جۇڭگو حالىق رەسپۋبليكاسىنا جاساعان جۇمىس ساپارىنىڭ ەكىنشى كۇنى ق ر پرەمەر-مينيسترىنىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆ باستاعان قازاقستاندىق دەلەگاسيا قحر كوممەرسيا ءمينيسترى چجۋن شانمەن كەزدەستى دەپ حابارلايدى qamshy.kz ق ر اشم باسپا ءسوز قىزمەتىنە سىلتەمە جاساپ.

وندا ينۆەستيسيالىق ىنتىماقتاستىق پەن قازاقستاندىق بيدايدى جەتكىزۋ كۆوتاسىن ارتتىرۋ ماسەلەلەرى قارالدى.

سونداي-اق، قازاقستان رەسپۋبليكاسىنداعى اۋىل شارۋاشىلىعى ونىمدەرىن قايتا وڭدەۋ جوبالارىن ينۆەستيسيالاۋ جانە قازاقستاندىق ازىق-تۇلىكتى قحر-عا ەكسپورتتاۋ بويىنشا قحر حالىقارالىق ساۋدا-ساتتىققا اتسالىسۋ كوميتەتى وكىلدەرىمەن كەلىسسوزدەر جۇرگىزىلدى.

ايتا كەتەيىك، ا.مىرزاحمەتوۆ باستاعان دەلەگاسيا قۇرامىندا اۋىل شارۋاشىلىعى مينيسترلىگى وكىلدەرى، وبلىس اكىمدەرىنىڭ ورىنباسارلارى، وڭىرلەردىڭ سالالىق باسقارمالارىنىڭ، «قازاگرو» حولدينگى مەن ەنشىلەس ۇيىمدارىنىڭ باسشىلارى، ۇلتتىق اگرارلىق ءعىلىمي-بىلىم بەرۋ ورتالىعى قىزمەتكەرلەرى جانە اۋىل شارۋاشىلىعى قاۋىمداستىقتارىنىڭ جەتەكشىلەرى مەن جەكە كاسىپكەرلەر بار.

ساپاردىڭ باستى ماقساتى – مەملەكەت باسشىسى ن.نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىنداعى اوك-كە شەتەلدەن ينۆەستيسيا تارتۋ مەن اۋىل شارۋاشىلىعى ونىمدەرىنىڭ ەكسپورتى بويىنشا بەرگەن تاپسىرمالارىن جۇزەگە اسىرۋ جانە ەكى جاقتى ءتيىمدى كەلىسىمدەرگە قول جەتكىزۋ.

بۇعان دەيىن دەلەگاسيا مۇشەلەرى قحر ساپانى قاداعالاۋ، ينسپەكسيا جانە كارانتين جونىندەگى باس باسقارماسى مەن قحر اۋىل شارۋاشىلىعى مينيسترلىگى جانە قحر-دىڭ بيزنەس قاۋىمداستىعى وكىلدەرىمەن كەزدەسىپ، ەكى ەلدىڭ اۋىل شارۋاشىلىعى سالاسىنداعى ىنتىماقتاستىعىن ارتتىرۋدىڭ جاڭا جولدارى تالقىلاندى جانە كۇن تارتىبىندە تۇرعان ءبىرقاتار ماسەلەلەر شەشىمىن تاپتى.