kazday.kz سايتىندا «پەرۆىي كانال كازاحستان» ارناسىنىڭ ەفيرىندە كورسەتىلگەن جالعان باعدارلاما جايلى پوزنەر پىكىر ءبىلدىردى» دەگەن ماتەريال جاريالاندى. «قامشى» پورتالى وقىرماندارىنا ماتەريالدىڭ قازاق تىلىندەگى اۋدارماسىن وقىرمان نازارىنا ۇسىنادى.
17 جەلتوقسان كۇنى «پەرۆىي كانال كازاحستان» ارناسىندا وتاندىق تەلەجۇرگىزۋشى ەلميرا شاۋكەنتايەۆا مەن جۋرناليست ۆلاديمير پوزنەردىڭ اڭگىمەسىنىڭ ءۇزىندىسى كەلتىرىلگەن باعدارلاما كورسەتىلگەن بولاتىن.
ەفيردە ديكتور «پەرۆىي كانال كازاحستاننىڭ» قىزمەتكەرىنىڭ بەرگەن جاۋابى سەنساسيالىق جاڭالىق ەكەنىن تىلگە تيەك ەتەدى.
سودان سوڭ «پوزنەر» باعدارلاماسى كورسەتىلەدى. پوزنەر شاۋكەنتايەۆاعا «ءسىز مەنىڭ شاقىرۋىمدى قابىل الدىڭىز. قابىلدايدى دەپ ويلاعان جوقپىن» دەپ سويلەيدى.
كادردە ەلميرا شاۋكەنتايەۆا پايدا بولادى. پوزنەر وعان «ءوزىڭىزدىڭ قانداي قىرىڭىزدى ۇناتپايسىز؟» دەپ سۇراق قويادى.
«قورقاقتىق. بۋلگاكوۆشە بۇل كەمشىلىكتەردىڭ ەڭ جامانى» دەيدى شاۋكەنتايەۆا.
ينتەرۆيۋ بار-جوعى ءبىر مينۋتقا سوزىلادى. ودان سوڭ ۇزىلەدى.
ارنادا كورسەتىلگەن بۇل جازبا عالامتوردا شۋ تۋعىزدى. سەبەبى رەسەيلىك "پەرۆىي كانالدىڭ" مۇراعاتىنا كىرسەك، شاۋكەنتايەۆانىڭ قاتىسۋىمەن مۇنداي باعدارلاما شىققان ەمەس. 19 جەلتوقسان كۇنى ارنانىڭ رەسمي سايتىندا پوزنەردىڭ ميحايل شەمياكينمەن اڭگىمەسىنىڭ انونسى عانا بار.
ەڭ باستىسى، پوزنەر شاۋكەنتايەۆانى نە ءۇشىن باعدارلاماسىنا شاقىرۋى كەرەكتىگى تۇسىنىكسىز.
ەفيردى كورگەن كورەرمەن شاۋكەنتايەۆا پوزنەردىڭ قوناعى بولدى دەپ ويلاپ قالدى. ارتقى فونعا سەنسەك، ول ستۋديادا وتىرعان سياقتى. الايدا پوزنەر دە، شاۋكەنتايەۆا دا بىرگە كورىنەتىن كادر جوق.
داۋ-دامايدىڭ انىق-قانىعىنا جەتۋ، اق-قارانىڭ جىگىن اجىراتۋ ماقساتىندا Kazday رەداكسياسى ۆلاديمير پوزنەرگە حابارلاسقان بولاتىن. رەداكسياعا حات تۇرىندە مىنانداي جاۋاپ كەلدى:
«بۇل باسىنان باستاپ اياعىنا شەيىن جالعان دۇنيە (فەيك). مىنا فەيككە قاراپ «پەرۆىي كانال كازاحستانداعى» اقپاراتتىڭ "شىنايىلىعىنا" كوز جەتكىزۋگە بولادى ەكەن. مۇنداي جەتىستىكپەن ەل پرەزيدەنتى نۇرسۇلتان نازاربايەۆ مىرزانى قۇتتىقتاعىم كەلەدى. ءوز تاڭ قالىسىمدى جاسىرا المايمىن، ۆلاديمير پوزنەر».
ايتپاقشى، بۇل «پەرۆىي كانال كازاحستاننىڭ» قىزمەتكەرلەرى ۇيىمداستىرعان العاشقى داۋ-داماي ەمەس.
