ماڭعىستاۋ وبلىسىندا 2016 جىلدىڭ تامىز ايىندا جوعالىپ كەتكەن 17 جاستاعى اماندىق ساتىبالدييەۆ ءولى تابىلدى. بۇل تۋرالى "لادا"باسىلىمىنا 16 اقپاندا جىگىتتىڭ تۋىستارى حابارلاعان، دەپ جازادى tengrinews.kz
"ءبىزدىڭ تۋىستار ءمايىتتى تانۋعا بارىپ كەلدى، ۇلىمىزدى ساۋساعىنداعى ساقينادان تانىدى. بىزگە ونى قامىس اراسىنداعى باتپاقتان تاۋىپ العاندارىن ايتتى"، - دەدى اماندىقتىڭ اكەسى.
پوليسەيلەر ازىرشە وسىعان قاتىستى رەسمي مالىمەت بەرگەن جوق.
اماندىق ساتىبالدييەۆ 26 تامىزدا ماڭعىستاۋ-5 اۋىلىنداعى ءوز ۇيىنەن كەشكى ۋاقىتتا كەتىپ قالعان بولاتىن. ول سول كەزدە قارا جەيدە، كوك ءتۇستى شالبار جانە كوك اياقكيىمدە بولعان ەدى.
وسىعان دەيىن بالانىڭ اكەسى بالاسىنىڭ ءۇش جىل بويى ءبىر قىزبەن كەزدەسىپ جۇرگەنىن جانە قىزىنان ءوز سەزىمىن جاسىرماعانىن ايتقان بولاتىن. اماندىقتىڭ اكە-شەشەسى ەكەۋىنە قولداۋ كورسەتكەن، الايدا قىز جاق كەلىسىم بەرمەگەن كورىنەدى.
"ونىڭ اناسى ەكەۋىنىڭ قارىم-قاتىناسىنا قارسى بولاتىن. اماندىقتىڭ كەتۋىنەن ءبىر كۇن بۇرىن WhatsApp ارقىلى جازىسقان، ول ءوزىنىڭ قىزىنىڭ تەلەفونىن الىپ، اماندىققا ەكەۋىنىڭ ايىرىلىسۋىن جازعان. الايدا مەنىڭ ۇلىم قىزدى جاقسى كورەتىنىن ايتىپ، ودان ايىرىلمايتىنىن ايتقان، - دەگەن ەدى اماندىقتىڭ اكەسى مۇرات يشيمبەكوۆ.
وسى حات الماسۋدان كەيىن ءبىر كۇن وتكەندە اماندىق ۇيدەن كەتىپ قالادى. كەتەر كۇنى ول WhatsApp مەسسەندجەرىنىڭ پروفيلىندە جازبا قالدىرىپ كەتكەن: "ءبىر كۇنى سەن دە مەنى ساعىناسىڭ، دۇرىس ءتۇسىن وسى ءسوزدىڭ ماعىناسىن...".
"ارينە ءبىز بالامىزدىڭ جوعالىپ كەتكەنى جونىندە پوليسياعا حابار بەردىك. اماندىقتىڭ تەلەفونى ءسوندىرۋلى"، - دەگەن ەدى بالانىڭ اكەسى.
