الماتى قالالىق №7 كلينيكالىق اۋرۋحانانىڭ باس دارىگەرى ءانۋار امانوۆ قىزمەتىنەن بوساتىلدى، - دەپ حابارلايدى Tengrinews.kz ءتىلشىسى. قالالىق دەنساۋلىق ساقتاۋ باسقارماسىنداعىلار كوميسسيا اتقارعان جۇمىستىڭ قورىتىندىسىنا قاتىستى رەسمي مالىمەتتى ايتتى.

"الماتى قالالىق دەنساۋلىق ساقتاۋ باسقارماسىنىڭ 2017 جىلعى 27 قاڭتارداعى بۇيرىعىمەن قالالىق №7 كلينيكالىق اۋرۋحانانىڭ باس دارىگەرى ءا.ت.امانوۆ قىزمەتىنەن بوساتىلدى. باس دارىگەردىڭ مىندەتىن ەندى اۋرۋحانا باسشىسىنىڭ ورىنباسارى ج.س. شەريازدان اتقارادى"، - دەدى الماتى قالالىق دەنساۋلىق ساقتاۋ باسقارماسىنداعىلار.

جادىرا شەريازدان الماتىداعى مەملەكەتتىك مەديسينالىق ينستيتۋتىن دارىگەرلىك ەمدەۋ ءىسى ماماندىعى بويىنشا بىتىرگەن. ەڭبەك جولىن ينتەرناتۋرا مەن رەزيدەنتۋرا كافەدراسىنىڭ كومەكشىسى قىزمەتىنەن باستاعان. 2013 جىلى قالالىق №7 كلينيكالىق اۋرۋحانانىڭ گەماتولوگيا ءبولىمىنىڭ مەڭگەرۋشىسى بولىپ تاعايىندالعان. ال 2015 جىلدان بەرى كلينيكادا باس دارىگەردىڭ ورىنباسارى بولىپ جۇمىس ىستەگەن.

"الماتى قالالىق دەنساۋلىق ساقتاۋ باسقارماسىنىڭ بۇيرىعىمەن قۇرىلعان كوميسسيا ۆيدەوجازبانىڭ 2015 جىلى №4 قالالىق كلينيكالىق اۋرۋحاناسىنىڭ جۇمىس جيىنىندا تۇسىرىلگەنىن انىقتادى. جيىندى اۋرۋحانانىڭ بۇرىنعى باس دارىگەرى ا.ت.امانوۆ وتكىزگەن. ول 2016 جىلى روتاسيا اياسىندا №7 قالالىق اۋرۋحاناعا اۋىستىرىلعان"، - دەپ راستادى باسقارما وكىلدەرى.

ەسكە سالايىق، WhatsApp مەسسەندجەرىندە جانە Facebook الەۋمەتتىك جەلىسىندە مەديسينالىق جۇمىسشىلاردىڭ مەديسينالىق مەكەمەلەردىڭ بىرىندە وتكىزگەن جيىنى تۇسىرىلگەن ۆيدەو پايدا بولعان ەدى. وندا مەديسينالىق مەكەمەنىڭ باس دارىگەرى ادەپ نورماسىن بۇزىپ، "مەديسينالىق جۇمىسشىنىڭ اتىنا كىر كەلتىرەتىن ارەكەت جاساعان".

"ەندىگىدە مەديسينالىق جۇمىسشىلار مۇنداي ەرەجەبۇزۋشىلىق جاعدايلارىن جاساماۋى ءۇشىن قالالىق مەديسينالىق ۇيىمداردا ءتۇسىندىرۋ جۇمىستارى جۇرگىزىلدى. دەنساۋلىق ساقتاۋ باسقارماسىندا قۇرىلعان كوميسسيا №7 قالالىق اۋرۋحانانىڭ قىزمەتىنە تەكسەرىس جۇرگىزۋدى جالعاستىرىپ جاتىر"، - دەلىنگەن حابارلامادا.