تۇركيالىق ءانشى ءارى كومپوزيتور ورحان چاكمان ەلباسى نۇرسۇلتان نازاربايەۆقا ءان ارنادى دەپ حابارلايدى NUR.KZ پورتالىنىڭ وڭىردەگى ءتىلشىسى.

ونەر يەسى تۇرىك تىلىندەگى بۇل تۋىندىسىن وڭتۇستىك قازاقستان وبلىسىنىڭ اكىمى جانسەيىت تۇيمەبايەۆتىڭ شاقىرۋىمەن شىمكەنتتە وتكەن شارادا قازاقتىڭ شاپانىن كيىپ ورىندادى.

ەل تاۋەلسىزدىگىنىڭ 25 جىلدىق مەرەكەسىنە وراي «وتىرار» كىتاپحاناسىندا وتكەن باسقوسۋدا «نۇرسۇلتان نازاربايەۆ» دەپ اتالاتىن ءاندى الدىمەن وقو اكىمى زيالى قاۋىم وكىلدەرىنە ارنايى تانىستىردى. ءبىر قىزىعى، جاڭا تۋىندى كىتاپشاعا ورنالاستىرىلعان. ياعني، شاعىن كىتاپشانى اشساڭىز، بەينەبايانى بار ءان وزدىگىنەن شىرقالادى.

«قازاقستاننىڭ رۋحى - نۇرسۇلتان نازاربايەۆ، ولكەنىڭ حالقى ءۇشىن، ءوزىنىڭ جانىن بەرگەن - نۇرسۇلتان نازاربايەۆ، حالقىنىڭ ەركىندىگىن، دۇنيەگە جاريالاعان - نۇرسۇلتان نازاربايەۆ» دەگەن ولەڭ جولدارىنان قۇرالعان تۇرىك تىلىندەگى ءاندى ورحان چاكمان كورمە ورتالىعىندا وتكەن «تاۋەلسىزدىك تۇعىرىم!» دەپ اتالاتىن سالتاناتتى شارادا جۇرتشىلىق الدىندا شىرقادى.

ارينە، بۇل شاراعا جينالعان قاۋىمنىڭ تاڭدانىسىن تۋدىردى. ولاردىڭ قاتارىندا وڭتۇستىك قازاقستان وبلىسىنىڭ بۇرىنعى اكىمى، ەلىمىزدىڭ قازىرگى اۋىل شارۋاشىلىعى ءمينيسترى - ۇكىمەت باسشىسىنىڭ ورىنباسارى اسقار مىرزاحمەتوۆ تە بار.

بۇل تۇركيادا تالاي جىل ەڭبەك ەتكەن تۇيمەبايەۆ مىرزانىڭ ەلباسىعا ارناعان توسىنسىيى بولدى. ايتا كەتەرلىگى، «تاۋەلسىزدىك تۇعىرىم!» شاراسىندا وبلىستان شىققان 42 ازامات «قۇرمەت» وردەنىمەن جانە تاعى دا باسقا مەدالدارمەن ماراپاتتالدى. ءبىلىم بەرۋ، دەنساۋلىق ساقتاۋ جانە مادەنيەت سالاسىنىڭ 110 مامانى تۇركيا ەلىندە تاجىريبە الماسۋ ءۇشىن ارنايى جولداماعا يە بولدى.