انكارادا بولعان ەلشىنىڭ ولىمىنەن كەيىن رەسەي مەن تۇركيانىڭ قارىم-قاتىناسى تۋرالى ساياساتتانۋشى الەكسەي مالاشەنكو ءوز ويىن ءبىلدىردى. ول جونىندە ب ا ق ءتۇرلى بولجام جاساپ جاتىر. ءبىرى فەتتۋللاح گۇلەن ۇيىمداستىردى دەسە، ەندى ءبىرى ءپۋتيننىڭ ۇستانىپ وتىرعان ساياساتى اندرەي كارلوۆقا زيانىن تيگىزدى دەپ ەسەپتەيدى.

كارنەگي ماسكەۋ ورتالىعى عىلىمي كەڭەسىنىڭ مۇشەسى الەكسەي مالاشەنكونىڭ ويىنشا رەسەي مەن تۇركيانىڭ قارىم-قاتىناسى نىعايادى. سەبەبى، پۋتين مەن ەردوعاننىڭ دا جاۋى ورتاق ەكەنىن ءتۇسىندى. ول ەكى ەلدى بىر-بىرىنەن الشاقتاتۋ ءۇشىن وسى ارەكەتكە باردى دەپ بولجايدى. ەگەر بۇل بولجامى راستالسا، تۇركيا مەن رەسەيدىڭ قارىم-قاتىناسى «ءبىر كۇندىك» ەمەس ەكەنىن بارىنشا دالەلدەۋگە تىرىسادى.

باق-دا ەلشىنىڭ ءولىمىن ۇيىمداستىرعانداردىڭ ارتىندا فەتتۋللاح گۋلەن تۇر دەپ بولجاپ جاتقاندار كوپ. اسىرەسە تۇرىكتىڭ مەملەكەتتىك ب ا ق اقش-تا تۇراتىن تۇرىك وپپوزيسيونەرى فەتتۋللاح گۇلەندى ادەيى ۇيىمداستىرعانىن جارىسا جازىپ جاتىر. ماسەلەن «Sabah» گازەتىندە «ەكى ەل اراسىنداعى قارىم-قاتىناس جاقسارا تۇسكەندە، ونى كورە المايتىندار لاس ويىندارىن ىسكە قوستى» دەپ جازسا، باسقا مەملەكەتتىك گازەت  ءۇش ەل اراسىنداعى وتە ماڭىزدى كەزدەسۋدىڭ الدىندا ادەيى ۇيىمداستىرىلدى دەپ حابارلايدى. الايدا ا.مالاشەنكو فەتتۋللاح گۇلەننىڭ قايراتكەرلىگىمەن جانە ەڭبەكتەرىن ەسكەرە وتىرىپ، بۇل ءولىمدى ۇيىمداستىرماعانىنا سەنىمدى.

ا.مالاشەنكو بىلاي دەيدى:  «قازىرگى كۇنى بايقاپ وتىرعانىمىزعا سۇيەنسەك، رەسەي وقيعانىڭ تۇرىكتىك نۇسقاسىن قابىلدايتىن سىندى. وندا، مىسالى، باق-تار شابۋىل جاساۋشىنى ءقازىردىڭ وزىندە شىلدە ايىندا ورىن العان توڭكەرىسپەن بايلانىستىرىپ وتىر. جەكە ءوز باسىم ونىڭ نە تۋرالى جازعانىن جانە ونىڭ ىس-قىزمەتىن بىلگەندىكتەن، ولىمگە فەتحۋللاح گيۋلەننىڭ الدەبىر قاتىسى بار دەگەن تۇجىرىمعا سەنبەيمىن. وعان مۇنىڭ ەش قاجەتى جوق، سەبەبى، ول تەرروريزمنىڭ  ىمىراسىز قارسىلاسى. تۇرىكتەر، البەتتە، وزدەرىنە قولايلى كەلەتىن كارتانى ويناتارى كامىل. بالكىم، بىرنەشە نۇسقا، سونىڭ ىشىندە گيۋلەنگە قاتىستى دا، قاراستىرىلۋى مۇمكىن. ەردوعانعا بۇل ءتيىمدى، ءبىراق، وعان ءالى باسقالار دا سەنۋى كەرەك قوي، ويتكەنى، بۇل گيۋلەننىڭ ءادىسى ەمەس. مەنىڭ ويىمشا، مۇندا جالعىز ادام، بولماسا، الدەبىر يسلاميستىك توپ ارەكەت ەتكەن. بىرەۋدى ناقتى اتاپ كورسەتۋ ءالى ەرتەرەك، سەبەبى، قاندى وقيعانىڭ ءار ءتۇرلى نۇسقالارى بار». 

فەتتۋللاح گۇلەننىڭ شتابى وعان تاعىلىپ جاتقان ايىپتار تۋرالى مالىمدەمە جاسادى. وپپوزيسيالىق ساياساتكەردىڭ شتابىندا، ايىپتاۋلار كۇلكىلى ەكەنىن ايتقان. «ول تەك قاۋىپسىزدىك شارالارىنىڭ ناشار ۇيىمداستىرىلعانىن اقتاپ الۋ ءۇشىن تاعىلعان ايىپ» دەدى ساياساتكەردىڭ كومەكشىسى الپا اسلاندوگان.

ال امەريكالىق «New York Daily News» اندرەي كارلوۆتىڭ ءولىمىن ادىلەتتىلىك ەكەنىن جانە ماقالا اۆتورى ەلشىنىڭ ولىمىنە ەش قايعىرمايتىنىن جازعان.  ونىڭ ويىنشا كارلوۆ لاس ساياساتتى ۇستانعان ەلدىڭ بەت-بەينەسى بولدى. ونى بۇعان دەيىن ءولتىرىپ كەتپەگەنىنە تاڭ قالاتىنىن دا جازعان. 

اندرەي كارلوۆتىڭ ولىمىنە قاتىستى تەرگەۋ جۇمىستارى جۇرگىزىلىپ جاتىر. ول ءۇشىن رەسەيدىڭ ارنايى قىزمەتى انكاراعا ۇشىپ كەلگەن بولاتىن.