جۇڭگو حالىق رەسپۋبليكاسىنا جاساعان جۇمىس ساپارى اياسىندا ق ر پرەمەر-مينيسترىنىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆ قحر-دىڭ بيزنەس قاۋىمداستىعى وكىلدەرىمەن كەزدەستى.

كەزدەسۋ بارىسىندا جىبەك جولى قورىمەن «قازاگرو» حولدينگىنىڭ اۋىل شارۋاشىلىعى شيكىزاتىن قايتا وڭدەۋ جوبالارىن قارجىلاندىرۋ بويىنشا ءوزارا بايلانىسى، «CCIC «China Certification & Inspection Group» توبىنىڭ اۋىل شارۋاشىلىعى ونىمدەرى مەن كاسىپورىندارىن سەرتيفيكاتتاۋى ماسەلەلەرى قارالدى.

Wilmart، CITIC جانە COFCO سىندى ترانسۇلتتىق 8 قىتايلىق كومپانيا وكىلدەرىمەن اۋىل شارۋاشىلىعى ونىمدەرىن قايتا وڭدەۋ جوبالارىن قارجىلاندىرۋدى تالقىلاۋ بارىسىندا ا.مىرزاحمەتوۆ اوك-كە قاتىستى مەملەكەت ساياساتىنىڭ باسىم باعىتتارىن جانە قازاقستانداعى ينۆەستيسيالىق ورتانى جاقسارتۋدىڭ جاڭا ادىستەمەسىن ءتۇسىندىردى. سونىمەن قاتار، «China National Machinery IMP&EXP Corp» كورپوراسياسىمەن ا.ج. مامىردا الماتىدا اۋىل شارۋاشىلىعى ماشينالارىنا ارنالعان كورمە ۇيىمداستىرۋ جانە ەل اۋماعىندا ماشينا جاساۋ جانە جابدىقتاۋ زاۋىتتارىن سالۋ بويىنشا كەلىسسوزدەر جۇرگىزىلدى.

قىتايلىق كاسىپكەرلەرمەن كەزدەسۋ سوڭىندا «ازىق-تۇلىك كەلىسىم شارت كورپوراسياسى» ۇك» اكسيونەرلىك قوعامىمەن  «Asia Pacific Food Capital Co.، Ltd.» جانە «Wilmart» كومپانيالارى اراسىندا ءوزارا ىنتىماقتاستىق جانە ساۋدا بويىنشا كەلىسىمشارتقا قول قويۋ سالتاناتى بولىپ ءوتتى.

ايتا كەتەيىك، ا.مىرزاحمەتوۆ بۇعان دەيىن قحر ساپانى قاداعالاۋ، ينسپەكسيا جانە كارانتين جونىندەگى باس باسقارماسى ءتوراعاسى چجي شۋپين جانە قحر اۋىل شارۋاشىلىعى ءمينيسترى حان چانفۋمەن كەزدەسكەن ەدى. ول جۇزدەسۋلەردىڭ ناتيجەسىندە كورشىلەس ەلگە ەكسپورتتالاتىن بيداي كەبەگى پارتيالارىنا قويىلاتىن ينسپەكسيا، كارانتين جانە سانيتارلىق تالاپتار تۋرالى حاتتاماعا قول قويىلىپ، اۋىل شارۋاشىلىعى تەحنولوگياسى ترانسفەرتى مەن عىلىمي-تەحنيكالىق ىنتىماقتاستىق جونىندەگى ۆەدومستۆالار ارالىق جۇمىس توبىن جاساقتاۋ ورتالىق ازيا ايماعى ءۇشىن سەلەكسيالىق-گەنەتيكالىق ورتالىق قۇرۋ ماسەلەلەرى نازارعا الىندى.