ءاليا سادىربايەۆا ەسىمدى «Facebook» قولدانۋشىسى ءوز پاراقشاسىندا حالىق قالاۋلىلارىنىڭ ىس-ارەكەتىن سىنعا الىپ، ولاردى زاڭ تۇرعىسىندا جازالاۋعا شاقىردى. ونىڭ جازباسى الەۋمەتتىك جەلى قولدانۋشىلارىنىڭ اراسىندا قىزۋ تالقىعا ءتۇستى.

 «مۇنى جازىقسىق قالدىرماۋ كەرەك! بۇل ادەتتەگى ىسكە اينالىپ بارادى...

الەۋمەتتىك جەلىدە قىزۋ تالقىلانىپ جاتقان ۆيدەونىڭ باستى قاھارمانى - حالىق قىزمەتشىسى، ق ر پارلامەنت ءماجىلىسىنىڭ دەپۋتاتى، «نۇر وتان» پارتياسىنىڭ مۇشەسى مۇحتار تىنىكەيەۆ.

بۇدان بۇرىن ق ر پارلامەنت ءماجىلىسىنىڭ ەكس-دەپۋتاتى سۆەتلانا رومانوۆسكايا كاسىپكەرگە «دەمالىسىن بۇزعانى ءۇشىن» قوقان-لوقى كورسەتكەن.

مەن دەپۋتاتتاردىڭ ىس-ارەكەتىنەن شوشىنعانداردىڭ ءبىرىمىن. بۇل ادامدار قازاقستاندا زاڭ قابىلدايدى. ولار ءبىزدى ءومىر سۇرۋگە ۇيرەتەدى. جوعارى مىنبەرلەردەن ادامگەرشىلىك، ۇيات، ار، رۋحانيات تۋرالى ايتادى.  ال اۋديو، بەينە جازبالاردان ولاردىڭ شىنايى ومىردە، بۇزاقىلىق قىلىقتارعا بەيىم، ادەپسىز، ەكى ءجۇزدى، تاربيەسىز ادامدار ەكەنىن بايقايمىز.

رەسپۋبليكالىق ارنالاردىڭ ءبىرى فەيك باعدارلامانى ەفيرگە شىعارا وتىرىپ، ءبىزدىڭ اقىماقتىعىمىزبەن، الاڭعاسارلىعىمىزعا سەنگەن سەكىلدى. ال ويىنا العاندارى ىسكە اسپاي، ادامدار نارازىلىعىن ءبىلدىرىپ، ولاردى كۇلكىگە اينالدىرعاندا بارلىعىن قالجىڭ دەۋدەن باسقا ەشتەڭكە ويلاپ تابا المادى. بۇل قالجىڭدارىمەن ولار قازاقستاندى ۇياتقا قالدىرعانىن ويلامادى.

ءدال سول سياقتى ءبىزدىڭ دەپۋتات، حالىقتىڭ قىزمەتشىسى م.تىنىكەيەۆتە كوپ باس قاتىرماي جۋرناليستەردىڭ بەينەگە قاتىستى پىكىرىن ءبىلۋ ءۇشىن حابارلاسقاندا، بارلىعى 2 جىل بۇرىڭعى قالجىڭ دەگەن ەدى. ءبىراق ول 2 جىل بۇرىن دا پارلامەنت دەپۋتاتى بولدى عوي! جاقىندا tengrinews.kz ۆيدەونىڭ 17.12.2016 جىلى ءتۇسىرىلۋى مۇمكىن ەكەنىن وقىدىم. ياعني، تىنىكەيەۆ مىرزا تەك قالجىڭباس قانا ەمەس، وتىرىكشى دە بولىپ تۇر ما؟

ەگەر پارتيا باسشىلىعى اتالمىش وقيعانى ەلەمەسە وتە وكىنىشتى بولار ەدى. سوندىقتان مەن پارلامەنت ءماجىلىسىنىڭ ءتوراعاسى نۇرلان زايروللاۇلىنا ءوتىنىش ايتقىم كەلەدى.

قۇرمەتتى نۇرلان زايروللا ۇلى! مەن قوعام قايراتكەرى، كوپ بالالى انا رەتىندە سىزدەن دەپۋتات تىنىكەيەۆكە قاتىستى شارا قولدانۋىڭىزدى سۇرايمىن. سەبەبى مۇنداي ادامدار ءوز قىلىقتارىمەن تەك ءوزىن عانا ەمەس، پارلامەنت پەن پارتيانى ۇياتقا قالدىرادى! قاجەتتى شارالاردى قولداناسىز دەگەن ۇمىتتەمىن. سەبەبى «نۇر وتان» پارتياسىنىڭ دەپۋتاتى بولۋ قۇرمەتىنە تەك شىنشىل ءارى ءادىل ادام عانا لايىقتى».