بىشكەكتە ەكى قىزدى ءۇيدىڭ جەرتولەسىندە كۇشتەپ ۇستاپ، جەزوكشەلىكپەن اينالىسۋعا ماجبۇرلەگەن دەپ حابارلايدى kloop.kg. ول بويىنشا قىلمىستىق ءىس قوزعالدى. ماماندار سوڭعى كەزدەرى جەزوكشەلىكپەن اينالىسۋعا ماجبۇرلەۋ بويىنشا وقيعالار جيىلەپ كەتكەنىن ايتادى. پوليسيانىڭ مالىمەتىنشە، قىزداردىڭ جاسى 16 جانە 18-دە.

قىزداردى جەزوكشەلىكپەن اينالىسۋعا ماجبۇرلەگەن 38 جاسار ايەلدىڭ بەس جاسار بالاسى بارىن ەسكەرىپ وعان قارايتىن ادام بولماعاننان كەيىن ءۇي قاماقتا وتىر. ايەلدىڭ باسقا دا قىلمىستىق ىستەرگە قاتىسى بار، جوعى تەكسەرىلىپ جاتىر.

قىزداردى «ارچا-بەشيكتەگى» جاڭا سالىنعان ۇيلەردىڭ بىرىندەگى جەرتولەدە ۇستاعان. كامەلەت جاسقا تولماعان قىزدى اتا-اناسى الىپ كەتتى.   ايىپتالىپ وتىرعان ايەل بۇرىن ءوزى دە جەزوكشەلىكپەن اينالىسقان ەكەن.

قىرعىزستاندا قىزداردى ءتۇرلى جولدارمەن قاقپانعا تۇسىرەدى. ولاردىڭ اراسىندا جالعىزباستى انالار، الدانعان ايەلدەر دە بار. كەيبىرىن ماجبۇرلەيدى. ەندى ءبىرى وقۋعا اقشا تاپقىسى كەلەدى.

ماماندار، 10-15 جىل بۇرىن جەزوكشەلىكپەن اينالىسقان ايەلدەر ەندى جاس قىزداردى ءينتيمدى قىزمەت كورسەتۋگە تارتاتىنىن ايتادى. رەسمي ەمەس اقپاراتقا سايكەس جەزوكشەلىكپەن اينالىساتىن ايەلدەردىڭ سانى 10 ەسەگە وسكەن.

«سەزىم» اتتى داعدارىس ورتالىعى قۇلدىققا تۇسكەن ايەلدەرمەن، الاياقتاردىڭ قۇرباندارىمەن جانە جەزوكشەلىكپەن اينالىسۋعا ماجبۇرلەگەن ايەلدەرمەن جۇمىس ىستەيدى. ورتالىقتى قۇرعان بۋبۋسارا رىسكۋلوۆا، اتالمىش سالامەن تۋىس قىزدارىن اينالىسۋعا ماجبۇرلەيتىن كەزدەر دە بولعانىن ايتادى.

بىشكەك قالاسىنىڭ ءىىب مالىمەتىنشە 173 سۋتەنەر مەن 3124 ءينتيمدى قىزمەت كورسەتەتىندەر  تىركەۋدە تۇر.

«ءار تەكسەرىستەن كەيىن ءبىز قىزداردى باسقارماعا الىپ كەلىپ، ساۋساقتارىنىڭ ءىزىن الىپ، فوتوعا تۇسىرەمىز» دەيدى ءىىب قىزمەتكەرلەرى.

ستاتيستيكالىق مالىمەتكە ساي، ءۆيچ-تىڭ 30%  ينتيمدىك قىزمەت كورسەتەتىن ادامدار تاراتادى ەكەن.