بۇگىن استانادا قازاقستان رەسپۋبليكاسى مەن رەسەي فەدەراسياسىنىڭ 2017 جىلعا ارنالعان مادەنيەت سالاسىندا بىرلەسكەن ارەكەتتەر جوسپارىنا قول قويۋ سالتاناتتى ءراسىمى ءوتتى. ەكىجاقتى مادەني ىنتىماقتاستىقتى ودان ءارى نىعايتۋ مەن دامىتۋعا باعىتتالعان ستراتەگيالىق قۇجاتقا ق ر مادەنيەت جانە سپورت ءمينيسترى ارىستانبەك مۇحامەدي ۇلى مەن رف مادەنيەت ءمينيسترى ۆلاديمير مەدينسكيي قول قويدى.

سالتاناتتى قول قويۋ ءراسىمى بارىسىندا ۆەدومستۆو باسشىسى ايتىپ كەتكەندەي، بىرلەسكەن ارەكەتتەر جوسپارى قازاقستان رەسپۋبليكاسى مادەنيەت جانە سپورت مينيسترلىگى مەن رەسەي فەدەراسياسى مادەنيەت مينيسترلىگى اراسىنداعى 2017-2019 جىلدارعا ارنالعان ىنتىماقتاستىق باعدارلاماسىن جۇزەگە اسىرۋ ماقساتىندا بەكىتىلىپ وتىر.

«قازاقستان مەن رەسەيدى ءوزارا تۇسىنىستىك پەن سىيلاستىققا نەگىزدەلگەن تىعىز دوستىق پەن تاتۋ كورشىلىك قارىم-قاتىناستار بايلانىستىرادى. بۇگىن قول قويىلىپ جاتقان قۇجات مەملەكەتتەرىمىزدىڭ اراسىندا ۇزاق جىلدار بويى قالىپتاسىپ كەلە جاتقان ىنتىماقتاستىعىمىزدى جالعاستىراتىندىعىنا سەنىمدىمىن»، – دەدى ا. مۇحامەدي ۇلى.

«ءبىزدىڭ كەلىسىم دەرەكسىز ەمەس، ناقتى. ءبىز كينو ءوندىرىسى سالاسىنداعى ىنتىماقتاستىق جونىندە ۋاعدالاستىق. سونداي-اق، ەكسپو اياسىندا استاناعا ماريين تەاترى،  ميحايلوۆ تەاترى كەلەدى، چەحوۆ اتىنداعى مكت گاسترولدەرى تۋرالى كەلىسسوزدەر جۇرگىزىلىپ، استانادا ەرميتاجدىڭ ۇلكەن كورمەسىن وتكىزۋ تۋرالى كەلىسسوزدەر اياقتالۋدا» – دەپ اتاپ ءوتتى ۆلاديمير مەدينسكيي.

ايتىپ ءوتۋىمىز كەرەك، «28 پانفيلوۆشى» ءفيلمى – وتكەن جىلعى رەسەيلىك جانە قازاقستاندىق پروكاتتىڭ كوشباسشىسى. رف مادەنيەت مينيسترلىگى مەن ق ر مادەنيەت جانە سپورت مينيسترلىگىنىڭ قولداۋىمەن تۇسىرىلگەن كينوتۋىندى پروكاتتىڭ قالىپتاسقان بارلىق مەرزىمدەرىنە ساي بولىپ، ءبىر اي بويى كورسەتىلدى. حالىقارالىق كينونارىققا شىعۋ جوسپارلانىپ وتىر.  ق ر مادەنيەت جانە سپورت ءمينيسترى ارىستانبەك مۇحامەدي ۇلى مەن رف مادەنيەت ءمينيسترى ۆلاديمير مەدينسكيي ءفيلمدى جاساۋعا قوسقان ۇلەستەرى ءۇشىن «2016 جىلدىڭ جىل ادامى» بولدى. 

قابىلدانعان ارەكەتتەر جوسپارىنا سايكەس، مەملەكەتتەر 2019 جىلدى قازاقستان-رەسەي مادەنيەت الماسۋ جىلى دەپ جاريالاۋ مۇمكىندىگىن قاراستىرۋعا كەلىستى. بۇل قادام مادەني-گۋمانيتارلىق بايلانىستارعا جاڭا سەرپىن بەرە وتىرىپ، قازاقستان-رەسەي ءىرى كولەمدى جوبالارىنىڭ ۇيلەسىمدىلىگىن قامتاماسىز ەتەتىن بولادى. تاراپتار جوعارى بەلگىلەنگەن باستامالاردى جۇزەگە اسىرۋعا قازاقستان رەسپۋبليكاسى جانە رەسەي فەدەراسياسىنىڭ ايماقتارىن دا تارتۋدىڭ قاجەتتىگى تۋرالى ءبىراۋىزدان پىكىر ءبىلدىردى.

