپ تۇر ەكەن. اۋزى قيسىق بولسا دا الپاۋىت ەلدەردىڭ ايتقانى بولىپ، ءالسىز ەلدەر الەمدىك قاۋىمداستىقتا پايدالى شەشىمگە سىلەكەيى اعىپ، "زياندى شەشىم" مەن "وتە زياندى" شەشىمنىڭ بىرەۋىن عانا تاڭداۋعا قۇقىلى ەكەنىن ءتۇسىنىپ، بويسۇنعان xالدە بويىن تۇزەۋدە...
قارۋ ۇستاعان قارسىلاسىمىز جوق، قالام ۇشتاعان پەندەلەر ميىڭا ەگەلىك قىلىپ، جۇرەگىڭە ءامىر ەتكەلى ءجۇر ەكەن. ۇلتتىق مەملەكەت قۇرامىز دەپ ەك، الەم جاھاندانىپ جاتىر ەكەن، مادەنيەتتەر ميداي ارالاسىپ، كوكىرەك كوزدەرى وتارلانىپ جاتىر ەكەن. انا ءتىلدى ۋايىمداپ جۇرگەندە، انا بولعىسى كەلمەيتىندەر پايدا بولىپتى، پەرزەنتىن دالاعا لاقتىرىپ، وبال-ساۋاپقا سەنبەيتىندەر پايدا بولىپتى. اتا ءدىندى ۇيرەنسەك دەپ جۇرگەندە، اتا ءداستۇردى "كازاxسكي پريكول" دەپ ءاجۋالاپ، "ينتەرنەت-شەيxتارعا" يەك ارتقان، جۇرەگى بۇلىك، جۇرگەن جەرى بىلىق شەرمەندەلەر پايدا بولىپتى. جۇرتتىڭ كوبى پەرزەنتىن پاراساتتى بولۋعا ەمەس، پىسىق بولۋعا بەيىمدەي باستاپتى. جوعارعى وقۋ ورىنىن بىتىرسە جولى بولادى دەپ، ەلدەن ەرەكشە قوڭى بولادى دەپ، ءبىلىمدى بولعانىنا ەمەس، ديپلومدى بولعانىنا مۇددەلى اتا-انا كوبەيىپتى. "جۇرت باسقارىپ، ەل بيلەمەك" قابىلەتى بار ما، جوق پا، پايىمداپ كورمەي، بالاسىن بيلىككە يتەرمەلەپ، ەڭسەلى ەسىكتەردى اشىپ، داليعان دالىزدەردە جۇرگەنىنە ريزا بولادى ەكەن. حالىقتىڭ قاقىسىن وزىنە ولجا سانايتىن، مەملەكەت مۇددەسىن تيىنعا ساتا سالاتىن جىمسيعان جىلتىر بەت، جىلان كوز جەمقورلار وسىدان كەپ پايدا بولادى ەكەن. ال ونى كورگەن جۇرت ىزا بولادى. ىزالى ەلدىڭ نازارىن اۋدارىپ، ىرزالىعىنا بولەنگىسى كەلەتىن، ايىر ءتىلدى، تىكەن جۇرەكتى "ءدىلمارلار" ينتەرنەت يىنىندە كۇتىپ وتىر. اتقارعان شارۋاسىن ادام بىلمەيتىن پەندەلەر تاۋسىلىپ سويلەپ، تاپسىنىپ پوست جازىپ، تانىمالدىققا ەگە بولدى. ءوز سالاسىندا وندىرگەنى كوپ، ونەگەسىمەن ورنەك سالعاندار جاققان كۇيە، جاپقان جالاعا اقتالىپ اۋرە. اللا ارنارسەنىڭ اقىرىن بەرسىن. ەڭ باستىسى - ەل امان، جۇرت تىنىش. "بۇدان جامان كۇنىندە دە تويعا بارعان" قازاقپىز. باردىڭ ءقادىرىن جوعالتقاندا ءبىلۋ ماقسات ەمەس. باسىمىزدا تۇرعان باقىتىمىز - تاۋەلسىزدىگىمىز باياندى بولسىن! 25 جىل - بىزگە كوپ، تاريx ءۇشىن تامشى. تامشىدان - تەڭىز، كەسەكتەن - تاۋ قۇرالادى. ءبىز كورگەن 25 جىل - جارقىن بولاشاقتىڭ، قۋاتتى مەملەكەتتىڭ، مارتەبەلى قاۋىمنىڭ ىرگەتاسى، باستاماسى بولعاي!