قىتايداعى تانىمال تەلەجوبا «مەن ءانشىمىن» بايقاۋىنا قاتىسىپ جاتقان وتانداسىمىز بايقاۋدىڭ التىنشى كەزەڭىندە تاعى دا ءبىرىنشى ورىندى الدى. بۇل تۋرالى «قامشى» پورتالى حابارلايدى.

ديماش قاتىسىپ جاتقان ءان بايقاۋىنىڭ التىنشى كەزەڭىن سارالاۋ كەشە وتكەن. ول Adagio ءانىن پيانينودا ورىنداپ، تىك تۇرىپ قۇرمەت كورسەتكەن كورەرمەندى تاڭداي قاقتىرىپ، تاعى دا تالاسسىز ءبىرىنشى ورىندى الدى. بايقاۋدىڭ اتالعان سانى كەلەسى اپتانىڭ سەنبى كۇنى ءوز ۋاقىتىندا Hunan تەلەارناسىنان كورسەتىلەدى. ءبىر قىزىعى اتالعان ءان ديماشتى كەزدەسۋگە شاقىرعان لارا فابياننىڭ ورىنداۋىندا تانىلعان.

ايتا كەتەتىن بولساق، ديماش اتالعان بايقاۋدىڭ العاشقى ەكى كەزەڭىندە دە بىرىنشىلىكتى الىپ، ميللياردتار ەلىندە فەنومەنگە اينالىپ ۇلگەردى. سايىستىڭ ءبىرىنشى كۇنىندە قازىلار القاسى تاراپىنان ەڭ جوعارعى ۇپاي جيناپ، جەڭىمپاز اتاندى. 10 قاڭتار كۇنى ديماش جۇڭگو كورەرمەنىنىڭ الدىنا العاش رەت شىققان سوڭ، جاس ءانشى تۋرالى جۇڭگو ءباسپاسوزى جازا باستاعان. ءتىپتى كەيبىر باسىلىم ونى «ديماش – ءتاڭىر ءوزى نازارىنا العان جاس ءانشى» دەپ باعالاعان ەدى.

ەستەرىڭىزگە سالساق، ديماش 1، 2 كەزەڭدە ءبىرىنشى ورىن، 3، 4 كەزەڭدە ءۇشىنشى ورىن، 5 كەزەڭدە 5 ورىن العان بولاتىن.

ەسكە سالايىق، ديماش قۇدايبەرگەنوۆ ۆيتەبسكتە وتكەن "سلاۆيان بازارى-2015" حالىقارالىق بايقاۋىندا جەڭىمپاز اتانعان ەدى. ول، سونىمەن قاتار، "شىعىس بازارى" جانە "مەيكين ازيا" بايقاۋلارىنىڭ گران-پري يەگەرى.