جۇرتتىڭ زەينەتاقى قورىنا قۇيعان قارجىسى تاعى ميللياردتاپ ۇرلانعان سىڭايلى! قۇزىرلى ورگاندار مەن ۇلتتىق بانك قىزمەتكەرلەرى بىرنەشە كۇننەن بەرى ءبىرىڭعاي زەينەتاقى جيناقتاۋ قورىن ءجىتى تەكسەرىپ جاتىر دەپ حابارلايدى ktk.kz. ولار مەكەمەنىڭ وزىنە تيەسىلى اكتيۆتەرىن قايدا سالعانىن انىقتاماق. بۇگىن ۇلتتىق بانك رەسمي مالىمدەمە جاساپ، تەك قوردىڭ اقشاسىن ساناپ جاتقاندارىن ايتتى. ال جەكە ازاماتتاردىڭ قۇيعان قارجىسىنا تەكسەرۋدىڭ ەش قاتىسى جوق دەپ سەندىرۋدە. دەسە دە، سالىمشىلاردىڭ 5 ميلليارد تەڭگەسى قولدى بولدى دەگەن دە اقپارات تاراپ جاتىر. 

ەلىمىزدە سوڭعى ايلاردا زەينەتاقى قورلارى بويىنشا ينۆەستيسيالىق تابىس ايتارلىقتاي تومەندەپتى. مۇنى ماماندار تەڭگەنىڭ قۇنسىزدانۋىمەن بايلانىستىرعان. الايدا، بار كىنا ۆاليۋتا باعامىندا ەمەس سەكىلدى. اقشانىڭ قايدا كەتكەنىن ەندى قۇزىرلى ورگاندار انىقتاۋى ءتيىس. ولار ۇلتتىق بانك وكىلدەرىمەن قوسىلىپ، ءۇش كۇننەن بەرى ءبىرىڭعاي زەينەتاقى جيناقتاۋ قورىن تەكسەرىپ جاتىر.تەكسەرىس نەگىزىنەن زەينەتاقى قورىندا مەنشىكتى اكتيۆتەردى ينۆەستيسيالاۋعا قاتىستى جاسالعان وپەراسيالار بويىنشا جۇرگىزىلۋدە. ال، جاعدايدىڭ جەكە ازاماتتاردىڭ جيناعىنا ەش قاتىسى جوق دەپ سەندىرۋدە ۇلتتىق بانكتەگىلەر.

«ءبىرىڭعاي جيناقتاۋشى زەينەتاقى قورىنىڭ مەنشىكتى اكتيۆتەرى ونىڭ كاپيتالى جانە شارۋاشىلىق قىزمەتىنىڭ ناتيجەلەرى ەسەبىنەن قۇرالادى. قور مەنشىكتى اكتيۆتەردى دەربەس باسقارادى. ال ازاماتتاردىڭ زەينەتاقى جيناقتارى "ءبىرىڭعاي جيناقتاۋشى زەينەتاقى قورىنىڭ" بالانسىنان بولىنگەن جانە بولەك ەسەپتەلەدى.»

نەگىزى زەينەتاقى قورىنداعى قارجىنىڭ قايدا قۇيىلىپ جاتقانىن ۇلتتىق بانك قاداعالاۋى ءتيىس. باس بانك وكىلدەرى جۇرتتى جۇباتپاق بولعانىمەن، كەيبىر اقپارات قۇرالدارى زەينەتاقى جيناقتارىنىڭ وڭدى-سولدى شاشىلعانىن ايتۋدا. ياعني، قوردان 5 ميلليارد تەڭگە قولدى بولعان كورىنەدى. قارجى التىن يگەرەتىن جەكە كومپانياعا ينۆەستيسيالاۋ ارقىلى جىمقىرىلعان دەگەن اقپارات تاراپ جاتىر. ەگەر بۇل دالەلدەنسە حالىقتىڭ اقشاسىن قالتاسىنا باسقانداردى جاپپاي جازالاۋ كەرەك دەيدى دەپۋتاتتار.

شاۆحات وتەمىسوۆ، ءماجىلىس دەپۋتاتى:

-تەكسەرۋ كەرەك. ول دەگەن ادامداردىڭ بولاشاعىن ويلاپ سالىپ قويعان اقشالارى. ولار بىرىنشىدەن ءتيىمدى پايدالانۋ كەرەك. ولار ساقتانۋى كەرەك. زاڭ بۇزۋشىلىققا جول بەرىلمەۋى كەرەك.

زەينەتاقى قورىنىڭ باسشىلىعى ۇرلانعان اقشا تۋرالى اقپاراتتى جوققا شىعاردى. ازىرگە قۇقىق قورعاۋشىلار دا مۇنداعى تەكسەرىسكە قاتىستى جاق اشىپ ەشتەڭە ايتپاي وتىر. ال، ۇلتتىق بانك تەك ءتىنتۋ بىتكەننەن كەيىن رەسمي تۇردە مالىمدەمە جاساماق.