رەداكسيامىزعا لاۋرا مۇكىبايەۆا ەسىمدى قىزىلوردا قالاسى قىزىلجارما اۋىلىنىڭ تۇرعىنى حابارلاستى. جالعىز باستى انا كاۋسار سارسەنباي ەسىمدى 7 جاستاعى قىزىنىڭ باسىنان وتكەرگەن اۋىر جاعدايىن بايانداپ بەردى.

2016 جىلى اقپاننىڭ 18-دە كاۋسار مەكتەپتەن قايتىپ كەلە جاتقاندا، جولدا «kz 304 اۆ/11» «كاماز 65115» نومەرلى جۇك كولىگى قاعىپ كەتكەن. كولىك كوركەيتۋ مەكەمەسىنە تيەسىلى. ال رۋلدە رۋسلان قامالوۆ ەسىمدى جىگىت وتىرعان. قىز اۋىر جاراقات الدى. تاعايىندالعان سوت-مەديسينالىق ساراپتاماسىنىڭ 07.04.2016 جىلعى №29 قورىتىندىسى بويىنشا، ءجاسوسىپىرىم كاۋسار سارسەنباي «پوليتراۆما. اۋىر جابىق باس مي جاراقاتى. باس ميىنىڭ سوعىلۋى، 2ء-شى دارەجەسى. جۇلىن ميىنىڭ سوعىلۋى. بەتتىڭ، ماڭدايدىڭ جابىق تىندەرى سوعىلۋى، جارىلۋى. ەكى سان سۇيەكتەرىنىڭ ورتاڭعى بولىگىنىڭ جابىق كولدەنەڭ ىعىسقان سىنىعى. سەگىزكوز-جامباس قوسىلىمى اجىراۋى، سول جاقتى وتىرىقشى سۇيەكتىڭ ىعىسقان جابىق سىنىعى، كىشى جامباس ساقيناسىنىڭ بۇزىلۋى. وڭ اياق باسىنىڭ سوعىلعان جاراقاتى. جاراقاتتىق شوك، 2ء-شى دارەجەسى. پوستراۆماتيكالىق اۋىر دارەجەلى انەميا» دەگەن قورىتىندى شىعارعان. (ماقالاعا قوسىمشا رەتىندە بارلىق قۇجات بەرىلدى).

كاۋسار 5 كۇن جان ساقتاۋ بولىمىندە جاتتى. وپەراسيا جەدەل تۇردە جاسالىپ، 21 كۇنگە جەتپەي، 19 كۇنگە تولعاندا اۋرۋحانادان ونى شىعارىپ جىبەرگەن. لاۋرا مۇكىبايەۆانىڭ ادۆوكاتى گۇلنار ءالياقباروۆا 21 كۇنگە جەتپەي ءجابىر كورگەن ادام اۋرۋحانادان شىعىپ كەتسە، جاراقاتى جەڭىل بولىپ سانالاتىنىن ايتقان.

كاۋسار ۇيگە كەلگەننەن كەيىن جاعدايى كۇرت ناشارلاپ، اياعى ءىسىپ كەتكەن. امالى تاۋسىلعان انا قارىزدانىپ استانادا قىزىنىڭ اياعىنا وپەراسيا جاساتادى. دارىگەرلەر تاعى دا وتا جاساۋ كەرەكتىگىن ايتىپ وتىر. الايدا جالعىز باستى انا وعان قاجەتتى قارجىنى تابا الماي، قينالىپ وتىرعان جايى بار.

لاۋرا حانىمنىڭ ءوزى قىزىلوردا قالاسىنىڭ ءىىد رۋسلان قامالوۆتىڭ ۇستىنەن ارىزدانعان. الايدا سوت جۇرگىزۋشىنى ەمەس، 7 جاستاعى كاۋسار سارسەنبايدى كىنالى دەپ تاۋىپ ءىس جابىلعان. كاۋسار ادامدار جۇرۋگە بولمايتىن جەردەن ءوتتى دەگەن ءۋاج ايتقان.  الايدا، لاۋرا حانىمنىڭ ايتۋىنشا قىزىلجارما اۋىلىندا باعدارشام دا، جول بەلگىسى دە جوق. كاۋساردىڭ اناسىنا ايتۋى بويىنشا، جۇرگىزۋشى تەلەفونمەن سويلەسىپ كەلە جاتقان.

