جاناربەك اقىبي ۇلى 1974 جىلى قاڭتاردىڭ 11 جۇلدىزىندا بايان-ولگەيدىڭ  ساقساي سۇمىنىندا تۋىلعان. 1990 جىلداردان باستاپ الپينيزممەن شۇعىلدانادى. موڭعول ەلىندەگى بارلىق مۇزارت شىڭدارعا ورمەلەگەن. 1996-2000 جىلدارى ۇلان-باتىرداعى جوو-دا «جاتتىقتىرۋشى جانە دەنەشىنىقتىرۋ ءپانىنىڭ ۇستازى» ماماندىعىن يگەرىپ شىققان .

ءقازىر ولگەي قالاسىندا جاس بۋىندارعا  ساباق بەرىپ، سپورتقا باۋلىپ ءجۇر.

 جاناربەك اقىبي ۇلى – كاۆكاز، تيان-شان، التاي تاۋ جوتالارىنىڭ اسقارالى شىڭدارىن باعىندىرعان حالىقارالىق دارەجەدەگى كاسىبي تاۋ سپورتشىسى. ول بايان-ولگەي ايماعىنداعى بالبال تاستار ورنالاسقان جەرلەردى جەتىك بىلەدى. سونداي-اق ودان دا ەرتەرەكتەگى بۇعى، سىم  تاستار  جانە 3000 جىلدىق تاريحى بار تاستاعى جازۋ-سىزۋلار دا وعان ەتەنە تانىس. سوندىقتان موڭعول ەلىنە كەلىپ، بابالار  مۇراسىن زەرتتەپ  جۇرگەن  عالىم، ستۋدەنتتەر، اۋەسقوي تاريحشىلار مەن جۋرناليستەر توبى جاناربەك اقىبيۇلىن جاقسى تانيدى. جاناربەك ءقازىر موڭعول ەلىنە الەمنىڭ 30-عا  تارتا مەملەكەتىنەن جيىلعان الپينيستەر ەكسپەديسياسىن باسقارىپ،  التاي شىڭدارىن باعىندىرىپ ءجۇر.

 ول موڭعوليا ۇكىمەتىنىڭ جوعارعى سىيلىعى «ەڭبەككە قۇرمەت» مەدالىنىڭ يەگەرى جانە  موڭعوليا حالىقارالىق  وليمپيادا كوميتەتىنىڭ، سپورت، ءبىلىم ءمينيسترىنىڭ ءارتۇرلى سىيلىقتارىمەن ماراپاتتالعان. بايان-ولگەي ايماعىنىڭ، ولگەي قالاسىنىڭ، سونداي-اق ءارتۇرلى جاستار ۇيىمدارىنىڭ «ەڭ تاڭداۋلى سپورتشىسى» اتاعىنىڭ بىرنەشە مارتە يەگەرى.