جانتۇرشىگەرلىك وقيعا. الماتى وبلىسىندا ءبىر ازامات 13 جىل بويى وتاسقان ايەلىن جۇمىسىنا بارىپ، بىرنەشە جەرىنەن پىشاقتاپ ولتىرگەن. 33 جاسىندا ۇزىلگەن جانار ناسىروۆانىڭ دەنەسىن بۇگىن تۋىستارى اقتىق ساپارعا شىعارىپ سالدى. ال كۇدىكتىنى پوليسەيلەر قىلمىس بولعان كۇنى ۇستاعان. مارقۇمنىڭ جاقىندارى ورنى تولماس قازاعا ۇشىراتقان ادامعا جازانىڭ ەڭ اۋىرىن سۇراپ وتىر، دەپ حابارلايدى 31 ارنا.

قىلمىستىق وقيعا "اسىل ارمان" تۇرعىن ءۇي كەشەنىندەگى وسى ءدارىحانا ىشىندە بولعان. 19 اقپان كۇنى كەشكە قاراي جانار ناسىروۆا جۇمىستا وتىرعان كەزدە كۇيەۋى سۋىت كەلىپ، سارت تا سۇرت پىشاق جۇمساعان.  ال ءقازىر ءدارىحانا تەرگەۋگە بايلانىستى ما، ايتەۋىر، ۋاقىتشا جابىق تۇر.

ءدارىحانا اكىمشىلىگى وقيعانىڭ بەينەجازباسىن تەرگەۋشىلەرگە بەرگەن ەكەن. جانار ناسىروۆا سوڭعى ءبىر ايدا اجىراسۋعا ارىز بەرىپ، جامبىل اۋدانى، اقسەڭگىر اۋىلىندا اناسىمەن بىرگە تۇرىپ جاتىپتى. سەبەبى كۇيەۋى ازامات قۇلىمبەتوۆ ۇزىناعاشتاعى ۇيلەرىن ءوز قولىمەن ورتەپ جىبەرىپتى. تۋىستارى مارقۇمنىڭ جۇبايىنان كورمەگەن قورلىعى جوق، سوڭعى ۋاقىتتارى ۇرىپ-سوعۋ شەگىنە جەتكەن ەدى دەيدى.

نۇرعايشا مالدىبايەۆا، مارقۇمنىڭ تۋىسى:

- ۇيىنە اپارىپ، قىلقىندىرىپ مۇنى، وسى جەرگە ءولىم اۋزىندا كەلدى. سول كۇنى كەلدىم. قايىن ءسىڭلىم ماعان زۆوندادى، جانار ولگەلى جاتىر دەدى. كەلسەم، داۋىسى شىقپايدى قىزدىڭ. كەڭىردەگى قىپ-قىزىل، ەزگەن عوي.

سودان كەيىن كۇش كورسەتكىش كۇيەۋ بالانىڭ ۇستىنەن ارىز جازىلعان. اۋداندىق پوليسيا ەش شارا قولدانبادى دەپ اشىنادى كوپشىلىك. ارادا اپتا وتپەي، قىزىنىڭ جانسىز دەنەسىن قۇشاقتاپ اناسى، اڭىراپ ەكى بالاسى قالدى.

تۋىستارىنىڭ ايتۋىنشا، ماماندىعى دارىگەر بولعان كۇيەۋ بالانىڭ پىشاق سۇقپاعان جەرى جوق. مارقۇمنىڭ جانازاسىنا جينالعان قالىڭ ەل دە، تۋىستارى دا قاندىقول كۇدىكتىنى قاتاڭ جازالاۋدى سۇرادى. جۇبايىنا ەكى بالا مەن اناڭدى دا ولتىرەمىن دەپ قورقىتقان ول ايىپتان قۇتىلىپ كەتسە، ءبىزدى دە جايىمىزعا قالدىرمايدى دەپ سەكەمدەنىپ وتىر. ءقازىر كىسى ءولتىرۋ بابى بويىنشا سوتقا دەيىنگى تەرگەۋ جۇرگىزىلىپ جاتىر.

ايمان مىرزەكوۆا، الماتى وبلىستىق ءىىد باسپا ءسوز قىزمەتىنىڭ جەتەكشىسى:

- كۇدىكتى رەتىندە ۇزىناعاش اۋىلىنىڭ 34 جاستاعى تۇرعىنى ۇستالىپ، قاراساي اۋداندىق ءىىب ۋاقىتشا ۇستاۋ يزولياتورىنا قاماۋعا الىندى.

قازا قابىرعاسىنا باتقان مارقۇمنىڭ اناسى ەكى بالانىڭ ءوز قاراۋىندا قالۋىن تىلەيدى. ال تىلشىلەر تىلدەسپەككە كەلگەندە كۇدىكتى ازامات قۇلىمبەتوۆتىڭ اكە-شەشەسىنىڭ ءۇيى جابىق تۇردى. كورشىلەردىڭ ءبىرىنىڭ ايتۋىنشا، شۇعىل استاناعا كەتىپتى. ايتا كەتەيىك، وسىدان 4 اي بۇرىن تالعار اۋدانىندا تاعى ءبىر ازامات ءوز ايەلىن پىشاقتاپ ءولتىرىپ، 16 جىلعا سوتتالعان بولاتىن.