«جەتى جاستاعى قىز قالاي كىنالى بولادى؟ اۋىر جاعدايداعى قىزىمدى كوتەرىپ، بارماعان جەرىم جوق. الايدا بارلىعى جۇرگىزۋشىنىڭ ءسوزىن سويلەيدى. ادىلەتتىلىك قايدا؟ بۇل زاڭنىڭ السىزدىگى مە؟» دەيدى اشىنعان انا.

«قامشى» پورتالى قىزىلوردا قالاسى قىزىلجارما اۋىلىندا بولعان وقيعاعا قاتىستى، سوت شەشىمىن، مەديسينالىق ساراپتامانى، تەرگەۋ امالدارى كەزىندەگى ماتەريالداردى زاڭگەرگە جىبەردى. ولار ءىستىڭ مان-جايىمەن تانىسقاننان كەيىن زاڭ تۇرعىسىنان دۇرىس-بۇرىستىعىن انىقتايتىن بولادى.

ءقازىر كىشكەنتاي كاۋساردىڭ جاعدايى ناشار. ءجيى تالىپ قالادى ەكەن. دارىگەرلەر باسىنا قاتتى زاقىم كەلگەنىن ايتادى. ءبىر جىل بۇرىن عانا جۇگىرىپ، ويناپ جۇرگەن بالا ءقازىر نە ىستەپ، نە قويعانىن بىلمەيتىن جاعدايلارى ءجيى بولادى ەكەن.

دارىگەرلەر كاۋسارعا مەديسينالىق كومەك كەرەك ەكەنى ايتىپ وتىر. الايدا كاۋساردان بولەك التى ايلىق بالاسى بار جالعىز باستى انا جۇمىسسىز ەكەنىن ايتادى.

لاۋرا حانىمنىڭ كومەك سۇراپ بارماعان جەرى، باسپاعان تاۋى قالماپتى. «نۇر وتانعا»، قىزىلوردا وبلىستىق ءىىد، قىزىلوردا وبلىسىنىڭ پروكۋراتۋراسىنا دا  بارعان. الايدا بارلىق جەردە كومەكتەسەتىنىن ايتۋمەن عانا شەكتەلەتىنىنە ناليدى.

«تاۋەلسىزدىگىمىزگە 25 جىل تولعاندا قىزىلورداعى مينيسترلىكتەن ادامدار كەلگەن. مەن ولارعا ءوز جاعدايىمدى ايتىپ، كومەك سۇرادىم. ارقامنان قاعىپ شىعارىپ سالدى. ءبىراق ءالى كۇنگە دەيىن ەش ناتيجە جوق. ءىىد پولكوۆنيگى حاميتبەكوۆكە دە باردىم. ول دا كومەكتەسەتىنىن ايتىپ شىعارىپ سالدى. الايدا مىنە ءبىر جىل بولدى، ەشقانداي كومەك كورسەتىلمەدى» دەيدى لاۋرا حانىم.

كاۋساردى قاققان جۇك كولىگى تيەسىلى مەكەمەنىڭ باسشىسى تالعات قالمۇرزايەۆقا بارعان ۋاقىتتا وقيعا بولعان كۇنى رۋلدە وتىرعان رۋسلانعا  100 مىڭ تەڭگە كولەمىندەگى قاراجاتتى قول حاتپەن بەرگەنىن ايتىپ، ونىڭ كوشىرمەسىن لاۋرا حانىمنىڭ قولىنا ۇستاتقان. سونىمەن قاتار، سوت كىنالى دەپ تاپسا تاعى دا قاراجات بەرەتىنىن ايتقان. 

«رۋسلان قامالوۆ قىزدىڭ جاعدايىن ءبىلۋ ءۇشىن، 4، 5 رەت قانا تاماعىن كوتەرىپ كەلدى. ودان بولەك ەشقانداي 100 مىڭ تەڭگە بەرمەدى. ول جىگىتتى بىلەمىن، جۇمىسىن جاساپ، تىنىش ءومىر ءسۇرىپ ءجۇر. ال مەنىڭ قىزىم كولىك اپاتىنىڭ زاردابىن تارتىپ جاتىر» دەيدى لاۋرا حانىم.

قامشىگەر: اسەم المۇحانبەت