رف قورعانىس مينيسترلىگىنىڭ ۇشاعى جەكسەنبىدە، 25 جەلتوقساندا تاڭعى ۋاقىتتا اپاتقا ۇشىرادى. لاينەردىڭ بورتىندا 92 ادام بولعان. ولاردىڭ ىشىندە، الەكساندروۆ اتىنداعى ءانسامبلدىڭ 68 مۋزىكانتى، باق-تاردىڭ 9 وكىلى ("زۆەزدا" تەلەارناسى، نتۆ جانە پەرۆىي كانال)، الىپ كەلە جاتقان 6 ادام جانە ەكيپاجدىڭ 8 مۇشەسى بار.

ريا نوۆوستي مالىمەتىنشە، تۋ-154 ۇشىپ شىققاننان كەيىن جەتى مينۋت وتكەندە اپاتقا ۇشىراعان. ۇشاق قارا تەڭىزدىڭ اناپا جاعالاۋىنا جاقىن ماڭدا قۇلاعان. لاينەردىڭ قيراندىسى ءبىر جارىم شاقىرىمعا شاشىلعان، ولار 50-100 مەتر تەرەڭدىكتە. وسىعان بايلانىستى 26 جەلتوقسان - رەسەيدە جالپىۇلتتىق قارالى كۇن بولىپ جاريالاندى.

ق ر پرەزيدەنتى نۇرسۇلتان نازاربايەۆ رف پرەزيدەنتى ۆلاديمير پۋتينگە تۋ-154 ۇشاعىنىڭ قۇلاۋىنا بايلانىستى كوڭىل ايتتى. «قازاقستان پرەزيدەنتى رەسەي فەدەراسياسىنىڭ قورعانىس مينيسترلىگى ۇشاعىنىڭ سوچي قالاسى ماڭىندا اپاتقا ۇشىراۋى سالدارىنان رەسەي ازاماتتارىنىڭ قازا بولعانى تۋرالى قايعىلى حاباردى زور كۇيزەلىسپەن قابىلدادى»، دەپ حابارلادى اقوردانىڭ باسپا ءسوز قىزمەتى.  سونداي-اق، حابارلامادا «نۇرسۇلتان نازاربايەۆ قايعىعا ورتاقتاسىپ، قازاقستان حالقىنىڭ جانە جەكە ءوزىنىڭ اتىنان قازا بولعانداردىڭ تۋىستارى مەن جاقىندارىنا، سونداي-اق بارشا رەسەي حالقىنا كوڭىل ايتتى» دەپ جازىلعان.

بۇگىن، قارا تەڭىزدەگى تۋ-154  ۇشاعىنان وپات بولعان 11 ادامنىڭ ءمايىتى قۇتقارۋ كەمەسىنىڭ بورتىنا  شىعارىلدى، دەپ حابارلادى "ينتەرفاكس» رەسەي قورعانىس مينيسترلىگىنە سىلتەمە جاساپ. ىزدەۋ جۇمىستارى جالعاسىپ جاتىر. تۋ-154 اپاتقا ۇشىراعان جەردەگى سۇڭگۋىرلەر توبىنىڭ سانى 109 ادامعا دەيىن كوبەيدى، ۇشاقتىڭ فيۋزەلياجىن جانە ءىرى سىنىقتارىن ىزدەۋ ءۇشىن سۋعا ءتۇسىرۋ باستالدى. رف قورعانىس مينيسترلىگىنىڭ حابارلاۋىنشا، ۆتا ۇشاعىمەن  ۇشقىشسىز باسقارىلاتىن  "ورلان-10" جەتكىزىلگەن. ول تاياۋ ۋاقىتتا  اۋەدەن سۋ استىنداعى جاعداي جونىندە مونيتورينگ جۇرگىزۋگە كىرىسەدى.

كەشە، الماتىلىقتار تۋ-154 ۇشاعىنىڭ اپاتقا ۇشىراپ، قازا تاپقانداردى ەسكە الۋ ءۇشىن رەسەي كونسۋلدىعىنا گۇل قويعان بولاتىن.