پارلامەنت ماجىلىسىندەگى حالىقتىق كوممۋنيستەر پارتياسىنىڭ فراكسياسى  بيلىككە قارسى كوشەگە شىعۋعا، نارازىلىقتار اكسياسىن جاساۋعا يتەرمەلەمەسە دە اششى شىندىقتاردى ايتىپ، ەكونوميكالىق جاعدايىمىزعا شىنشىل ساراپتار جاساپ قويادى. وسى فراكسيانىڭ دەپۋتاتى ايقىن قوڭىروۆ جۋىردا بيلىك اقپاراتتارىنىڭ جالعاندىعىن ايتىپ، بەتىن شيەدەي قىلدى. اتاپ ايتقاندا، رەسمي ستاتيستيكا 2007 جىلدان بەرى كۇنكورىس مينيمۋمىنان تومەن تۇراتىن قازاقستاندىقتاردىڭ ۇلەسى جىلدان جىلعا تومەندەپ، 2،5 پايىزعا دەيىن ازايعانىن ايتادى. بۇعان ناناتىن بولساق بىزدەگى كەدەيلەردىڭ ۇلەسى اقش پەن ەۋروپانىڭ ۇلەسىنەن دە ازايىپ كەتىپتى.  ءتىپتى، جاقسى ءومىر ءسۇرىپ جاتىر ەكەنبىز-اۋ... الايدا، دەيدى كوممۋنيست، قازاقستاندىقتاردىڭ ورتاشا ەڭبەكاقىسى 2007 جىلدان بەرى ۇنەمى ازايۋدا. وتكەن، 2016 جىلى ول 416 اقش دوللارىنا دەيىن قۇلدىراپ، يران، جۇڭگو، مەكسيكا سەكىلدى حالقى كەدەي تۇراتىن دامۋشى مەملەكەتتەردەن دە تومەن ءتۇسىپ كەتكەنىن ايتادى. جالپى حالىق وسىلاي كۇيزەلىپ جاتقاندا كەدەيلەردىڭ سانى نەنىڭ سەبەبىنەن ازايۋى مۇمكىن؟

    بۇلاي بولۋى مۇمكىن ەمەس، جالپى حالىقتىڭ جاعدايى قۇلدىراپ جاتقاندا كەدەيلەردىڭ سانى ەشقاشان ازايمايدى. ەندەشە رەسمي ستاتيستيكا دا وتىرىك، ونى قولداناتىن بيلىكتىڭ ءسوزى دە وتىرىك بولىپ شىعادى. وسى ورگە باستىرمايتىن وتىرىكتىڭ بيلىككە نە كەرەگى بار، دەي كەلىپ، ايقىن  قوڭىروۆ ودان دا حالىقتىڭ جوعىن تولتىراتىن جولدار ىزدەۋ كەرەك قوي. سونىڭ ىشىندە كەدەيشىلىك شەگى كۇنكورىس مينيمۋمىنا تەڭەستىرىلۋى كەرەك دەگەن تالاپ قويىپ،  جانە ونىڭ ستاندارتىن جاساۋعا كومەك بەرۋگە دە ءازىر ەكەنىن ايتىپ، پرەمەر-مينيسترگە ساۋال جولدادى.

س.ەلەۋ، ساراپشى