بيىل اتىراۋ  وبلىسىندا 333 شاقىرىم اسفالت توسەلىپ، جوندەۋ جوسپارلانعان. اتالعان كورسەتكىش بىلتىرعىدان ەكى ەسەگە جۋىق كوپ. بۇل تۋرالى بۇگىن وتكەن وبلىستىق قوعامدىق كەڭەسپەن كەڭەيتىلگەن ءماجىلىس كەزىندە بەلگىلى بولدى. وبلىس اكىمى نۇرلان نوعايەۆ ءتوراعالىق ەتكەن وتىرىستا جولاۋشىلار كولىگى جانە اۆتوموبيل جولدارى باسقارماسىنىڭ باسشىسى قايرات نۇرتايەۆ بۇل ماقساتتا رەسپۋبليكالىق جانە وبلىستىق بيۋدجەتتەن بولجامدى قۇنى 31،5ميلليارد تەڭگە ءبولۋ جوسپارلانىپ وتىرعانىن باياندادى. وبلىس اكىمى باسپا ءسوز قىزمەتىنىڭ حابارلاۋىنشا، بۇل 333 شاقىرىمنىڭ ىشىنە قالالىق ماڭىزداعى 250 شاقىرىم جول جانە وبلىستىق، اۋداندىق ماڭىزداعى جولدار مەن كوپىرلەر بار.

ايتا كەتەلىك، اتىراۋداعى وبلىستىق جانە اۋداندىق دەڭگەيدەگى 2000 شاقىرىم جولدىڭ 49 پايىزى جاقسى جانە قاناعاتتانارلىق كۇيدە. بيىل بۇل كورسەتكىشتى ارتتىرىپ، 51 پايىزدان اسىرۋ جوسپارلانعان.