قازاق پوەزياسى تاعى ءبىر اۋىر قازاعا ۇشىرادى. 25 قاڭتار كۇنى قىتايداعى قانداستارىمىز اراسىنداعى تانىمال اقىن، قابىرعالى قالامگەر زاداقان مىڭباي ومىردەن ءوتتى.

زاداقان مىڭبايۇلىن – قازاق پوەزياسىنىڭ، قازاق ونەرىنىڭ اتانى، قازاق ادەبيەتىنىڭ، قازاق قارا ولەڭىنىڭ جۇگىن كوتەرگەن اتانى.   زاداحاننىڭ قايتىس بولۋىمەن شىڭجاڭ قازاق ادەبيەتىنىڭ، XX عاسىردىڭ سوڭىندا كەلگەن پوەزيانىڭ ءبىر ءداۋىرى اياقتالدى. ول پوەزياسىنىڭ ءبىر كەزەڭىنىڭ باستى وكىلى ەدى. وزىندىك بيىگى، ايرىقشا ليريكالىق سارىنى بولعان.

زاداقان مىڭباي ومىرگە ەكى رەت كەلگەن، ەكى رەت ءومىر سۇرگەن ادام. ول سارىۋىز بالاپان كەزدە ون التى، ون جەتى جاسىندا "قازاق كۇزەتشى "ۇيىمىنىڭ مۇشەسى دەپ ايىپتالىپ 50-جىلداردىڭ سوڭىندا بارسا كەلمەسكە - تارىمعا ايدالعان. جاننىڭ سىرىلىگىمەن، شوي تاباندىلىعىمەن، ومىرگە دەگەن قۇشتارلىعىمەن سول تارىمنىڭ وزىندە وت باسىن قۇرىپ ءوسىپ-ونىپ كوكتەدى. ونداعى ونىڭ ارمانى تارباعاتايعا، اتامەكەنگە، قۇلىستايعا امان ورالۋ عانا بولعان ەدى. تارىمعا بارعان 3000-نان استام بوزداقتىڭ امان قايتقان 700 ادامنىڭ ىشىندەگى بىرەۋى زاداقان ەدى. قايتقاننان كەيىن ماڭدايىنا تاس تيگەن، جۇرەگى شايلىققان، ومىردە ماقسات مۇراتتان قايمىققان زاداقان ەمەس. قايتا تۇلەپ ءدۇر سىلكىنتكەن قازاق ادەبيەتىنە زاداقاننىڭ پوەزياسى، زاداقاننىڭ شىعارمالارى دەگەن ۇلكەن قوماقتى دۇنيەلەر قالدىردى.

ەي، وتىنشى قىرشىن تالدى قيماشى، 

جۇپ تورعايدى ۇركىتپەشى قۋماشى. 

جاستى قيساڭ قۋارىپ جەر قۇشادى، 

جۇپتى قۋساڭ ەكى ايرىلىپ ۇشادى. . 

مەن دە سولاي قىرشىنىمنان قيىلعام،

مەن دە سولاي ايىرىلعانمىن جۇبىمنان...

– دەپ باستاپ ەدى قايتا ورالعاندا ولەڭدى.

زاداحان مىڭباي ايگىلى جازۋشى قاجىعۇمار شابدانۇلىمەن تارىم لاگەرىندە بىرگە بولعان. قولقاناتى، تىلەۋلەسى بولعان ادام. قىلمىس رومانىنداعى زارىقبەك دەيتىن اقىن كەيىپكەردىڭ ءپروتوتيپتى زاداحان مىڭباي ۇلى ەدى.

زاداقان مىڭباي 1939 جىلى قحر، ش ۇ ا ر، تارباعاتاي ايماعى، ءدوربىلجىن اۋدانى، قاراكەمەل اۋىلىندا ومىرگە كەلگەن. 1955 جىلى بايىرعى شىڭجاڭ ينستيتۋتىنىڭ ءتىل ادەبيەت فاكۋلتەتىنە وقۋعا تۇسكەن.

جاس اقىن العاش اتاقتى كومپوزيتور مالىك ءجۇنىس ۇلى مۋزىكاسىن جازىپ تاراتقان، «ەلەكتر» ءانى ارقىلى ەلگە تانىلعان. 1960- 1980 جىلدارى سولاقاي ساياساتتىڭ كەسىرىنەن قاقپاي كورىپ، باسپا ءسوز قۇقىنان ايرىلعان. «كوكەيتەستى» اتتى ولەڭ-داستاندار جيناعى، «ماحاببات قۇرباندارى» اتتى داستانى (بىرلەسپە جيناق)  «بەتپە-بەت» اتتى ولەڭدەر جيناعى، «دالا زاڭى» اتتى داستاندار جيناعى باسپادان شىققان. «بەتپە-بەت» جاڭا ءداۋىر ادەبيەتى ۇزدىك شىعارما سىيلىعىنا، «دالا زاڭى» جۇڭگو از ۇلتتار ادەبيەتى ۇزدىك شىعارماسى سىيلىعىنا يە بولعان. 1984 جىلى «التىن قانات» باللاداسى شىڭجاڭ ۇيعىر اۆتونوميالى ولكەلىك بالالار ادەبيەتى سىيلىعىن العان.

«قامشى» پورتالى ۇجىمى مارقۇمنىڭ وتباسىنا قايعىرىپ كوڭىل ايتادى.