بانا ەسىمدى 7 جاسار قىز ءوزىنىڭ «Twitter» پاراقشاسىنا قىركۇيەك ايىنان باستاپ الەپپوداعى كۇندەلىكتى ءومىرىن جازىپ وتىرعان. الەپپوداعى جارىلىستار مەن قيىن جاعدايلاردى سۋرەتتەۋگە اناسى كومەكتەسكەن.
قىزى مەن اناسى جازبانى اعىلشىن تىلىندە جازدى. وندا ۆلاديمير پۋتين مەن باشار اسادتىڭ بومبالاۋىن اشكەرلەيتىن جازبالار دا بار. الايدا، رەسەيلىكتەردىڭ اراسىندا ونى باسقا بىرەۋ ادەيى جازىپ وتىر دەپ سىناعاندار دا بولدى. ەندى ءبىرى الەپپودا عالامتوردىڭ بارىنا كۇمان كەلتىردى. «Twitter»-دە «الەپپو حالقى تاماققا ءزارۋ بولىپ وتىرعاندا، تەلەفون مەن جارىقتى قايدان الىپ وتىر؟»، «تەلەفونىن قالاي قۋاتتايدى؟» دەگەن ساۋالدار كوپ قويىلعان. ماسەلەنىڭ انىق-قانىعىن ءبىلۋ ءۇشىن «Bellingcat» سايتىنىڭ جۋرناليستەرى زەرتتەۋ جۇرگىزدى. بانانىڭ پاراقشاسىندا جاريالانعان سۋرەتتەردىڭ بارلىعى شىعىس الەپپوداعى ءبىر اۋداندا تۇسىرىلگەنى بەلگىلى بولدى. ال ۇيالى تەلەفوندى ءۇيدىڭ شاتىرىندا ورنالاسقان كۇنمەن قۋاتتالاتىن اككۋمۋلياتور ارقىلى قۋاتتاپ وتىرعان. سونىمەن قاتار الەپپوعا عالامتور جۇرگىزىلگەنى دە بەلگىلى بولدى. بانانىڭ اناسى 3G نەمەسە wifi ارقىلى عالامتورعا كىرگەنىن ايتىپ بەردى. مۇنىڭ بارلىعى «Sept à huit» تەلەارناسىندا كورسەتىلدى.
ءقازىر بانا مەن ونىڭ اناسىنىڭ پاراقشاسىنا 300 مىڭنان اسا ادام جازىلعان. «Twitter»-دەگى جازبالارىنان كەيىن، بانا مەن ونىڭ وتباسى ءقاۋىپسىز جەرگە كوشىرىلدى.
نەبارى 7 جاسىندا بانا جان جاراسىمەن الەممەن ءبولىستى. سونىڭ ارقاسىندا وتباسىن ءقاۋىپتى ايماقتان شىعارا الدى. بۇعان دەيىن پاكىستاندىق مالالا يۋسۋفزاي 14 جاسىندا ءوزىنىڭ وقۋ قۇقىعى ءۇشىن كۇرەستى. سول ءۇشىن تاليبانداردىڭ تاراپىنان جازالاندى دا. ەشقانداي قارسىلىقتارعا قاراماستان مەكتەپكە بارىپ، ءبىلىم العان مالالا نوبەل سىيلىعىن الدى. ول نوبەل سىيلىعىنىڭ تاريحىنداعى ەڭ جاس لاۋرەات اتاندى.
قامشىگەر: اسەم المۇحانبەت
Difficult afternoon in East #Aleppo pic.twitter.com/OhIxcvZbZj
— Bana Alabed (@AlabedBana) 26 نويابريا 2016 گ.
