سايتىمىزدا «قىزىلوردا وبلىسىندا قىزىن كولىك قاققان انا زاڭنان ادىلدىك ىزدەپ زار جىلاپ ءجۇر» اتتى ماقالامىز شىقتى. وندا 7 جاستاعى كاۋسار سارسەنباي ەسىمدى قىزدىڭ باسىنان وتكەرگەن اۋىر جاعدايى باياندالادى.

ايتا كەتەيىك، 2016 جىلى كاۋسار مەكتەپتەن قايتىپ كەلە جاتقاندا، جولدا جۇك كولىگى قاعىپ كەتەدى. كولىك كوركەيتۋ مەكەمەسىنە تيەسىلى. تاعايىندالعان سوت-مەديسينالىق ساراپتاماسىنىڭ 07.04.2016 جىلعى №29 قورىتىندىسى بويىنشا، ءجاسوسىپىرىم كاۋسار سارسەنباي «پوليتراۆما. اۋىر جابىق باس مي جاراقاتى. باس ميىنىڭ سوعىلۋى، 2ء-شى دارەجەسى. جۇلىن ميىنىڭ سوعىلۋى. بەتتىڭ، ماڭدايدىڭ جابىق تىندەرى سوعىلۋى، جارىلۋى. ەكى سان سۇيەكتەرىنىڭ ورتاڭعى بولىگىنىڭ جابىق كولدەنەڭ ىعىسقان سىنىعى. سەگىزكوز-جامباس قوسىلىمى اجىراۋى، سول جاقتى وتىرىقشى سۇيەكتىڭ ىعىسقان جابىق سىنىعى، كىشى جامباس ساقيناسىنىڭ بۇزىلۋى. وڭ اياق باسىنىڭ سوعىلعان جاراقاتى. جاراقاتتىق شوك، 2ء-شى دارەجەسى. پوستراۆماتيكالىق اۋىر دارەجەلى انەميا» دەگەن قورىتىندى شىعارعان. (ماقالاعا قوسىمشا رەتىندە بارلىق قۇجات بەرىلدى).

كاۋسار 5 كۇن جان ساقتاۋ بولىمىندە جاتتى. وپەراسيا جەدەل تۇردە جاسالىپ، 21 كۇنگە جەتپەي، 19 كۇنگە تولعاندا اۋرۋحانادان ونى شىعارىپ جىبەرگەن. لاۋرا مۇكىبايەۆانىڭ ادۆوكاتى گۇلنار ءالياقباروۆا 21 كۇنگە جەتپەي ءجابىر كورگەن ادام اۋرۋحانادان شىعىپ كەتسە، جاراقاتى جەڭىل بولىپ سانالاتىنىن ايتقان.

كاۋسار ۇيگە كەلگەننەن كەيىن جاعدايى كۇرت ناشارلاپ، اياعى ءىسىپ كەتكەن. امالى تاۋسىلعان انا قارىزدانىپ استانادا قىزىنىڭ اياعىنا وپەراسيا جاساتادى. دارىگەرلەر تاعى دا وتا جاساۋ كەرەكتىگىن ايتىپ وتىر. الايدا جالعىز باستى انا وعان قاجەتتى قارجىنى تابا الماي، قينالىپ وتىرعان جايى بار.

كاۋساردىڭ اناسى لاۋرا مۇكىبايەۆا قىزىلوردا قالاسىنىڭ ءىىد رۋلدە وتىرعان رۋسلان قامالوۆتىڭ ۇستىنەن ارىزدانعان. الايدا سوت جۇرگىزۋشىنى ەمەس، 7 جاستاعى كاۋسار سارسەنبايدى كىنالى دەپ تاۋىپ ءىس جابىلعان.

 «قامشى» پورتالى قىزىلوردا قالاسى قىزىلجارما اۋىلىندا بولعان وقيعاعا قاتىستى، سوت شەشىمىن، مەديسينالىق ساراپتامانى، تەرگەۋ امالدارى كەزىندەگى ماتەريالداردى زاڭگەرگە جىبەردى.

زاڭگەر ەكسپەرتيزا جۇرگىزۋشىنىڭ كولىكتى توقتاتۋعا مۇمكىندىگى بولعان جوق دەپ ناقتى كورسەتىپ تۇرعانىن  جانە مۇنداي جاعدايدا جابىرلەنۋشىگە ازاماتتىق تارتىپتە تالاپ ارىزبەن سوتقا جۇگىنىپ، مەكەمەدەن مورالدىق جانە ماتەريالدىق شىعىنداردى ءوندىرىپ الۋ كەرەكتىگىن ايتتى.

«ازاماتتىق كودەكستىڭ 931 بابىنا سايكەس، جوعارى قاۋىپتىلىك كوزىمەن (اۆتوكولىك سوعان جاتادى) كەلتىرىلگەن زالال سول اتۆوكولىكتىڭ مەنشىك يەسىنەن وندىرىلەدى. سونىمەن قاتار، ول ءۇشىن جۇرگىزۋشىنىڭ كىناسى بولعانى نەمەسە بولماعانى ماڭىزدى ەمەس، كىناسى بولماسا دا زالال تولىق ونىرىلەدى» دەيدى زاڭگەر.

ءقازىر لاۋرا مۇكىبايەۆا زاڭگەردىڭ كەڭەسى بويىنشا قايتا سوتقا جۇگىنبەك. ونىڭ بىرنەشە ۋاقىت الاتىنى انىق. ال كىشكەنتاي كاۋساردىڭ جاعدايى ناشارلاپ بارادى. ءجيى تالىپ قالادى ەكەن. دارىگەرلەر باسىنا قاتتى زاقىم كەلگەنىن ايتادى. ءبىر جىل بۇرىن عانا جۇگىرىپ، ويناپ جۇرگەن بالا ءقازىر نە ىستەپ، نە قويعانىن بىلمەيتىن جاعدايلارى ءجيى بولادى ەكەن. دارىگەرلەر كاۋسارعا شۇعىل اياعىنا وپەراسيا جاساۋ كەرەكتىگىن ايتادى. الايدا كاۋساردان بولەك التى ايلىق بالاسى بار جالعىز باستى انا جۇمىسسىز ەكەنىن ايتادى. اشىنعان انا قايىرىمدى جانداردان كومەك سۇرايدى.

كاۋسارعا كومەك كورسەتە الامىن دەگەندەر «قامشىنىڭ» رەداكسياسىنا حابارلاسىپ كومەككە مۇقتاج جاننىڭ مەكەنجايىن، بايلانىس دەرەگىن الا الادى. قوسىمشا كاۋسار سارسەنبايدىڭ شوتىن جازىپ وتىرمىز.

حالىق بانك

جسن/يين: 810907402337

KZ 6233571092072764

 قامشىگەر: اسەم المۇحانبەت