قازىرگى كۇنى كاسىپكەرلىكتى قولعا الىپ، شارۋاسىن دوڭگەلەتەمىن دەگەندەر ءۇشىن جان-جاقتى جاعداي جاسالعان. تىپتەن بىلمەي جاتساڭ، جەر-جەردە اشىلىپ جاتقان كاسىپكەرلەر مەكتەبىنە بارىپ وقىپ، بولاشاق بيزنەسىڭنىڭ جوسپارىن جاساپ الۋىڭا دا بولادى. سونداي ازاماتتاردىڭ ءبىرى – «اليقۇل اتا» شارۋا قوجالىعىنىڭ ءتوراعاسى فايزۋللا ءالىقۇلوۆ.

سايرام اۋدانى مانكەنت اۋىل وكرۋگىنە قاراستى اققالا اۋىلىندا ورنالاسقان «اليقۇل اتا» شارۋا قوجالىعىندا بولعانىمىزدا قايناعان تىرلىكتىڭ ۇستىنەن تۇستىك. ۇزىندىعى 150 مەترلىك ستاندارتتى قوس قورا مال بورداقىلاۋ ءۇشىن سالىنىپتى. جەم تاسىعان تراكتورلاردىڭ ءبىرى كىرىپ، ءبىرى شىعۋدا. قوجالىق باسشىسى فايزۋللا اعا اۋدان ورتالىعىنا جيىنعا كەتكەن ەكەن. ورىنباسارى ءدىلشات يۋنۋسوۆ  جۇمىس بارىسىمەن تانىستىردى. ايتىسىنا قاراعاندا مال بورداقىلاۋ ءۇشىن ۇكىمەتتەن 7 پايىزدىق جەڭىلدىكپەن نەسيە العان. سول قارجىعا «اقباس»، «سەمەنتال»، «گەرفورد» تۇقىمداس 420 بۇقا ساتىپ الىپ، بورداقىلاۋعا قويعان. ەرەكشە كۇتىمدى تالاپ ەتەتىن بۇقالاردىڭ كۇندەلىكتى جەم-شوبىن ۋاقىتىلى بەرۋدى تاجىريبەلى ماماندار ءاردايىم نازاردا ۇستاپ وتىرادى.

باعىمداعى بۇقالارعا كۇن سايىن سالماق قوسۋ ءۇشىن سىعىمدالعان ءشوپ پەن 700 كەلى جەنتەك جەم قايناتىلىپ بەرىلسە، اي سايىن 10 توننا شروت، 30 توننا  جەنتەك دەم، 30 توننا كەبەك جۇمسالادى ەكەن. بارلىق زووتەحنيكالىق تالاپتار ساقتالىپ، 4 اي باعىلعان بۇقالاردىڭ سالماعى 270-350 كەلىگە جەتكەندە ەتكە وتكىزىلەدى. ياعني ءار توقسان سايىن 130 توننادان ەسەپتەلگەندە، جىلىنا 520 توننا ەت وندىرىلەدى دەگەن ءسوز.

قازىرگى كۇنى بۇل شارۋاشىلىقتا 11 ادام جۇمىسپەن قامتىلعان. اۋىلدا سەمەي مالدارىگەرلىك-ۆەتەرينارلىق ينستيتۋتىن ءبىتىرىپ كەلگەن جوعارى ءبىلىمدى 22 جىل ەڭبەك ءوتىلى بار مالدارىگەرى ايدار ماليكوۆ پەن كومەكشىسى ۇلىقبەك بالتاحودجايەۆ ءوز ءىسىنىڭ  ناعىز شەبەرلەرى سانالادى. اتشاپتىرىم مال قورانىڭ اينالاسى تاپ-تازا، كولدەنەڭ جاتقان ءشوپ-شالام دا بايقالمايدى. بارلىق جەردە – تازالىق پەن ءتارتىپ. تالاپقا ساي بورداقىلانعان بۇقالار سايرامداعى قۇشقانادا سويىلىپ، ەتى الماتىعا جونەلتىلەدى. ويتكەنى،  «اليقۇل اتا» شارۋا قوجالىعى وندىرگەن ءتاتتى ەت وڭتۇستىك استانادا دا ۇلكەن سۇرانىسقا يە.

شاعىن عانا اققالا اۋىلىندا 3000 حالىق بار. جەرگىلىكتى تۇرعىندار نەگىزىنەن ەگىن ەگۋمەن، مال وسىرۋمەن اينالىسادى. قاراپ وتىرساڭ، بۇرىنعىداي بەيساۋات، جۇمىسسىز سەندەلىپ جۇرگەن ەشكىمدى كورمەيسىڭ. كەز كەلگەنى ءبىر-بىر كاسىپتى دوڭگەلەتىپ وتىر. دەمەك، ىنتا-جىگەر، نيەت بولسا قاي جەردەن دە جۇمىس تابىلادى.

ابدىمالىك بەلگىباي،

«وڭتۇستىك قازاقستان»