جاپونياداعى ءىرى جارنامالىق قومپانيانىڭ پرەزيدەنتى ءوزىنىڭ قىزمەتكەرى وز-وزىنە قول جۇمساعان سوڭ، ءبىر جىلدان كەيىن جۇمىستان كەتۋگە نيەتتى ەكەنىن جەتكىزدى. قىز جۇمىس ۋاقىتىنان تىس ۇستەمە جۇمىس ىستەگەنىنە شىداي الماي، وز-وزىنە قول جۇمساعان.
جاپونياداعى Dentsu جارنامالىق كومپانيانىڭ باسشىسى تاداسي يسي ءوزىنىڭ قىزمەتتەن كەتەتىنىن مالىمدەدى. بۇل توكيو ۋنيۆەرسيتەتىنىڭ تۇلەگى، 24 جاسار قىزمەتكەرى ماتسۋري تاكاحاسي سۋيسيد جاساعان كەيىن دالمە-دال 1 جىل وتكەن سوڭ بولدى. قىز ءساۋىر ايىنان جۇمىسقا تۇرعاننان باستاپ، ءار اي سايىن جۇمىس ۋاقىتىنان تىس 100 ساعاتتان كوپ ۇستەمە جۇمىس ىستەپ كەلگەن. بۇل ەلدىڭ ەڭبەك زاڭناماسىن ورەسكەل بۇزۋ بولىپ تابىلادى. اقىر اياعىندا ول جۇمىستىڭ تىم كوپتىلىگىنەن تەرەڭ دەپرەسسياعا ۇشىراعان، ول ءوز تۆيتتەر پاراقشاسىندا ءولىم مەن ءۇشىن ەڭ باقىتتى ناتيجە دەپ جازىپ، ارتىنان تەرەزەدەن سەكىرىپ كەتكەن.
ءار جىل سايىن جۇزدەگەن جاپوندىقتار جۇمىستى تىم اسىرا ىستەۋدەن قايتىس بولادى. بۇل ەلدە «كاروسي» دەپ اتالادى. «كاروسيدىڭ» سەبەپتەرى ينسۋلت، ينفاركت پەن ءوز-وزىن ءولتىرۋ بولىپ تابىلادى، ال مىڭداعان ادامدار دەپرەسسيا مەن باسقا دا ومىرگە ءقاۋىپتى اۋرۋلاردىڭ قۇربانى بولىپ جاتادى. تاداسي يسيگە قاتىستى تەرگەۋ جۇمىستارى جۇرگىزىلىپ جاتىر – ونىڭ جۇمىستان كەتۋىنىڭ سەبەپتەرىنىڭ ءبىرى بولدى.
«جۇمىستا تىم كوپ ۇستەمە بولماۋ كەرەك، – دەدى ول جۋرناليستەرگە. – مەن جاۋاپكەرشىلىگىمدى سەزىنە وتىرىپ، بولعان وقيعاعا قاتتى وكىنەمىن. كومپانيا قىزمەتكەرلەرگە ءوز-وزىن تانىتۋعا كەدەرگى بولماۋ كەرەك، ءبىراق مەن بۇل ۇستەمە جۇمىس ماسەلەسىن شەشە الماعانىما جانە بەلگىلى ءبىر ستاندارتتى ورناتا الماعانىما وكىنەمىن».
ماتسۋري تاكاحاسي ءىسى قوعامدا كەڭ تالقىلاندى جانە سونى مىسالعا الا وتىرىپ، كوپتەگەن ادامدار «كاروسيعا» رەسمي تۇردە تىيىم سالىنعانىن جانە بۇعان جول بەرەتىن جۇمىس بەرۋشىلەردى جاۋاپكەرشىلىككە تارتقانىن قالايدى. ستاتيستيكا مالىمەتى بويىنشا، ءاربىر بەسىنشە جاپوندىق كومپانيا ۇستەمە جۇمىستى قولدانادى، بۇل ءوز كەزەگىندە قىزمەتكەرلەردىڭ ومىرىنە ءقاۋىپ تۋعىزادى.
