سپورت تۋرالى جاڭا زاڭنىڭ جوباسىندا ۇلتتىق سپورت تۇرلەرىن قارجىلاندىرۋدى دا قاراستىرۋ كەرەك. بۇل تۋرالى بۇگىن ءماجىلىستىڭ جالپى وتىرىسىندا دەپۋتات بەكبولات تىلەۋحان ايتتى، دەپ حابارلايدى «قامشى» پورتالى Sputnik قازاقستان اگەنتتىگىنە سىلتەمە جاساپ.

 "ۇلتتىق وليمپيادا كوميتەتىنە مەملەكەتتىك بيۋدجەتتەن قاراجات الۋ قۇقىعى بەرىلمەك. سارالاۋ قاعيدالارىنا نەگىزدەلە وتىرىپ، وليمپيادالىق سپورت تۇرلەرى بويىنشا فەدەراسيالار اراسىندا اقشا بولىنەدى عوي. ەندەشە جوعارى جەتىستىكتەرى بار ۇلتتىق سپورت تۇرلەرىن وسى سارالاۋ ناتيجەسى بويىنشا سپورتتىڭ باسىم ءتۇرى دەپ ايقىنداۋعا بولادى. ءقازىر امەريكالىقتار كوكپار تارتىپ جاتىر، ءبىر جارىم ميلليارد قىتايلار ءبىزدىڭ اۋدارىسپاقتى مويىندادى. دۇنيەجۇزىلىك توعىزقۇمالاق فەدەراسياسى قۇرىلعانىن بىلەسىزدەر. رەسەي، جۇڭگو، اقش قازاقتىڭ ۇلتتىق سپورت تۇرلەرىن مويىنداپ جاتىر"، — دەگەن دەپۋتات ۇلتتىق سپورت تۇرلەرىنە دە كوڭىل ءبولىپ، قارجىلاندىرۋ قاجەتتىگىن العا تارتتى. 

ءوز كەزەگىندە مادەنيەت جانە سپورت ءمينيسترى ارىستانبەك مۇحامەدي ۇلى  تەك وليمپيادالىق سپورت قانا ەمەس، ۇلتتىق سپورت تۇرلەرىن دامىتۋ دا ەرەكشە نازاردا ەكەنىن اتاپ ءوتتى. 

 "دۇرىس ايتاسىز، كەيبىر وڭىرلەر ۇلتتىق سپورتقا كوڭىل بولمەيدى. سارالاۋعا كىرگىزسەك، جەرگىلىكتى اتقارۋشى ورگاندار ۇلتتىق سپورتتى دامىتۋعا قاراجات بولەدى. بۇدان بولەك، مينيسترلىكتىڭ باعدارلاماسىندا ۇلتتىق سپورتتى دامىتۋ بويىنشا بىرنەشە اۋقىمدى شارالاردى بەلگىلەپ وتىرمىز. مىسالى، ەكسپو كورمەسى اياسىندا ۇلتتىق سپورت تۇرلەرىنەن ۇلكەن حالىقارالىق جارىستار وتەدى. ۇلتتىق سپورتقا شەتەلدىكتەر قىزىعۋشىلىق تانىتىپ جاتقانى راس. وسى باعىتتا جۇمىستى جالعاستىرامىز"، — دەدى مۇحامەدي ۇلى.