اقتوبەدەگى مەكتەپتەردىڭ بىرىندە مۇعالىمگە قاتىستى شۋ شىقتى، دەپ حابارلايدى 31 ارنا.
شاعىمدانعان اتا-انا 23 جاستاعى ءمۇعالىم 3ء-شى سىنىپتا وقيتىن قىزىنا جىنىس مۇشەسىن كورسەتىپ، قولىمەن ۇستاتقان دەپ وتىر. ءقازىر بۇل وقيعاعا قاتىستى تەرگەۋ امالدارى ءجۇرىپ جاتىر. ال وقۋىن قىزىل ديپلوممەن اياقتاپ، بيىل عانا دەنەشىنىقتىرۋ ءپانىنىڭ ءمۇعالىمى بولعان ازامات بۇلاي ىستەدى دەگەنگە ۇجىم سەنە الار ەمەسپىز دەيدى.
سوڭعى ەكى-ۇش كۇننەن بەرى اقتوبەدەگى بۇل مەكتەپتىڭ ۇجىمى دا، وقۋشىلار مەن اتا-انالار دا مەكتەپ قابىرعاسىندا "وسىنداي بولىپتى" دەگەن وقيعادان كەيىن ەستەرىن جيا الار ەمەس. وقۋشى قىزدىڭ اتا-اناسىنىڭ تۇسىرگەن شاعىمىنا قاراعاندا، ءمۇعالىم ءۇشىنشى سىنىپتا وقيتىن ءوزىنىڭ وقۋشىسىن مەكتەپتەگى تاسا جەرگە اپارىپ، جىنىس مۇشەسىن ۇستاتقان. شاعىمنان سوڭ، وزگە اتا-انالار دا بالالاردى مەكتەپكە جىبەرۋگە قورقاتىن بولدىق دەيدى.
ليۋدميلا ۆيكتوروۆا، تۇرعىن:
- يا بىلا ۆ شوكە. دو پوسلەدنەگو دۋمالا چتو ەتو نە پراۆدا. مەن العاش ەستىگەندە قاتتى قورقىپ كەتتىم. شىن ەمەس بولار دەپ ويلادىم. ارينە ەندى قورقامىز. بالالارىمىزدى مەكتەپكە جىبەرۋگە قورقاتىن بولدىق. 8ء-شى سىنىپتا ءسىڭىلىم وقيدى. ويلاۋدىڭ ءوزى قورقىنىشتى.
مۇعالىمنەن ءزابىر كورۋى مۇمكىن دەگەن وقۋشىنىڭ اتا-اناسى ازىرگە ەل الدىنا شىعۋدى قالاماپتى. ال مەكتەپ ديرەكتورى جاس ءمۇعالىم "ولاي ىستەمەدى" دەپ كەسىپ ايتا المايدى. ايتۋىنشا، ءقازىر كىشكەنتاي قىزعا ءتيىستى دەگەن ءمۇعالىم تەرگەۋگە بايلانىستى جۇمىستان شەتتەتىلگەن. دەگەنمەن، باسشىلىق جاس مۇعالىمنەن جامان قىلىق بايقاماعان ەدىك دەپ وتىر.
لاتىپ ءالىبي، اقتوبە قالاسى №16 ورتا مەكتەبىنىڭ ديرەكتورى:
- ەس-اقىلى دۇرىس، كوللەدج بىتىرگەن بالا. اراق ىشپەيدى، تەمەكى تارتپايدى. ونىڭ ارتىنان ونداي جاعدايدى ەشقاشان كورگەن ەمەسپىز. ءقازىر مەن سىزگە ناقتى ەشتەڭە ايتا المايمىن. نەگە دەسەڭىز ءقازىر سلەدستۆيەسى ءجۇرىپ جاتىر. بىزگە ولار انىق ەشتەڭە ايتقان جوق.
وبلىستىق ىشكى ىستەر دەپارتامەنتى باسپا ءسوز قىزمەتىنىڭ حابارلاۋىنشا، بۇل وقيعاعا قاتىستى شاعىم پوليسيا بولىمىنە تۇسكەن. ءقازىر ءمۇعالىمنىڭ ارەكەتتەرىنە قاتىستى ءىستى پوليسەيلەر جان-جاقتى تەكسەرىپ، اينالىسىپ جاتىر دەيدى.