ودان باسقا، جوسپارعا قاتىسۋشىلار استانا قالاسىندا ەكسپو-2017 حالىقارالىق مامانداندىرىلعان كورمەنىڭ جۇمىسى بارىسىندا مادەني شارالاردى وتكىزۋگە بارىنشا قولداۋ كورسەتۋگە كەلىستى. رەسەي تاراپى قازاقستان رەسپۋبليكاسىنىڭ م. لەرمونتوۆ اتىنداعى مەملەكەتتىك اكادەميالىق ورىس دراما تەاترىنىڭ گاسترولدەرىن رەسەي فەدەراسياسىنىڭ ايقماتارىندا، سونىڭ ىشىندە تومسك، نوۆوسيبيرسك، كەمەروۆو جانە بارناۋل قالالارىندا 2017 جىلدىڭ كۇزىندە وتكىزۋگە ىقپال جاسايتىن بولادى.

سونىمەن قاتار جوسپاردا مادەني مۇرالاردى ساقتاۋ مەن مادەنيەت جانە تاريحي ەسكەرتكىشتەردى تۋريستىك اينالىمعا ەنگىزۋ سالاسىندا تاجىريبە الماسۋ، ورتاق تاريحي مەيرامداردى مەرەكەلەۋگە ارنالعان مادەني ءىس-شارالاردى وتكىزۋگە قولداۋ كورسەتۋ بويىنشا جۇمىستى جالعاستىرۋ كوزدەلگەن. قۇجاتتا قازاقستان رەسپۋبليكاسى مەن رەسەي فەدەراسياسىنىڭ كينەماتوگرافيا، تۋريزم سالالارىنداعى ىنتىماقتاستىق ماسەلەلەرىنە كوڭىل بولىنگەن.  

سونداي-اق قول قويۋ ءراسىمى بارىسىندا ارىستانبەك مۇحامەدي ۇلى رەسەي فەدەراسياسىنىڭ مادەنيەت ءمينيسترى ۆ.ر. مەدينسكييگە قازاق ۇلتتىق ۋنيۆەرسيتەتىنىڭ قۇرمەتتى پروفەسسورى اتاعى ديپلومىن تابىستادى.

ەستەرىڭىزگە سالساق، 17 جانە 19 اقپان ارالىعىندا رەسەي اكتەرلەرىنىڭ قاتىسۋىمەن استانادا رەسەي كينوسى كۇندەرى ءوتتى. ولاردىڭ قاتارىندا رەجيسسەر نيكولاي حومەريكيدىڭ «لەدوكول» كوركەم ءفيلمى، رەجيسسەرلەر ماكسيم ۆولكوۆ پەن اندرەي گالاتتىڭ «ۆولكي ي وۆسى: بەزۋمنوە پريەۆراششەنيە» انيماسيالىق ءفيلمى، رەجيسسەر نيكولاي لەبەديەۆتىڭ «ەكيپاج» كوركەم ءفيلمى،  رەجيسسەر وكسانا كاراستىڭ «حوروشيي مالچيك» كوركەم ءفيلمى. كوركەم، انيماسيالىق فيلمدەرىنىڭ قايىرىمدىلىق كورسەتىلىمىنە بالالار ءۇيى مەن از قامتىلعان وتباسى بالالارى ششاقىرىلدى.

         رەسەي كينوسى كۇندەرى قازاقستان رەسپۋبليكاسى مەن رەسەي فەدەراسياسىنىڭ اراسىنداعى مادەني ىنتىماقتاستىق تۋرالى كەلىسىم، سونىمەن قاتار 2016 جىلعى 5 قىركۇيەكتە ماسكەۋدە قول قويىلعان 2017-2019 جج. ارنالعان ق ر مادەنيەت جانە سپورت مينيسترلىگى جانە رف مادەنيەت مينيسترلىگى اراسىنداعى مادەنيەت سالاسىنداعى ىنتىماقتاستىق باعدارلاماسى اياسىندا وتكىزىلدى. بارلىق ءىس-شارالار رەسەيلىك تاراپ ەسەبىنەن وتكىزىلگەن بولاتىن.