حالىق قالاسا، حان تۇيەسىن سويماي ما؟ حان بولماساق تا جۇرتتتان جاسىرىپ جۇرگەن جالعىز تۇيەمىزدى جىعىپ بەرەتىن بولدىق. ماسەلە بىلاي. اقيىق اعا نەسىپبەك، سايىپقىران اقىندار قالقامان، اقبەرەن، ەربول، داۋلەتكەرەي، امانعالي جانە باسقالار باس قوسقان جيىندا جالعىز ولەڭ وقىپ ەدىك. ەندى سونى باۋىرلارىمىز فب-دا جاريالاۋدى تالاپ ەتىپ جاتىر. ونى ءبىراز قارىنداستار قولداپتى. نەگىزى جەتپىسىنشى جىلدار سوڭىندا قازاق راديوسى ارقىلى وقىلعان ەدى. جاستار پوەزياسى تۋرالى حاباردى جۇرگىزۋشى امانحان ءالءىم ماقتاعان. سەمەيدە وبلىستىق گازەتتە پراكتيكادا جۇرگەندە مەرعالي يبرايەۆ اعامىزدىڭ الدىندا وقىپ جانە ءبىر رەت جەلپىندىرگەن جاقسى ءسوز ەستىگەنبىز. ەشقايدا جارىق كورمەگەن. رەسمي بايگەدەن كەلمەسە دە، جۇلدە الماسا دا جاسىرىپ ءجۇرىپ جارىپ شىعاتىن جامپوزىمىز ەدى. ەندى قالقامان باۋىر قولقالاعان سوڭ، ورتاعا شىعارۋعا تۋرا كەلدى. تۋرا قىرىق جىل بۇرىن تۋعان جىر. از-ماز ولقىلىقتارى بولسا، وبالى كوپكە كورسەتۋدى تالاپ ەتكەن قالقامان باۋىردا دەرسىزدەر....
ورالادى ويىما بالا كەزەڭ، تاپتىرمايتىن قادالعان قاراكوز ەم. اۋىل جاتىر ءبىز وسكەن، وسى اۋىلدى ەكى جارىپ، ەكپىندەپ اعادى وزەن.
ءساندى كلۋب، ماگازين، ءساندى مەكتەپ، ءساندى كوشە، پارك تە ارعى بەتتە. ەكى ورتادا دولدانىپ اساۋ وزەن ۇرعىلايدى تىنىمسىز جاردى بەتكە.
ەسكە الۋىم بولماس-اۋ ەرسى تەگى، قانداي باقىت بىلمەيمىن ەنشىلەدى. مەكتەپتەگى سوڭعى جىل باستالعاندا كەكىلى بار قارا قىز كورشىم ەدى.
وسى ما ەكەن ءبىر گۇلدىڭ اشىلعانى، ءبىر قۇشتارلىق كەۋدەمدە باسىلمادى. ارعى بەتكە وتەمىز جالعىز اياق كوپىرمەنەن ءۇيىمنىڭ قاسىنداعى.
جۇرەگىمدە سەزىمدەر كوشىپ الاڭ، جابىستى انىق ءبىر اۋرۋ وسى ماعان. ونى كۇندە مەكتەپكە بارارىندا ەرتەمەنەن كوپىردەن توسىپ الام.
ۇيقى كەيىن تارتقانمەن كەگەجەدەن قاقپاسىنا قارايمىن تەرەزەدەن. ءجۇرىپ-تۇردىم مەن ىلعي كۇز بويىنا ءجۇرىپ-تۇرعان كورشى قىز ەرەجەمەن.
كەشكەندىگىم بەلگىلى قانداي حالدى، عاشىق جۇرەك تەك سونى ارماندايدى. ول اۋىرىپ ساباققا بارماعان كۇن مەن سەبەپسىز ساباققا بارماي قالدىم.
وسى ما ەكەن ءبىر گۇلدىڭ اشىلعانى، ءبىر ساعىنىش كەۋدەمدە باسىلمادى. ەلەمەستەن كوپىردەن ءوتىپ ءجۇردى، ۇناتپاسىن قارا قىز جاسىرمادى.
سياقتانىپ تۇرسام دا الاڭسىز جان سىرىمدى اشتىم ءسوز ايتپاي، قالامسىز دا. مەنى كورىپ، سودان سوڭ كورمەگەنسىپ ول كوپىردەن ءوتۋشى ەد امالسىزدان.
مەن بوسپىن با، الدە سول قىز قاتتى ما؟ اق كورپەسىن ۇستىنە ءتۇز جاپتى دا، مەكتەپكە توتە تارتىپ كەتتى ءبىر كۇن، سۋىق ءتۇسىپ وزەنگە مۇز قاتتى دا.
جۇرگەنىمدە بار جاننان تەڭدەس كورمەي، كەتەدى مە كورشى قىز ەندى ەسكەرمەي؟ اسىعا كۇتىپ ءجۇردىم كوكتەمدى مەن، "اۋسەلەڭدى كورەم دەپ سەڭ كوشكەندە".
سەڭ دە كوشتى، قىزىققا باتتى حالىق. قارا قىزدىڭ مەرەيى استى ما انىق؟ بەيكۇنا ماحابباتىم بىرگە كەتتى... ...بارا جاتقان كوپىرمەن تاسقىن الىپ! 1976 جىلعى قىركۇيەك.
(Facebook-تەگى پاراقشاسىنان الىندى)
