ءارقايسىسى ءوزىن «قالىڭدىقپىن» دەپ اتاعان ديماش قۇدايبەرگەننىڭ جانكۇيەرلەرى قازاقتاندىق ءانشىنىڭ «Singer» جوباسىنا قاتىسۋى تۋرالى روليك جاسادى، دەپ حابارلادى قىتايداعى inform.kz مەنشىكتى ءتىلشىسى.  

«ءومىر كينو سياقتى» اتتى ەكى مينۋتتىق فيلمدە ديماشتىڭ بايقاۋدا ءان ايتقان ساتتەرى، ساحنا سىرتىنداعى ءومىرى: فوتوسەسسيا، ءقوناقۇي نومىرىنەن، گريمەر بولمەسىندەگى، سونداي-اق ونىڭ جۇڭگو ءتىلىن قالاي ۇيرەنىپ جاتقان كادرلارى كورسەتىلەدى.

قىتايلىق الەۋمەتتىك جەلىلەردە، باق-تا قازاقستاندىق ءانشىنىڭ ساحنا سىرتىنداعى ومىرىنەن فوتولار جاريالاندى.      

ەسكە سالساق، قىتايدا «Singer» بايقاۋىنا قاتىسىپ جاتقان ديماش قۇدايبەرگەن ەكى اپتا بويى اسپان استى ەلىندەگى 10 ەڭ اتاقتى جۇلدىزدار (انشىلەر عانا ەمەس، باسقا دا اكتەرلەر، جۇرگىزۋشىلەر جانە ت.ب) رەيتينگىن باستادى.  وندا ونىڭ ەسىمىن ينتەرنەتتە ءجيى ىزدەۋ، ول جايلى مالىمەت ىزدەۋ، ۆيدەوسىن كورۋ، تەليەۆيزيالىق رەيتينگىن ەسەپكە الادى.      

ديماش قۇدايبەرگەننىڭ قىتايداعى سەنساسيالىق تانىمالدىلىعى تۋرالى مىسال كەلتىرسەك، قىتايداعى جانكۇيەرلەردىڭ ءبىرى قۇمدى انيماسيا ادىسىمەن تۇسىرگەن ۆيدەوروليكتى ءبىر اپتادان از ۋاقىتتا 5 ملن-نان استام ادام تاماشالاعان. فاناتتارى وعان سەزىمدەرىن ءبىلدىرىپ، ءتۇرلى حاتتار جازىپ، سىيلىقتار جولداۋدا. ونى اۋەجايدا، ءقوناقۇيدىڭ الدىندا اڭدىپ جۇرەدى. بويجەتكەندەر الەۋمەتتىك جەلىدە كوپتەگەن فان-ارتتار مەن سۇيىكتى ورىنداۋشىسىنىڭ قۇرمەتىنە ءتۇرلى كورسەتىلىمدەر جاريالاۋدا.     

 بۇگىن، استانا ۋاقىتى بويىنشا 20.30-دا Hunan.TV تەلەارناسىنىڭ ەفيرىنە ءتورتىنشى تۋردىڭ جازباسى كورسەتىلەدى. وندا ديماش قۇدايبەرگەنوۆ «كۇزگى مۇڭ» ءانىن جۇڭگو تىلىندە اكسەنتسىز ورىنداپ، ءۇشىنشى ورىندى يەلەنگەن.