بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد پەن الماتى اكىمى باۋىرجان بايبەك بەلگىلى اكادەميك تورەگەلدى شارمانوۆتىڭ باستاماسىمەن اشىلعان بىرەگەي وندىرىستە بولدى.  اتاقتى عالىم دەنساۋلىق ءۇشىن پايدالى ءسۇت ونىمدەرىن شىعارۋ ءىسىن جولعا قويىپتى. جاڭا زاۋىت اتالعان ءونىمنىڭ 30 ءتۇرىن شىعارادى.  اسىرەسە، بالالار تاعامىن  شىعارۋعا ەرەكشە كوڭىل بولىنەدى. تاعامتانۋ اكادەمياسى پرەزيدەنتىنىڭ ايتۋىنشا، بيە ءسۇتىنىڭ نەگىزىندە جاسالعان ونىمدەر ءتۇرلى اۋرۋلاردان ساقتاي وتىرىپ، ادام ءومىرىن ۇزارتۋعا سەپتىگىن تيگىزەدى. «بۇل ءومىر ساپاسىن جاقسارتا تۇسەتىن بىرەگەي ءونىم، ءبىز ونىمەن ماقتانامىز»، - دەپ اتاپ ءوتتى تورەگەلدى شارمانوۆ.

ءوز كەزەگىندە مۇحتار قۇل-مۇحاممەد قازاقستاندىق عالىمداردىڭ وتاندىق ەكونوميكانىڭ دامۋى مەن جاڭعىرۋىنا ەكپىن بەرۋى ءتيىس ەكەنىن اتاپ ءوتتى.

"ەلىمىزدىڭ جاسى مەن كارىسىنىڭ ءبارى دە جاقسى بىلەتىن اكادەميك شارمانوۆتىڭ تابىسى – وسىنىڭ جارقىن مىسالى. ەل اعاسى اتانا باستاعان جاسىنا قاراماستان بەلگىلى عالىم جوعارى ساپالى ءونىم شىعارۋدى جولعا قويدى جانە بالالار تاعامىنىڭ ەكولوگيالىق تازا ءونىم بولىپ تابىلاتىنى وتە ماڭىزدى»، - دەپ قورىتىندىلادى ءسوزىن «نۇر وتان» پارتياسى ءتوراعاسىنىڭ ءبىرىنشى ورىنباسارى.