پارلامەنت سەناتىنىڭ دەپۋتاتى سارسەنباي ەڭسەگەنوۆ قازاقستانداعى انشىلەرگە فونوگراممانى قولدانۋعا تىيىم سالۋدى ۇسىندى، - دەپ حابارلايدى Tengrinews.kz
"حالىقپەن كەزدەسۋ بارىسىندا كونسەرتتە فونوگراممانى قولدانۋعا قاتىستى ماسەلەلەر قوزعالادى. ارينە، ءبىز ءارتىس ەمەسپىز، ءانشى ەمەسپىز، بۇل ماسەلەنى تۇسىنبەۋىمىز مۇمكىن. ءبىراق تۇرىكمەنستاندا جانە باسقا دا كورشى ەلدەردە فونوگراممامەن ءان ايتۋعا تىيىم سالىنعان"، - دەدى دەپۋتات ەڭسەگەنوۆ.
"ءانشى كونسەرتكە كەلگەندە، ول ءوزىنىڭ قىزمەتىن ساتادى. ال كورەرمەندەر، ياعني، تۇتىنۋشىلار وعان وسى كونسەرتتى كورۋ ءۇشىن تولەيدى. وسى جاعىنان الىپ قاراساق، تۇتىنۋشى جاقسى قىزمەت تۇرىنە يە بولۋى كەرەك. سول ادامنىڭ ءانىن فونورگامما، ماگنيتوفون، ديسك، نەمەسە كاسسەتا ساتىپ الىپ، تىڭداۋعا بولادى. وسىعان بايلانىستى حالىق بىلاي دەپ جاتادى: ءبىز كونسەرتتەرگە ءارتىستى كورىپ قايتۋ ءۇشىن عانا بارمايمىز عوي، ءبىز ونىڭ داۋسىن تىڭدايمىز، ءانىن قالاي ورىنداعانىن كورەمىز، بىزگە ونىڭ فونوگرامماسىنىڭ نە قاجەتى بار"، - دەدى سەناتور.
سونداي-اق، دەپۋتات مينيستردەن زاڭ جوباسىنا وزگەرىستەر ەنگىزۋدى قاراستىرۋدى سۇرادى.
"قۇرال-جابدىقتار مەن اسپاپتار جەتىسپەيدى دەپ جاتادى. ءبىراق ءبىر كەزدەرى ارتىستەرىمىز فونوگرامماسىز دا ءتىرى داۋىستا ءان ايتتى عوي، سوندىقتان ماسەلەنى شەشۋ كەرەك. بۇل ءارتىستىڭ قانشالىقتى دارىندى ەكەنىن كورسەتەدى. سوندىقتان، ءوتىنىشىم، زاڭعا وزگەرىس ەنگىزىڭىزشى"، - دەدى ەڭسەگەنوۆ.
