"الاش ايناسىنىڭ" باس رەداكتورى سەرىك جانبولات ءوزىنىڭ Facebook پاراقشاسىندا قازىرگى قىزدىڭ تاربيەسى، يماندىلىعىن ءسوز ەتتى.
"وسى ءبىز باتىس بولامىز دەپ - بولا الماي، شىعىستان كەتەمىز دەپ - كەتە الماي، ەكى ورتادا ابدەن داعدارىپ قالدىق-اۋ دەيمىن؟ ولاي دەۋىمە سەبەپ: ءبىراز جىل بۇرىن ءبىر توپ ادام قىزداردى وقىتاتىن قازاق-تۇرىك ليسەيىنە باس سۇققانىمىز بار. سوندا وقيتىن قىزداردىڭ يناباتتىلىعىن، ىزەتتىلىگىن كورىپ ەسىمىزدەن تانىپ قالعانىمىز - شىندىق. باسقا وقۋ ورىنداعىداي قايقاڭداپ قاعىپ وتپەيدى، جاسى ۇلكەن ادامعا ءبارى دە مىندەتتى تۇردە سالەمدەسەدى. بەتپە-بەت كەلىپ قالساڭ، جول بەرەدى. ەشقانداي جاساندىلىق جوق، ءبارى قازاقشا، ءبارى جاراسىمدى. ادامدار ءبىرىن-بىرى جۇلىپ جەگەن مىنا قاسقىر زاماندا باسقا الەمگە ءتۇسىپ كەتكەندەي كۇي كەشتىك. كوزىمىز الاقانداي بولىپ سىرتقا شىققان سوڭ اسەرىمىزدى ءبولىسىپ جاتىرمىز. سوندا ءبىز ءوزىمىزدىڭ ۇلى شىعىستىڭ اجىراماس بولىگى ەكەنىمىزدى سەزىندىك. ۇلى مادەنيەتتىڭ ۇياسى - شىعىس ەمەس پە؟! سونداي ماقتانىش كەرنەدى. مىناداي وي تۋادى: ايگىلى جەنپي دەيتىن قىزدار ۋنيۆەرسيتەتى و باستا وسىنداي ماقساتتا قۇرىلماپ پا ەدى؟ ايتپەسە، ەلدىڭ بالالارىن قىزدار، ۇلدار دەپ ءبولىپ جاتقان باسقا وقۋ ورنى نەكەن-ساياق. جەنپي شىعىس مادەنيەتى مەن ونەرىنىڭ وشاعى، قازاق قىزدارىنا ءومىر فيلوسوفياسىن تۇجىرىمداپ بەرەتىن ەڭ ۇلى ورتالىق بولۋعا ءتيىس ەمەس پە؟ كادىمگى ءبىلىمدى كەز-كەلگەن وقۋ ورنى بەرە الادى. ال، جەنپي باسقالاردىڭ قولىنان كەلمەيتىن دۇنيەلەردى جاساۋعا ءتيىس سياقتى كورىنەدى ماعان. ونى بىتىرگەن ءاربىر قىز بالا قازاق مادەنيەتىنىڭ گ ۇلى مەن سيمۆولى بولىپ جۇرسە شىركىن دەگەن وي عوي. ولاي دەۋگە تاعى ءبىر سەبەپ: ءقازىر الماتىدا قىز بالالارعا ارنالعان جەكە مەكتەپتەر بار ەكەن. مەنىڭ ءبىر بيزنەسمەن دوسىم ءوزىنىڭ قىزىن سوعان ارەڭ ورنالاستىرعانىن ايتادى. ول جەردە قىز بالاعا پوەزيا مەن سۋرەتتەن، بالەت پەن سپورتتان، ەتيكا مەن ەستەتيكادان، كلاسسيكالىق ونەر مەن فيلوسوفيادان ءدارىس بەرەدى ەكەن. ءار بالامەن جۇمىس ىستەيدى، تاپسىرما بەرەدى. ولەڭ جاتتايدى، شەشەن سويلەۋدى مەڭگەرەدى. وكىنىشتىسى: ول جەردە قازاقي دۇنيە جوق. باح مەن مونە بار، احماتوۆا مەن نيسشە بار. اباي مەن دومالاق انا جوق ءبىراق. فاريزا مەن ناۋرىزبايەۆ جوق. زەينەپ احمەتوۆانىڭ قازاق وتباسى فيلوسوفياسىنىڭ ءيىسى دە جوق. ارينە، ولاردى قازاقشا وقىتپادىڭ دەپ كىنالاۋدان اۋلاقپىن. شىعىستىڭ ۇلى فيلوسوفياسى مەن ىلىمىنەن جۇرداي بولىپ، بۇگىنگى زاماننىڭ ەڭ قاجەتىن قازاقشا وقىتا الماي وتىرعان ءوزىمىز ەمەس پە؟ وسىنى ىستەسەك، بىرەۋ بىزگە قوي دەدى مە؟ تەك زەينەپ اپاي، سول، شىرىلداپ جۇرگەن. ءبىراق، جالعىز ءوزى تۇتاس ۇلتتىق مەكتەپ پەن ءداستۇر قالىپتاستىرا الا ما؟ سوندىقتان، جەنپي مىڭداعان زەينەپ اپايلاردى دايىنداپ شىعاراتىن ۇلتتىق ورتالىق بولسا دەگەن وي عوي مەنىكى. سوندا ءبىز شىعىس ەلىندەگى باستاۋ-بۇلاعىمىزعا، ۇلتتىق ءداستۇر مەن تاربيەگە قايتىپ ورالار ما ەدىك؟" دەپ جازدى سەرىك جانبولات.
