ەكسپو-2017 كورمە وبەكتىلەرى  سالىناتىن اۋداندا جۇمىسشى قازا بولدى دەپ حابارلايدى قامشى پورتالى ratel.kz-كە سىلتەمە بەرە وتىرىپ. وقيعا دۇيسەنبى كۇنى 27 اقپاندا ساعات  1-لەر شاماسىندا ورىن العان.

«حۋسەين بەن تالال كوشەسىندە ورىن العان قايعىلى وقيعاعا  بايلانىستى استانا قالاسىنىڭ ءىىد ق.ر-نىڭ قك-نىڭ 156-بابىنا سايكەس (ەڭبەكتى قورعاۋ قاعيدالارىن بۇزۋ) سوتقا دەيىنگى زەرتتەۋ جۇمىستارىن جۇرگىزۋدە» دەپ حابارلادى استانا ءىىد.

پوليسيا باسقارماسى ءوز كەزەگىندە قازا تاپقان جۇمىسشىنىڭ 25 جاستا بولعانىن، وقيعا ورنىندا جەدەل جاردەم كەلمەستەن كوز جۇمعانىن جەتكىزدى.

سوتقا دەيىنگى زەرتتەۋ جۇمىستارى اياسىندا سراپتاما جاسالادى دەپ شەشىلدى.

«استانا قالاسىنىڭ ەڭبەك پەن الەۋمەتتىك قورعاۋ باسقارماسىنىڭ باستاماسىمەن، جۇمىس بەرۋشىنىڭ كىناسىن انىقتاۋ ماقساتىندا ارنايى  زەرتتەۋ جۇرگىزىلىپ جاتىر. وسى زەرتتەۋ ناتيجەسى پروسەسسۋالدى شەشىمگە اسەر ەتپەك »- دەپ اتاپ ءوتتى ءىىد-نىڭ پرەسس-حاتشىلىعى.

«استانا ەكسپو-2017»  كومپانياسى ورىن العان وقيعاعا قاتىستى ءوز پىكىرلەرىن ازىرگە بىلدىرگەن جوق.