ءبىزدىڭ ەلىمىزدەگى اقىلى جول ازىرگە «استانا-ششۋچينسك» باعىتىنداعى اۆتوبان عانا. شەتەلدىكتەر سالعان سوڭ با، وبالى نەشىك، بۇل جول جاز كۇندەرى ءالى جاقسى. ەكى جاققا دا كەتەتىن ءۇش جولاق - باعاسىن بىلگەن ادامعا تاماشا. الايدا وسى جولمەن قالاي ءجۇرۋدى بىلمەيتىندەر كوپ. وڭ جاقتاعى جول - جىلدامدىعى اقىرىنىراق اۆتوبۋس پەن جۇك ماشينالارىنا، ورتاڭعى جول جۇيرىك جەڭىل ماشينالارعا، سول جاقتاعى جولاق باسىپ وزاتىندارعا ارنالىپ، ۇنەمى بوس بولۋى كەرەك ەكەنىن بىلمەيتىندەر وسى ۇشەۋىنە كەزەك شىعىپ، قاي جولاق بوس بولسا سونىمەن ءجۇرىپ، اپاتتى جاعداي تۋدىرىپ جاتادى.
ەكى جىلدان بەرى اقىلى بولعان ونداعى جول ءجۇرۋ ەرەجەسى جاقسارا ءتۇسىپ، تازالىعى ارتا ءتۇسۋى كەرەك ەدى. وكىنىشكە قاراي كەرىسىنشە بولىپ تۇر. ءماجىلىس دەپۋتاتى ايقىن قوڭىروۆتىڭ ايتۋىنا قاراعاندا وندا مەتەورولوگيالىق جاعداي ناشارلاعان كەزدە جول اپاتتارى كوبەيىپ، ادام شىعىنىنا جول بەرۋ ءجيى ورىن الىپ تۇر. ونىڭ ءبىر سەبەبىن دەپۋتات «قازاۆتوجول» ۇلتتىق كومپانياسىنىڭ وسى جولعا قوجالىق ەتەتىن «اقىلى اۆتوموبيل جولدارى ديرەكسياسى» دەپ اتالاتىن فيليالىنىڭ جۇمىس سالعىرتتىعىنان كورەدى. اتالمىش كاسىپورىن وزدەرىنىڭ سايتىندا اقى الۋدىڭ شارتتارىن ەگجەي-تەگجەيلى جازىپ، سونىڭ ىشىندە ءتىپتى اپات بولعاندا جول جيەگىندەگى مۇلىكتەرىنە زاقىم كەلگەن بولسا، قوسىمشا اقى الۋدى ەسكەرتكەنىمەن وزدەرىنىڭ باستى مىندەتى – قىسى-جازى جولدىڭ تازالىعىن ساقتاۋدى كورسەتۋدى «ۇمىتىپ» كەتىپتى. جول اپاتىنىڭ ءوزى نەگىزىنەن جولدى قار باسىپ قالۋى مەن تۇز سەبىلمەگەن مۇزداقتىڭ (كوكتايعاقتىڭ) كەسىرىنەن بولىپ جاتقان جوق پا؟ ەسى-دەرتىن اقى الۋ عانا تەسكەندەر ونى كورگىلەرى كەلمەيدى ەكەن...
وسى ماسەلەلەردى ا.قوڭىروۆ باستاعان ءماجىلىس دەپۋتاتتارى پرەمەر-مينيستر ب.ساعىنتايەۆقا ءبىلدىرىپ، اقىلى جولدىڭ تازالىعىن قامتاماسىز ەتۋ كەرەكتىگىن ەسكەرتتى. پرەمەر قولعا السا بالكي، اقىلى جولدىڭ قاۋىپسىزدىگى ارتا تۇسەر دەگەن ءۇمىت بار.
س.ەلەۋ، ساراپشى.
