پولشانىڭ اۋىر اتلەتيكا فەدەراسياسى ءوزىنىڭ رەسمي سايتىندا شيمون كولەسكيدىڭ  94 كەلىگە دەيىنگى سالماقتا بەيجىڭدە 2008 جىلى وتكەن وليمپيادانىڭ جەڭىمپازى رەتىندە رەسمي مويىندالعانىن راستادى، - دەپ حابارلايدى tengrinews.kz ، Vesti.kz سايتىنا سىلتەمە جاساپ.

23 قاراشادا حالىقارالىق وليمپيادا كوميتەتى قازاقستاندىق يليا ءيليندى 2008 جانە 2012 جىلعى وليمپيادا ويىندارىنىڭ التىنىنان ايىرعانى حابارلانعان بولاتىن.

پولشانىڭ اۋىر اتلەتيكا فەدەراسياسىنىڭ مالىمدەمەسىندە كولەسكيدى وليمپيادا چەمپيونى رەتىندە مويىنداۋ تۋرالى شەشىمدى جارتى جىل كۇتۋ كەرەك بولعانى ايتىلعان. سونىمەن بىرگە، التىن جۇلدەنى سپورتشىنىڭ ءالى الماعانىن، ءبىراق، حوك پەن اۋىر اتلەتيكانىڭ حالىقارالىق فەدەراسياسى حاتتاماسىندا جەڭىمپاز رەتىندە كولەسكيدىڭ كورسەتىلگەنى دە حابارلاندى. 

"ارينە، بارلىعىن وسى جەتىستىكپەن قۇتتىقتايمىن، دەگەنمەن، وليمپيادانىڭ جۇلدەلەرى بىزگە وتە ءبىر تۇسىنىكسىز جاعدايدا كەلىپ جاتقانىن مويىنداۋ كەرەك. كىم بىلەدى، مۇمكىن، حالىقارالىق دوپينگكە قارسى اگەنتتىك (WADA)، حوك جانە IWF پروسەدۋرالارىنان كەيىن جۇلدەلەردى وزگەلەرگە تاراتىپ بەرمەي، دوپينگپەن ۇستالعانداردىڭ ورىندارىن "بوس" قالدىرعان دۇرىس بولار ما ەدى. ەندى سەگىز جىلدان كەيىن ريو-دە-جانەيروداعى جارىستار تۋرالى ءبىزدىڭ دە وسىنداي جاعدايعا تاپ بولىپ وتىرۋمىز مۇمكىن..." - دەلىنگەن پولشانىڭ اۋىر اتلەتيكا فەدەراسياسىنىڭ حابارلاماسىندا. 

ايتا كەتەيىك، 2004 جىلعى افيناداعى وليمپيادا ويىندارى كەزىندە 35 جاستاعى كولەسكي سپورت جولىندا ەكىنشى رەت دوپينگپەن ۇستالىپ، ءبىر جىلعا شەتتەتىلگەن بولاتىن.

ەسكە سالايىق، 23 قاراشادا قازاقستان رەسپۋبليكاسى ۇلتتىق وليمپيادا كوميتەتى حالىقارالىق وليمپيادالىق كوميتەتى تاراپىنان 2008 جانە 2012 جىلدارداعى وليمپيادا ويىندارىنا قاتىسقان قازاقستاندىق سپورتشى يليا يلينگە قاتىستى اعزاسىنان تىيىم سالىنعان پرەپاراتتاردىڭ ءىزى تابىلعاندىقتان، جازا قولدانىلعاندىعى تۋرالى رەسمي حابارلاما العان بولاتىن.

ال كەيىن قازاقستاننىڭ اۋىر اتلەتيكا فەدەراسياسى جۇلدەلەرىنەن ايىرىلعان يليا يلينگە بايلانىستى جاعداي تۋرالى مالىمدەمە جاساعان ەدى. 

مۇنىڭ الدىندا حوك سۆەتلانا پودوبەدوۆا، ءزۇلفيا چينشانلو مەن ماييا مانەزانى دوپينگ سىنىمىلارى راستالعاننان كەيىن 2012 جىلعى وليپيادانىڭ التىنىنان ايىرعان، ال ەركىن كۇرەس پالۋانى تايمۋراز تيگييەۆتى 2008 وليپيادانىڭ كۇمىس جۇلدەسىنەن ايىرىپ، الماس وتەشىوۆتىڭ ناتيجەسىن جويعان بولاتىن. كەيىن تاعى بەس سپورتشى ماريا گرابوۆەسكايا (75 كەلىدەن جوعارى كاتەگوريادا قولا مەدال العان)، اسەت مامبەتوۆ (96 كەلىگە دەيىنگى سالماقتا قولا مەدال العان)، ماييا مانەزا (تۋرنير باستالماي تۇرىپ، جارىستاردان شىعىپ قالعان)، يرينا نەكراسوۆا ("63 كەلىگە دەيىنگى سالماقتا كۇمىس مەدال ەنشىلەگەن) جانە ۆلاديمير سەدوۆتاردىڭ (85 كەلىگە دەيىنگى كاتەگوريادا ءتورتىنشى ورىن العان) جەتىستىگىن جويۋ مەن جارىستان شەتتەتىلەتىنى تۋرالى حابارلانعانبولاتىن.