ۇقك اكادەمياسىنىڭ 24 جاستاعى ەكس-كۋرسانتى 14 جاستاعى وقۋشىمەن جىنىستىق قاتىناسقا تۇسكەن دەگەن كۇدىككە ءىلىندى، - دەپ حابارلايدى Tengrinews.kz

الايدا قىزدىڭ اتا-اناسى جىگىتتىڭ باستاپقىدا زورلاپ، كەيىن بوپسالاعانىن مالىمدەپ وتىر. ولاردىڭ پىكىرىنشە، رۋستام ەسىمدى ەكس-كۋرسانت قىزبەن 2016 جىلى الەۋمەتتىك جەلى ارقىلى تانىسقان. اناسىنىڭ ايتۋىنشا، قىزى مەن ەكس-كۋرسانت ينتەرنەتتە كوپ ۋاقىتتان بەرى حات الماسىپ ءجۇرىپ، كۇزدە تۇڭعىش كەزدەسكەن. سويتسە، ولار كورشى بولىپ شىعىپتى. 

اناسى جىگىتتىڭ كولىكپەن كەلىپ، قىزدى سالونعا كىرگىزىپ العانىن ايتادى. ولار سويلەسكەننەن كەيىن تاراپ كەتكەن. ال ەكى اپتادان كەيىن، اناسىنىڭ ايتۋىنشا، جاستار تاعى دا كەزدەسىپتى. 

ايەلدىڭ ايتۋىنشا، وسى ەكىنشى كەزدەسۋدە جىگىت قىزعا كولىكپەن سەرۋەندەۋدى ۇسىنىپ، ادامدار از جۇرەتىن جەرگە بارعان. ول جاقتا قىزدىڭ ۇيالى تەلەفونىن تارتىپ الىپ، زورلاعان-مىس. كەيىن، وقۋشى قىزدىڭ اناسىنىڭ ايتۋىنشا، جىگىت قىزعا قايتادان كەلگەن. "ول ۆيدەوتىركەۋ قۇرىلعىسىنا ءتۇسىپ قالعان جازبانى الەۋمەتتىك جەلىگە سالامىن دەپ قورقىتىپ، بوپسالادى"، - دەپ مالىمدەدى ايەل.

اناسىنىڭ ايتۋىنشا، قىزىنىڭ بىرەۋمەن كەزدەسىپ جۇرگەنىن ول بىرنەشە اي وتكەننەن كەيىن كەزدەيسوق ءبىلىپ قالعان: قىز ساباقتان قاشىپ كەتىپ، مۇعالىمدەرى دابىل قاققان. 

"كۇيەۋىم مەكتەپكە دەرەۋ كەلىپ، ءمان-جايدى بىلە باستادى. جوق. بارلىعى ورنىندا. سوندا ءمۇعالىم بارلىق قىزدى جيناپ الىپ، نە بىلەتىندەرىن سۇراعان. سول كەزدە قىزدار رۋستام دەگەن بىرەۋدىڭ بارىن، ونى قىزدىڭ جىگىتىم دەپ ايتاتىنىن حابارلاعان. كۇيەۋىم بارلىق قىزعا باقىلاۋ جاساپ، قىزى جايلى بار مالىمەتتى بەرۋىن سۇراعان"، - دەيدى قىزدىڭ اناسى.

شەشەسى جىگىتتىڭ قىز كامەلەت جاسقا تولماعانىن بىلگەن دەيدى. اتا-اناسى پوليسياعا ارىزدى 2017 جىلدىڭ 31 قاڭتارىندا تۇسىرگەن.  

ال ءوز كەزەگىندە الماتى وبلىستىق پوليسياسىنىڭ وكىلدەرى وسى دەرەكپەن سوتالدى تەرگەۋلەردىڭ ءبىرىڭعاي رەەسترىنە 122-باپتىڭ 1ء-شى بولىگى ("ون التى جاسقا تولماعان اداممەن جىنىستىق قاتىناس نەمەسە سەكسۋالدىق سيپاتتاعى وزگە دە ارەكەتتەر جاساۋ") بويىنشا تىركەلگەنىن حابارلادى. الايدا قىزدىڭ اتا-اناسى ءتارتىپ ساقشىلارىنىڭ سوتالدى  تەرگەۋدى باسقا باپپەن تىركەۋى كەرەك بولعانىن ايتادى.

"سەبەبى بۇل كەلىسىممەن جىنىستىق قاتىناسقا ءتۇسۋ دەگەندى بىلدىرەدى. بۇل ەسەپتەلمەي مە سوندا؟ بارلىعى قۇجاتتا جازىلعان. ەركىنەن تىس زورلاعان، باستاپقىدا تەلەفونىن تارتىپ العان، قىزىم جىلاعان، كولىكتەن شىققىسى كەلگەن، ال ول كۇشتەپ شەشىندىرگەن. ۇرعان جوق، ارينە، ءبىراق ول شوشىپ قالعان"، - دەيدى قىزدىڭ شەشەسى.

ال پوليسياداعىلار قازىرگى ۋاقىتتا ءىستىڭ ىلە اۋداندىق پروكۋراتۋراسىنا جولدانعانىن ايتتى. 

"كۇدىكتىگە قاتىستى ق ر قپك-نىڭ 156-بابىنا سايكەس "سوتقا دەيىنگى تەرگەپ-تەكسەرۋدى جۇزەگە اسىراتىن ادامعا جانە سوتقا كەلۋ تۋرالى مiندەتتەمە" بۇلتارتپاۋ شاراسى تاڭدالدى"، - دەدى الماتى وبلىستىق ءىىد وكىلدەرى.

ال ق ر ۇقك اكادەمياسىنداعىلار كۋرسانتتىڭ "شارت تالاپتارىن ورىنداماۋىنا بايلانىستى" 2017 جىلدىڭ 30 قاڭتارىندا وقۋدان شىعارىلعانىن حابارلادى. وقۋ كەزىندە جىگىت جاعىمدى جاقتارىمەن كوزگە تۇسكەن دەيدى اكادەمياداعىلار. وقۋ ورنىنا كۇدىكتى 2016 جىلدىڭ شىلدەسىندە تۇسكەن.