بۇدان 16 جىل بۇرىن، ناقتىراق ايتسام،   1996 جىلى قۇلجا قالاسىندا ۋنيۆەرسيتەتتە وقىپ جۇرگەن كەزىمدە،«نۇرتاي قاجى » اتانعان ۇيعىر كاسىپكەر 60 مىڭ دوللار قارجى شىعارىپ، «نۇرتاي قاجى جەتىمدەر مەكتەبىن» اشقاندىعى  قوعامدا كۇشتى اڭىس قوزعاعان ەدى. بۇل جاقسىلىقتى  جەرلىك اقبارات كوزدەرى جارىسا جازدى. سول بەيباق بالالاردىڭ بارلىعى نۇرتاي قاجىنى «اكە» دەپ اتايتىندىعىن بىرگە وقيتىن ۇيعىر ساباقتاستارىمىزدان ءجيى ەستيتىنبىز. ەۋروپا ۇلگىسىندەگى ەكى قاباتتى وقىتۋ ءۇيى، ەكى قاباتتى جاتاقحاناسى، ارنايى اسحاناسى مەن كولەمدى سپورت كەشەنى بار وسىنداي قۇتتى مەكەندى كورىپ قايتۋعا ءبارىمىز قۇشتار ەدىك. سوندا ويلايتىنمىن: «شىركىن، قازاقتا دا وسىنداي ميلليونەر كوپتەپ تۋسا ەكەن» دەپ.

قۇدايعا شۇكىر، قىتايداعى قازاقتاردا جەتىمدەر ماسەلەسى قازىرگە باستى ماسەلەگە اينالعان جوق. ءبىراق بار قازاقتىڭ اتاجۇرتى قازاقستاندا بۇل ماسەلەنىڭ وزەكتى بولىپ تۇرعاندىعىن قۇلاعىمىز شالادى. ەرتەرەكتە مەيرامبەك بەسبايەۆ شىرقايتىن «بوزتورعاي» ءانى دە تالاي جايتتى ۇعىندىرعانداي بولىپ ەدى. كەيدە قازاق ەلىندەگى ءارترۇرلى تەلەارنالاردا جەتىمدەر جايىندا تۇسىرىلگەن بەينەبايانداردى كورىپ  ەت جۇرەگىم ەزىلەدى.

اتاجۇرتقا بارىپ كەلگەن كورشىم مىناداي اڭگىمە ايتىپ ەدى: «ول جاقتاعى تۋىستارىمىز شالقىعان باي ەكەن. قاراپايىم عانا ءبىر مىسال ايتايىن، شەتەلدەن ەكى يت ساتىپ الىپتى. ولاردى ارنايى قاراپ-باپتايتىن قىزمەتكەرلەر بار. يتتەر جۋىندى-شايىندى ىشپەيدى، ادەيى ازىرلەنگەن تاماقتارى، جۋىنۋىعا ارنالعان بولمەلەرى بار. قىزمەتكەرلەر «ايىم»، «كۇنىم» دەپ مەيىرىن توگىپ، اياۋلى بالاسىنداي ماپەلەيدى.

–  سوندا ءبىر ءيتتىڭ باعاسى قانشا تۇرادى ەكەن؟

– ونى قايتەسىڭ؟ شەتەلدەگى ءبىر قازاق وتباسىنىڭ اتاجۇرتىنا بارىپ، ورنالاسىپ، شاڭىراق كوتەرۋىنە جەتەتىن اقشا...

يا، قازاق ەلىندە ميلليونەر اتانعان قاراكوز اعا-اپكەلەرىمىزدىڭ كوپ ەكەندىگىن، ءتىپتى كەيبىرى حالىقارالىق بايلاردىڭ قاتارىنان تابىلىپ جاتقانىن كۇندەلىكتى اقپارات كوزدەرىنەن ءبىلىپ ءجۇرمىز. جوعارىدا اتاعان نۇرتاي قاجى دەگەن ۇيعىر ازاماتتىڭ بايلىعى ولاردىڭ بايلىعىنىڭ جانىندا تۇككە دە تۇماۋى مۇمكىن. ءبىراق اتقارعان جۇمىسىن ايتساڭىزشى! سوعان قاراپ ەرىكسىز ويعا باتاسىڭ: ءبىزدىڭ الاشتىڭ بايلارى ميلليونداپ اقشا شىعارىپ، مەكتەپ سالدىرىپ، نەشە جۇزدەپ جەتىم اسىراماسا دا، سىلەكەيىمەن اۋرۋ اكەلەتىن يت اسىراعانشا، وتباسى مەيىرنە مۇقتاج جەتىم بالالاردى اسىراسا.    ونداي ازاماتتى قۇدىرەتى كۇشتى اللا تاعالا ساۋاپقا جازارى ءسوزسىز. ويتكەنى، قاسيەتتى قۇران كارىمدە: «جەتىمدەرگە جاقسىلىق قىلىڭدار» دەلىنگەن.

شالقار قانياتبەك ۇلى، قحر

سۋرەت: funzoo.ru