«استانا سۋ ارناسى» مكك سىناق زەرتحاناسى 19 ليترلىك بوتەلكەدەگى اۋىز سۋعا حيميالىق ساراپتاما جاسادى. تەكسەرۋدىڭ ناتيجەسىندە ساراپشىلار ەلورداداعى ءبىرقاتار اۋىز سۋ ءوندىرۋشىسى كراننان قۇيىلعان سۋدى ساتىلىمعا شىعارىپ جۇرگەندىگىن انىقتادى، دەپ حابارلايدى Baq.kz

«استانا سۋ ارناسى» قالاداعى ساۋدا ورتالىقتارىندا ساتىلىپ جاتقان اۋىز سۋدىڭ يوندىق قۇرامىن انىقتاۋ ماقساتىندا 57 ءتۇرلى مينەرالدى سۋدى ارنايى تەكسەرۋدەن وتكىزىپتى.

ساراپتاما قورىتىندىسى 19 ليترلىك ۇلكەن بوتەلكەدەگى اۋىز سۋدى وندىرۋشىلەر سۋ قۇبىرلارىنىڭ سۋىن سۇزگىدەن وتكىزەتىنىن انىقتادى. ياعني، حيميالىق اناليز بۇل سۋدىڭ قۇرامىندا ميكروەلەمەنتتەر مەن مينەرالداردىڭ جوق ەكەندىگىن كورسەتتى. ال مۇنداي سۋ ءتىرى اعزانىڭ قالىپتى جۇمىس ىستەۋ تەڭگەرىمىن بۇزادى.

«ءولى سۋدى» تۇراقتى تۇردە تۇتىنۋشىلار ءبىرشاما ۋاقىتتان كەيىن باۋىر، بۇيرەك جانە تاعى دا باسقا اۋرۋلارعا شالدىعادى. سوندىقتان دا، «استانا سۋ ارناسى» مكك ساراپشىلارى مۇنداي سۋدى تۇتىنۋشىلار تاماققا قوسىمشا رەتىندە مىندەتتى تۇردە مينەرالدى قوسپالار، دارۋمەندەر ىشۋلەرى قاجەت دەيدى. ماسەلەن، ساراپتامادان وتكىزىلگەن سۋدىڭ قۇرامىندا كالسيي مەن ماگنيي بەلگىلەنگەن ستاندارتتاردان تومەن ەكەندىگى انىقتالسا، فتور مۇلدەم جوق دەۋگە بولادى. ال اعزاعا فتور جەتىسپەۋشىلىگى تىسجەگىنىڭ پايدا بولۋىنا، كالسيي تۇزدارىنىڭ جەتىسپەۋشىلىگى سۇيەك ۇلپاسى دامۋىنىڭ بۇزىلۋىنا اكەپ سوقتىرادى، ال ماگنييدىڭ جەتكىلىكسىزدىگى ونكولوگيالىق اۋرۋلارعا شالدىعۋ ءقاۋپىن ارتتىرادى.

بۇكىلالەمدىك دەنساۋلىق ساقتاۋ ۇيىمىنىڭ مالىمەتى بويىنشا، ادامداردىڭ دەنساۋلىعى نەگىزىنەن وسى ساپاسىز سۋدىڭ سالدارىنان ناشارلايدى. اعزاعا مينەرالدى تۇزدار مەن دارۋمەندەردى جەتكىزۋشى دە، ونى لاس زاتتاردان تازارتۋشى دا ءدال وسى سۋ بولعاندىقتان، ونىڭ ساپاسىنا اسا كوڭىل بولگەن ءجون. ميكروبيولوگيالىق جانە حيميالىق كورسەتكىشتەرگە ساي كەلمەيتىن اۋىز سۋدى تۇتىنۋ وبا، تىرىسقاق، گەپاتيت جانە گاستروەنتەريت سەكىلدى جامان اۋرۋلارعا شالدىقتىراتىنى تاعى بەلگىلى.

ال، ەلوردالىقتار ول اۋىز سۋدى دۇكەننەن 300-600 تەڭگە كولەمىندە ساتىپ الىپ ءجۇر.

مەملەكەتتىك ستاندارتتارعا ساي، كەز كەلگەن سۋدىڭ ءتۇرى، ءدامى، ءيىسى، سانيتارلى-توكسيكولوگيالىق كورسەتكىشى سىندى قۇرامىنىڭ بارلىعى قاتاڭ تالاپتارعا ساي بولۋى ءتيىس.

«استانا سۋ ارناسىنىڭ» ماماندارىنىڭ ايتۋىنشا، اۋىز سۋ وندىرۋشىلەردىڭ كوبىسى زاتتاڭبادا ونىڭ قايدان الىناتىندىعىن، حيميالىق جانە مينەرالدىق قۇرامىن كورسەتپەيدى. كەيبىر سۋدىڭ ساپاسى زاتتاڭبادا كورسەتىلگەن بەلگىلەرمەن سايكەس كەلمەيتىندىگى دە بەلگىلى بولعان.

«استانا سۋ ارناسى» مكك باسپا ءسوز قىزمەتىنىڭ مالىمەتىنشە، ەلورداداعى اۋىز سۋدىڭ قۇرامى 86،8 مگ/دم3 حلوريدتەن تۇرادى، كەرمەكتىگى - 4،0 مگ ەكۆ/دم3، اۋىر مەتالدار، مۇناي ونىمدەرى، فەنول، پەستيسيدتەر جوق. قازىرگى ۋاقىتتا ەلوردادا 27 كاسىپورىن سۋ شىعارۋمەن اينالىسادى. ونىڭ 11ء-ى بوتەلكەگە قۇيىلاتىن سۋ شىعارسا، 16-سى سۋدى اۆتوماتتى تۇردە تازالايتىن قۇرىلعىلاردى ۇيلەرگە ورنالاستىرۋمەن اينالىسادى.

ەسكە سالا كەتەيىك، بۇعان دەيىن «استانا سۋ ارناسى» ەلوردانىڭ سۋى ساپالى ءارى سۇزگىدەن وتكىزبەي-اق ىشۋگە جارامدى دەگەن بولاتىن.