«قوشقار مەن تەكە» ءمۋلتفيلمىنىڭ ءۇشىنشى ءبولىمى شىعادى. بۇل تۋرالى انيماسيالىق ءفيلمدى جاساۋشى «ساق» كينوستۋدياسىنىڭ رەجيسسەرى باتىرحان داۋرەنبەكوۆتىڭ سۇحباتىندا ايتىلعان. «ەگەمەن قازاقستان» گازەتى جاريالاعان سۇحباتتى وقىرمان نازارىنا ۇسىنامىز.

سوڭعى جىلدارى ەكرانعا شىققان قازاق مۋلتفيلمدەرىنىڭ ىشىندە «قوشقار مەن تەكە» ءا دەگەننەن-اق كورەرمەندەردىڭ ىستىق ىقىلاسىنا يە بولعانى انىق. قاشاندا شەتەل مۋلتفيلمىنە قۇمارتىپ، شرەك، ورمەكشى ادام، سپاندجبوب دەسە ىشكەن اسىن جەرگە قوياتىن قازاق بالالارىن لەزدە باۋراپ الىپ، كىشكەنتايلاردىڭ قوشقار بوپ الىسىپ-جۇلىسىپ جۇرگەنىنە تالاي كۋا بولدىق.

دەگەنمەن دە قازاقى بولمىسقا جاقىن، اسىرەسە، جاس كورەرمەندەردى كۇلكىگە بولەپ، كوپتەپ جيناي بىلگەن «قوشقار مەن تەكەنىڭ» بار-جوعى ەكى-اق سەرياسى شىقتى. ءتىپتى، اۋىز تولتىرىپ ايتۋدىڭ ءوزى ۇيات… مۇنداي كەزدە شەتەل مۋلتفيلمدەرى سەريال-سەريال بوپ ءتۇسىرىلىپ، سوڭى كورىنبەي، ۇباپ-شۇباپ كەتەر ەدى. جاپ-جاقسى تابىلعان پەرسوناجداردىڭ نەبارى ەكى-اق سەريامەن شەكتەلىپ قالۋىنا نە سەبەپ؟

– شىنىندا «قوشقار مەن تەكەنى» جۇرت وتە جاقسى قابىلدادى، – دەيدى بىزبەن اڭگىمەسىندە «ساق» كينوستۋدياسىنىڭ رەجيسسەرى باتىرحان داۋرەنبەكوۆ. – ەڭبەگىمىز باعالانىپ، بۇل مۋلت­فيلم قىتايدا ارنايى جۇلدەمەن دە ماراپاتتالدى. ەلىمىزدەگى وسى سالانى ساراپتاۋشى ماماندار «قوشقار مەن تەكەنى» ەڭ ۇزدىك 5 ءمۋلتفيلمنىڭ ءبىرى رەتىندە باعالادى. ايتپاقشى، ۇزدىك دەپ باعالانعان وسى بەسەۋدىڭ ۇشەۋى ءبىزدىڭ «ساق» كينوستۋدياسىنىڭ ونىمدەرى. بۇل دا ءبىزدىڭ ساپالى ەڭبەگىمىزدىڭ ايقىن ءبىر كورىنىسى بولسا كەرەك. «قوشقار مەن تەكەنىڭ» ەكى سەرياسى «ءقازاقفيلمنىڭ» تاپسىرىسى بويىنشا ءتۇسىرىلدى. قارجىسىن سول مەكەمە تولەدى. ءقازىر ءۇشىنشى سەرياسىنىڭ سەنارييى جازىلىپ، دايىن تۇر. بۇل سەريا الدىڭعىلاردان دا قىزىقتى بولاتىنىنا سەنىمىم مول. ويتكەنى، قوشقار، تەكە، قاسقىرلاردان دا بولەك پەرسوناجدار قوسىلعان. ءبىراق، وسى سەريانى تۇسىرۋگە قارجى بولماي تۇر. ازىرگە دەمەۋشىلەرگە حابارلاسىپ، ۇسىنىس ايتقانىمىز جوق. دەگەنمەن دە بۇل ىسكە قولداۋ بولماسا، سەناريي تارتپادا جاتىپ، ءوز ماڭىزىن جوعالتىپ الا ما دەگەن دە ءقاۋپىمىز بار.

ءيا، ەلىمىزدە مۋلتفيلم ءوندىرىسىنىڭ ءالى دە اياققا تۇرا الماي جاتقانى تۋرالى تالاي مارتە جازىلدى. ايتسە دە تاپقىرلىعى مەن شەبەرلىگى ارقاسىندا جۇرتتى مويىنداتىپ، ۇلتتىڭ ءبىتىم-بولمىسىن، تىنىس-تىرشىلىگىن ەكران ارقىلى جارقىراتىپ جۇرگەن بۇل ونەرلى ۇجىمعا مادەنيەت جانە سپورت مينيسترلىگى تاراپىنان ۇلكەن قولداۋ كەرەك سياقتى.

ورالحان ءداۋىت