ەلباسى كونستيتۋسيالىق رەفورمالار جوباسىنا قاتىستى ۇسىنىستاردى جيناقتاۋ، پىسىقتاۋ، تالداۋ جانە تالقىلاۋ جونىندە جۇمىستىڭ قىزۋ جۇرگەنىن ايتتى، دەپ حابارلايدى اقوردانىڭ باسپا ءسوز قىزمەتى.
"ءوزىمنىڭ كونستيتۋسيالىق قۇقىعىمدى پايدالانا وتىرىپ، مەن رەفەرەندۋمعا شىعارماي-اق، پارلامەنتتە تالقىلاۋ ارقىلى نەگىزگى زاڭعا وزگەرىستەر ەنگىزۋ تۋرالى شەشىم قابىلدادىم"، – دەدى قازاقستان پرەزيدەنتى.
نۇرسۇلتان نازاربايەۆ ەنگىزىلەتىن وزگەرىستەردىڭ ءبارى ەلىمىزدىڭ دامۋىنا ەرەكشە سەرپىن بەرەتىنىن جانە بۇل قادام ءبىز ءۇشىن ماڭىزدى ەكەنىن ايتىپ ءوتتى.
"ءبىز قازاقستاننىڭ ساياسي مودەلى – پرەزيدەنتتىك رەسپۋبليكانى ساقتاپ قالاتىنىمىزدى ايتىپ وتكەنىمىز ءجون. مەملەكەتتىك باسقارۋ جۇيەسى زامان تالابىنا ساي يكەمدى بولۋى ءتيىس. جۇرگىزىلگەن رەفورمالار ناتيجەسىندە بيلىك وكىلەتتىكتەرىنىڭ ءبىر بولىگى بيلىكتىڭ ءبىر تارماعىنان ەكىنشىسىنە بەرىلىپ، وكىلدى ورگانداردىڭ ۇكىمەت پەن اتقارۋشى ورگاندارعا قاتىستى جۇرگىزەتىن باقىلاۋ فۋنكسيالارى كۇشەيتىلەتىن بولادى، بۇل ولاردى كاسىبيلەندىرۋگە جانە حالىق بيلىگى قاعيداتتارىن بەكىتۋگە باعىتتالادى. بىزگە حالقىمىزدىڭ بولاشاعى ءۇشىن ماڭىزدى قۇجات ماسەلەسىن شەشۋ كەرەك، بۇكىلحالىقتىق تالقىلاۋدىڭ قورىتىندىسىن شىعارىپ، ونى پارلامەنتتىڭ قاراۋىنا ەنگىزۋ مەرزىمىن انىقتاۋ قاجەت. كونستيتۋسيانىڭ 23 بابىنا جانە زاڭدارعا 35 وزگەرتۋ ەنگىزىلەتىنى بەلگىلى بولدى. ەنگىزىلەتىن وزگەرىستەردىڭ باستى ءمانى – پرەزيدەنتتىڭ ءبىرقاتار وكىلەتتىكتەرىن بيلىكتىڭ باسقا تارماقتارىنا قايتا ءبولۋ"، – دەدى ەلباسى.
مەملەكەت باسشىسى باسقارۋدىڭ پرەزيدەنتتىك مودەلىنىڭ تابىستىلىق فاكتورىنا، سونىڭ ارقاسىندا ەلىمىزدىڭ الەمدىك قوعامداستىقتا تانىمال بولعانىنا، حالىقتىڭ ءال-اۋقاتىنىڭ ارتىپ، ونى بۇدان ءارى جاقسارتۋ جونىندە جوسپارلى جۇمىستار جۇرگىزىلىپ جاتقانىنا قاتىسۋشىلاردىڭ نازارىن اۋداردى.
"ەلىمىزدە ىسكە اسىرىلىپ جاتقان بەس ينستيتۋسيونالدىق رەفورماعا جانە قازاقستان حالقىنا ارنالعان جاڭا جولداۋعا سايكەس، رەسپۋبليكامىزدىڭ ساياسي جۇيەسى دە ناقتى وزگەرىستەردى قاجەت ەتىپ وتىر"، – دەدى نۇرسۇلتان نازاربايەۆ.
سونداي-اق، بۇكىلحالىقتىق تالقىلاۋعا شىعارىلعان قازاقستان رەسپۋبليكاسى كونستيتۋسياسىنىڭ قولدانىستاعى رەداكسياسىندا مەنشىك قۇقىعىنا قاتىستى 26-باپقا ۇسىنىلعان تۇزەتۋلەر تالقىلاندى. جۇمىس توبى مۇشەلەرى اتالعان نورماعا ۇسىنىلعان وزگەرىستەرگە قاتىستى حالىقتان ءتۇرلى ۇسىنىس تۇسكەنى تۋرالى ايتتى.
«كونستيتۋسيانىڭ اتى كونستيتۋسيا. ءتيىستى كونسەنسۋس بولۋى كەرەك. قازاقستان ازاماتتارىنىڭ پىكىرىن ەسكەرىپ، 26-باپقا وزگەرىس ەنگىزبەۋدى ۇسىنامىن. زاڭنامانى جەتىلدىرۋ جانە ونىڭ نەگىزگى ەرەجەلەرىن ءتۇسىندىرۋ شارالارىن ودان ءارى جالعاستىرۋ قاجەت»،-دەدى نازاربايەۆ.
سوڭىندا نۇرسۇلتان نازاربايەۆ ۇسىنىلعان تۇزەتۋلەردى تالقىلاۋ بارىسىندا ەل ازاماتتارى جوعارى بەلسەندىلىك تانىتقانىن ايتا كەلىپ، الداعى رەفورمانىڭ ماڭىزدىلىعى مەن وزەكتىلىگىن تاعى ءبىر مارتە اتاپ ءوتتى.
"مەملەكەت قۇرىلىمىنا ۇسىنىلعان وزگەرىستەر قوعامىمىزدى دەموكراتيالاندىرۋ ءىسىن كۇشەيتىپ، حالىق بيلىگىنىڭ نەگىزىن ودان ءارى نىعايتۋعا، پارلامەنتتىڭ ءرولىن، ۇكىمەتتىڭ پرەزيدەنتتىك باسقارۋ نىسانى الدىنداعى دەربەستىگى مەن جاۋاپكەرشىلىگىن ارتتىرۋعا باعىتتالعان. رەفورمانىڭ تۇپكى ءمانى دە وسىندا جاتىر. بۇعان قوسا، قۇقىق قورعاۋ جانە سوت جۇيەسى قىزمەتىنىڭ كونستيتۋسيالىق نەگىزى جاڭعىرتىلادى، كونستيتۋسيالىق قاداعالاۋ جۇيەسى جەتىلدىرىلەدى. كونستيتۋسيالىق قۇرىلىمىمىزدىڭ مىزعىماستىعىنا دەگەن كەپىلدىك تە بەكەم بولا تۇسەدى. جاقىن ارادا كونستيتۋسياعا ەنگىزىلەتىن وزگەرىستەر جوباسى پارلامەنتكە تالقىلاۋ ءۇشىن ۇسىنىلاتىن بولادى"، – دەدى قازاقستان پرەزيدەنتى.
وتىرىستى قورىتىندىلاعان مەملەكەت باسشىسى جۇمىس توبىنىڭ بارلىق مۇشەلەرىنە تابىستى جانە ماڭىزدى تاريحي جۇمىستارى ءۇشىن العىس ايتتى.
