قىزىلوردادا الاش قوزعالىسىنىڭ قايراتكەرى، تۇركىستان ولكەسى حالىقتارىنىڭ ازاتتىق كۇرەسى جەتەكشىلەرىنىڭ ءبىرى، كوركەمسوزشى مۇستافا شوقاي ەسكەرتكىشى اشىلدى، - دەپ حابارلايدى tengrinews.kz.

ەسكەرتكىشتىڭ اشىلۋ سالتاناتىنا قىزىلوردا وبلىسىنىڭ اكىمى قىرىمبەك كوشەربايەۆ قاتىستى. 

 ايتا كەتەيىك، قىزىلوردا قالاسىنىڭ اكىمى نۇرلىبەك نالىبايەۆ قالا حالقى الدىندا ەسەپ بەرۋ كەزدەسۋىندە مەملەكەت جانە قوعام قايراتكەرى مۇستافا شوقايدىڭ ەسكەرتكىشىنە وبلىستىق بيۋدجەتتەن 49 ميلليون 346 مىڭ تەڭگەنىڭ بولىنگەنىن حابارلاعان ەدى. 

مۇستافا شوقاي - پاتشالىق رەسەي زامانىندا مەملەكەتتىك دۋماداعى مۇسىلمان فراكسياسىنىڭ ساياسي بيۋروسىندا قازاق حالقىنىڭ مۇددەسىن تۇڭعىش كوتەرگەن ادام. ول 1890 جىلى 7 قاڭتاردا قىزىلوردا وبلىسى، شيەلى اۋدانى، "مۇستافا شوقاي" اۋىلىندا (بۇرىنعى "نارشوقى") دۇنيەگە كەلگەن. اتاسىنىڭ ارعى تەگى قىپشاقتاردان تارايتىن تورايعىردىڭ بەلدى اقسۇيەكتەرىنە جاتادى. ول اتاقتى تورعاي داتقانىڭ نەمەرەسى، بەدەلدى دە بەتتى شوقايدىڭ بەل بالاسى. ناعاشى جۇرتى حيۋانى بيلەگەن قازاق حاندارىنىڭ اۋلەتىنەن ءوربيدى. مۇستافا اۋىلدا ءجۇرىپ حات تانىعان. 

1940 جىلى پاريجگە نەمىس اسكەرى كىرگەندە، مۇستافا شوقاي تۇتقىنعا الىنىپ، بىرنەشە اي كونسلاگەردە وتىرىپ شىعادى. كوپ ۇزاماي مۇستافا شوقاي (1941) بەرليندەگى "ۆيكتوريا" اۋرۋحاناسىندا كۇماندى جاعدايدا كوز جۇمىپ، قالاداعى مۇسىلماندار زيراتىنا جەرلەندى. فرانسيانىڭ نوجان-سيۋر-مارن (ۆال-دە-مارن دەپارتامەنتى) قالاسىندا قازاق ۇلت وكىلدەرىنىڭ قاتىسۋىمەن ەسكەرتكىش تاقتا ورناتىلعان. الماتى قالاسىندا مۇستافا شوقاي ەسىمىمەن اتالاتىن كوشە بار. قىزىلوردا قالاسىنداعى ەكولوگيا ۋنيۆەرسيتەتىنە مۇستافا شوقاي ەسىمى بەرىلگەن. قايراتكەردىڭ تۋعان اۋىلىنا ەسكەرتكىشى قويىلعان. ونىڭ تۇركى دۇنيەسىنىڭ بوستاندىعى جولىنداعى قايراتكەرلىك كۇرەسى جايلى "مۇستافا شوقاي" كوركەم ءفيلمى ءتۇسىرىلدى.