الماتى وبلىسىنىڭ حالىققا قىزمەت كورسەتۋ ورتالىعىندا ەر ادام قازا بولدى. وقيعا ىلە اۋدانىنداعى وتەگەن باتىر كەنتىندە بولعان دەپ حابارلايدى NUR.KZ.
Nur.kz رەداكسياسىنا رينات اۆازباكييەۆ ەسىمدى وقيعا كۋاگەرى حابارلاسىپ بولعان جايتتى باياندادى. ونىڭ ايتۋىنشا، قازا بولعان ەر ادامنىڭ جاسى 60-65 شاماسىندا. سونىمەن بىرگە ول شاعىمىن دا جەتكىزدى.
"كەزەكتە 100-گە جۋىق ادام تۇرادى. ءار ادامعا 20 مينۋت ۋاقىت كەتەدى دەگەن ۋادە ورىندالماعان. تىركەۋمەن تەك ەكى ادام عانا اينالىسىپ وتىر. بىرەۋلەر ءتىپتى سەنبىدەن بەرى تىركەلە الماي الەككە تۇسۋدە. سوعان قاراماستان، سونداعى "زاڭ وكىلدەرى" ايىپپۇل سالامىز دەپ قورقىتىپ ءجۇر"، - دەيدى ەر ادام.
الماتى وبلىسىنىڭ ءىىد 1957 جىلى تۋعان ىلە اۋدانىنىڭ تۇرعىنى قايتىس بولعانىن راستادى. قازىرگى ۋاقىتتا قۇزىرلى ورگاندار ەر ادامنىڭ ولىمىنە قاتىستى تەكسەرىس جۇرگىزىپ جاتىر. تولىق اقپارات كەيىنىرەك بەرىلەدى.
وسى ورايدا الماتى وبلىستىق ءىىد اۋداندىق پوليسيا بولىمشەسى جاڭا زاڭنامانى ءتۇسىندىرۋ جۇمىستارى بويىنشا ب ا ق وكىلدەرىمەن كەزدەسىپ، ۋاقىتشا تىركەۋگە قاتىستى حقكو-تارىندا كەلەڭسىز جاعدايلار تۋىنداماعانىن ايتقان.
ەستەرىڭىزگە سالا كەتسەك، ۋاقىتشا تىركەۋ تۋرالى زاڭدى ەلىمىزدە 7 قاڭتاردان باستاپ ەنگىزدى. ال تىركەلمەگەن ازاماتتارعا 2017 جىلدىڭ 1 اقپانىنان باستاپ ايىپپۇل سالىنا باستايدى.
ۋاقىتشا تىركەۋگە تۇرعىلىقتى جەرى بويىنشا تىركەلمەگەن ادامدار تۇرۋى قاجەت. ىشكى كوشى-قون ماسەلەلەرىن باقىلاۋدى ۋچاسكەلىك پوليسياعا جۇكتەپ وتىر. زاڭ بۇزۋشىلاردى ولار بۇرىننان كەلە جاتقان ۇيرەنشىكتى ادىس-تاسىلدەرمەن انىقتايدى.
