رەسەيدىڭ قىرىمعا كورسەتكەن باسقىنشىلىق ارەكەتى مەن ۋكراينانىڭ شىعىسىنداعى قارۋلى قاقتىعىس ءۇشىن  رەسەيگە سالىنعان سانكسيالاردىڭ مەرزىمى ۇزارتىلاتىن بولدى. بۇل اقپارات ەۋرو وداقتىڭ رەسمي جۋرنالىندا جارىق كوردى.

سانكسيانى 2017 جىلدىڭ 31 شىلدەگە دەيىن ۇزارتۋ تۋرالى شەشىم، ول جۋرنالدا جاريالانعاننان كەيىن كەلەسى كۇنى كۇشىنە ەنەدى. نەگىزىندە سانكسيانىڭ مەرزىمى 2017 جىلدىڭ قاڭتار ايىندا ءبىتۋى كەرەك ەدى. 

بريۋسسەلدە وتكەن سامميتتەن كەيىن، سانكسيانى ۇزارتۋ تۋرالى رەسمي ەمەس اقپارات شىققان. الايدا، ەشكىم ونى راستاماعان.

رەسەي شەنەۋنىكتەرى، كاسىپكەرلەرى، ساياساتكەرلەر مەن اسكەريلەرىنە قاتىستى جەكەلەنگەن سانكسيالار قىركۇيەك ايىندا ۇزارتىلعان. ناۋرىز ايىندا ونىڭ مەرزىمى بىتەدى. سانكسياعا ىلىككەندەرگە ءبىر جىل بويى ەۋرو وداققا كىرۋگە رۇقسات ەتىلمەيدى جانە ولاردىڭ ەۋروپالىق بانكتەردەگى شوتتارى توقتاتىلدى.

ەۋرو وداق  رەسەيگە قاتىستى العاشقى سانكسيالاردى 2014 جىلى كوكتەمدە ەنگىزگەن. ول قىرىمعا دەگەن باسقىنشىلىق ارەكەتىنە بايلانىستى سالىندى. سانكسيا نىسانى مەملەكەتتىڭ ءوزى ەمەس، بريۋسسەلدىڭ ويىنشا بولعان وقيعاعا قاتىسى بار جەكەلەنگەن ادامدار بولدى. ۋاقىت وتە كەلە ولاردىڭ ءتىزىمى تولىعا بەردى.

سونىمەن قاتار ەۋرو وداق رەسەيدىڭ ۋكراينا شىعىسىنداعى تەكەتىرەسىنە بايلانىستى قوسىمشا سانكسيا ەنگىزدى. بۇل جولى رەسەيلىك ەكونوميكا-قارجى، ەنەرگەتيكالىق جانە قورعانىس سالاسىنا سالىندى.

باتىس، دونباستاعى شيەلەنىستى ماسكەۋدەن كورەدى. ال رەسەيدىڭ ءوزى وعان ەشقانداي قاتىسى جوق ەكەنىن ايتادى.

رەسەي دە سانكسيا ەنگىزگەن ەلدەرگە قاتىستى  شەكتەۋ شارالارىن قابىلدادى. كەيبىر ەلدەردىڭ اۋىلشارۋاشىلىق ونىمدەرىن كىرگىزۋگە شەكتەۋ قويىلدى.