قازاقتىڭ نار تۇلعالى باتىر ۇلدارى تاعى بەلدەسپەك! ەلىمىزدە 1ء-شى ساۋىردەن دۇنيەجۇزىنە ايگىلى بولعان "قازاقستان بارىسى" تۋرنيرىنە ىرىكتەۋ باستالادى. ونىڭ ۇستىنە بيىل بايراقتى باسەكە «ەكسپو» كورمەسىنە تۇسپا-تۇس ۇيىمداستىرىلىپ وتىر، دەپ حابارلايدى كتك ارناسى.

قازاق كۇرەسى ەكسپو كورمەسىنىڭ كورىگىن قىزدىرماق. ءسويتىپ ءتول سپورت ءتۇرى تاعى الەمگە تانىلىپ، شەتەلدىك تۋريستەر بەلدەسۋدى ءوز كوزدەرىمەن كورە الادى. تۇيە بالۋاندار ءقازىر كۇنى-تۇنى دامىل تاپپاي ازىرلەنىپ جاتىر. ال ىرىكتەۋ الداعى سەنبىدەن باستالماق.

ارمان شورايەۆ، قازاق كۇرەسى فەدەراسياسىنىڭ پرەزيدەنتى:

–جۋىردا وتەتىن دوداعا تەك قانا اسكەريلەر ەمەس، ىشكى ىستەر مينيسترلىگىنىڭ وكىلدەرى قاتىسادى. ۇلتتىق قاۋىپسىزدىك كوميتەتىنىڭ پالۋاندارى قاتىسپاق. ءبىر ەمەس 2 پالۋانعا 1 جانە 2 ورىن العان پالۋانعا جولداما بەرۋگە رۇقسات بەرىپ جاتىرمىز.

ال ىرىكتەۋ ءتۋرنيرى 3 اي بويى اۋىل، اۋدان، وبلىستىق دەڭگەيدە وتەدى. جۇزدەن جۇيرىك اتانعان 34 تۇيە بالۋان عانا «قازاقستان بارىسىنا» جولداما الادى. ءبىراق ولارعا قويىلاتىن تالاپ قاتال. قارا كۇش يەلەرى دوپينگكە قارسى تەكسەرىلمەكشى.

سەرىك جاراسبايەۆ، ق ر مسم سپورت جانە دەنە شىنىقتىرۋ ىستەرى كوميتەتى ءتوراعاسىنىڭ ورىنباسارى:

–دوپينگكە قارسى ورتالىعىندا قان تاپسىرادى. قارايمىز،تەكسەرەمىز.

ال قارسىلاس شاق كەلتىرمەگەن بىلەكتى بالۋانعا بىلتىر 25 ميلليون تەڭگە مەن پاتەر كىلتى تابىستالعان. ۇيىمداستىرۋشىلار بيىل دا جۇلدە قورى بۇدان ارتىق بولماسا كەم بولمايدى دەپ وتىر. بۇعان قوسا، بالۋانداردىڭ باسەكەسى تىكەلەي ەفيردە 120 ەلدە كورسەتىلىپ، ونى 60 ميلليونعا جۋىق كورەرمەن تاماشالاماق. ايتۋلى دودا تۇڭعىش رەت جاڭادان تۇرعىزىلعان سپورت سارايى «بارىس ارەنادا» شىلدەنىڭ 2-ىندە وتەدى.